Read Batak Dairi 2 Tesalonika 1 Bible Online

2 Tesalonika 1 - Batak Dairi bible

2 Tesalonika 1

¹Kènè dengan sada kuria i Tesalonika sienggo gabè ummat Dèbata Bapa dekket Tuhan Jesus Kristus! Kami, imo si Paulus, si Silas dekket si Timoteus

²mengharapken iberrèken Dèbata Bapanta dekket Tuhan Jesus Kristus mo pasu-pasu dekket damèna bai ndènè.

³Kènè dengan, patut ngo kami mendokken mejalo metangkup taba Dèbata kumar- na kènè alè dengan. Janah patutna ngo kami mendokken i, ai dak makin percayana ngo kènè bai Kristus, janah enggo makin mersike-kelengen kènè samah kènè.

⁴Kemmulihkenna idi ngo dak kuterèngèti kami kènè gennep kami mendalani kuria Dèbata. Nggasang ngo ukur nami lako mennukutken ntegguhna kepercayaen ndènè bai Kristus, tukasi pè dak iletlet janah mpersuk iakap kènè.

⁵Merkitè idi enggo ntangkas taridah ntèger ngo hukum Dèbata: Enggo kènè menggong simpersuk kumarna kerajaen Dèbata. Janah kumarna i ngo enggo patut kènè mbengket mi kerajaen Dèbata.

⁶Ntèger ngo pemmaing Dèbata. Ibalesken ngo simpersuk taba kalak sipepersuk-persukken kènè.

⁷Iberrèken Dèbata ngo kessennangen bai ndènè simenggong simpersuk bagèndari — bagi ma ngo bang bai nami pè — tikan roh Kristus ntarar i sorga nai rebbak dekket malaèkatNa simerkuasa i,

⁸dekket merkitè api mergollah-gollah. Roh ngo ia lako mendabuh hukum taba kalak siso uè kipaduliken Dèbata janah siso menguèi Sukuten Kelluahen tersèngèt Jesus Tuhanta i.

⁹Ihukum ngo kalak i mi kemmagoon siamman sumendah. Oda terolih kalak i kemmuliaan dekket kegegohen dekket kuasa Tuhan i,

¹⁰tikan pekirohna i, mersangap mo Ia ibaing ummatNa janah ipepoji-poji kalak sipercaya i mo ia. Kènè pè dekket ngo gabè ummat Dèbata kerna percaya ngo kènè mi sukuten sikusukutken kami bai ndènè.

¹¹Idi ngo sebabna asa dak kusodipken kami kènè. Mersodip ngo kami asa ibaing Dèbata kènè patut nggellluh rembang mi lemmo atèNa, kerna i ngo asa idilo kènè. Katerra pè iurupi Dèbata mo kènè lako mengulaken simerandal bagè nipergeddo ndènè, janah pelliasken karina ulaan ndènè, kumarna percaya kènè bai Kristus.

¹²Merkitè bagidi terpoji mo Tuhanta Jesus kumarna kènè, janah kènè pè ipoji Jesus ma mo kumarna mendè basa Dèbata dekket Tuhan Jesus Kristus.