Read Batak Dairi Pilemon 1 Bible Online

Pilemon 1 - Batak Dairi bible

Pilemon 1

¹Alè nggia Pilemon, dengan sisada ulaan dekket kami! Aku si Paulus, sada kalak siterkurung kumarna Kristus Jesus rebbak dekket denganta si Timoteus menuratken surat èn mendahi kono,

²bak mendahi kuria simerpulung i bagesmu; bagi ma mendahi turangta si Apfia dekket denganta sisada tujuun si Arkhipus.

³Dak kuharapken kami ngo asa ipasu-pasu Dèbata Bapanta dekket Tuhan Jesus Kristus kènè janah iberrèken damèna bai ndènè.

⁴Gennep mersodip aku, dak kuèngèt ngo gerarmu ninganna mendokken mejalo metangkup taba Dèbata.

⁵Kerna kudengkoh ikekelengi kono ngo karina ummat Dèbata, janah percaya ngo kono bai Tuhan Jesus.

⁶Dak kusodipken ngo asa kita simerkaka-kuanggi ibagasen kepercayaen merbuahken pengantusiin makin mbagesna ipas pasu-pasu sisijalo kumarna persaorenta dekket Kristus.

⁷Kelleng atèmu i alè nggia Pilemon, taba karina ummat Dèbata, pesampangken atèngku janah mennoat aku! Enggo merlolo atè karina ummat Dèbata kumarna Kono.

⁸Kumarna naidi, bagè dengan sisada kepercayaen, ndorok ngo nemmu aku memerèntahken baMu barang kadè sinaing bahankenMu.

⁹Tapi kumarna kelleng ngo atèngku baMu, pellin kupidoken sambing mo. Sada kalak sienggo tua-tua ngo aku janah ikurung kumarnaken Kristus Jesus.

¹⁰Aku si Paulus mengidoken bamu sada pengidoon tersèngèt si Onesimus, dukakku ibagasen Kristus. Ai bapana ngo aku ipas pertendiin, ninganna kurungen èn aku.

¹¹Ukum tikala i oda merguna ia bamu, tapi ukum bagèndari, merguna kalohoon ngo ia bamu, oda pellin bamu sambing tupèh, tapi dekket ngo bangku pè.

¹²Kupasulak ngo ia balik mendahi kono bagèndari, dosken tampuk pusuh-pusuhku ngo ia.

¹³Situhunna naing kucèkèpi ngo ia nemmu asa rebbak aku ia gabè dosken singkatmu asa ndorok iurupi aku, sidekkahku kurungen èn kemmulihken Sukuten Kelluahen bai Dèbata nai.

¹⁴Tapi oda nggèut aku mahanken barang kadè ukum oda setuju kono. Belgahen ngo atèngku mula ibahanken Kono i merkitè ibagah ukurmu sendiri; oda uè aku memaksa kono.

¹⁵Sirang pè si Onesimus bamu nai sigejap ngo i, asa gabè dapet Kono nola ia soh mi amman sumendah.

¹⁶Oda ngo pellin naposo ia baMu ukum bagèndari; lebbih dari pada i ngo. Sada kalak dengan Kristen sinikekellengen ngo ia. Merguna kalohoon ngo ia bangku; makinsa nola mo bamu, tah pè bagè naposo barang pè bagè sada kalak dengan kemulihken Tuhan i!

¹⁷Kumarna naidi, kerna iètong Kono aku dengan samah Kristen, jalo mo si Onesimus mengolihi tosè bagè penjalomu mi diringku.

¹⁸Mula mersalah barang merutang pè ia bamu, bangku mo jujur karina i.

¹⁹Aku sendiri mo mennuratken isèn: Aku si Paulus ngo menggarar lunas i bamu karina. (Tentu oda pellin kuterèngètken baMu isèn mendokken, kono pè merutang ngo bangku, imo nggelluhmu sendiri sebagè kalak Kristen.)

²⁰Kerna naidi alè nggia, urupi mo aku ibagasen Tuhan i; pesampang mo atèngku bagè sada kalak dengan kumarna Kristus.

²¹Tok ngo aku mennuratken èn, iuèi kono sikupidi èn. Kubettoh ngo, iuèi kono ngo pengidonku lebbih dari pada i pè.

²²Ninganna idi, hantari kin mo bekkasku i sapomu, ai tok ngo aku iuèi Dèbata sodip ndènè karina kènè, janah merembah aku balik mendahi kènè.

²³Menenges salam ngo si Epapras sirebbak dekket aku i kurungen kumarna Kristus Jesus.

²⁴Soh mo bamu salam dengan-denganku: si Markus, si Aristarkhus, si Demas dekket si Lukas.

²⁵Dak iapsu-pasu Tuhan Jesus Kristus mo kènè. Tabe nami, Paulus