Read Batak Dairi 1 Johanes 2 Bible Online

1 Johanes 2 - Batak Dairi bible

1 Johanes 2

¹Kènè alè pa! Asa kusuratken pè èn karina bai ndènè, asa ulang mengulaken dosa nèngè ngo kènè. Tapi tah lot barang isè merdosa, lot ngo pengondinta imo Jesus Kristus simengondiken kita bai Bapa i, ai pertèger ngo Ia.

²Merkitè Jesus Kristus i ngo isasa dosanta janah oda ngo pellin dosanta isasa, dekket ngo dosa karina jelma ummatna ni dunia èn.

³Èn ngo tandana, mula siuèi Dèbata sienggo menandai Dèbata ngo kita.

⁴Barang isè mendokken, “Kutandai ngo Dèbata,” tapi oda iuèi katana, perluap ngo ia, janah oda lot merian Dèbata iabagasen ukurna.

⁵Tapi kalak simenguèi kata Dèbata, ikekelengi ngo Dèbata. Imo tandana nggelluh ibagasen Dèbata ia enggo.

⁶Barang isè mendokken enggo nggelluh ibagasen Dèbata ia, kennah bagè pergelluh Jesus Kristus ngo pernggelluhna.

⁷Kènè alè dengan sinikekellengen! Oda ngo hatoren rembaru sikusuratken èn taba kènè, tapi hatoren sienggo lot kin ngo, sienggo ipessoh bai ndènè i mulana i nai; imo sukuten sienggo ijalo kènè bai Dèbata nai.

⁸Tukasi pè bagidi, hatoren rembaru ngo sikusuratken èn taba kènè; ai enggo ntangkas hatoren idi ibagasen Jesus Kristus dekket ibagasen diri ndènè; ai enggo mersep sigellap i, janah enggo mbincar kecihuren i.

⁹Barang isè mendokken ibagasen sinterrang ia nina, tapi mula ikosomi ngo denganna, merlapaten ngo idi, ibagasen kegellapen i dèng ngo ia soh bagèndari.

¹⁰Barang isè mengkekelengi denganna sibagidi i ngo nggelluh ibagasen kecihuren, janah oda lot ibagasensa akkal-akkal memmamng gabè merdosa denganna sidèban.

¹¹Tapi simengkosomi denganna, i bagasen sigellap ngo kalak sibagidi. Nggelluh ibagasen sigellap, oda ngo ibettoh barang dempak dikè tumburenna, ai enggo gellap penengenna.

¹²Kutenges surat mendahi kènè dukak-dukak, kerna enggo iampuni Kristus dosa ndènè.

¹³Kutenges surat mendahi kènè partua ibalè, kerna itandai kènè ngo kata sienggo lot i mulana i nai. Kutenges surat mendahi kènè simatah daging, kerna enggo italuken kènè Sibolis.

¹⁴Kutenges surat mendahi kènè Anak-anak, kerna enggo itandai kènè Dèbata Bapa. Kutenges surat bai ndènè Partua-partua, kumarna enggo itandai kènè Kata i sienggo lot i mulana i nai. Kutenges surat mendahi kènè simatah daging, kumarna mergegoh kènè. Dak ibagasen pusuh peratèen ndènè ngo kata Dèbata, janah enggo italuken kènè Sibolis.

¹⁵Ulang mo kekelengi kènè dunia èn barang pè pengisina. Ai mula ikekelengi kènè dunia èn oda ngo ikekelengi kènè nè Dèbata Bapa.

¹⁶Barang kadè si ni dunia èn — nipergeddo jelma perdosa imo simengabin perukuren jelma asa gabè sèkel ia — janah nisèkelkenna memmaing ia gabè gegah, oda ngo bai Dèbata nai rohna sibagidi, tapi i dunia èn nai ngo.

¹⁷Lako salpun ngo karina dunia èn dekket nipergeddo jelma pè, tapi ukum kalak simengulaken lemmo atè Dèbata, nggelluh ngo ia soh mi amman sumendah.

¹⁸Kènè alè pa! Enggo ndessing ari perpodi. Janah bagè sienggo idengkoh kènè, roh nèngè mo anti Kristus, janah bagèndari pè enggo mèduk roh musuh Kristus. Kerna naidi ngo makin tokna kita, enggo ndessing ari kiamat.

¹⁹Ukum musuh Kristus idi, imo kalak sienggo mennadingken kita, ai oda ngo denganta kalak i. Ukum denganta kin ngo kalak idi, tentu dak rebbak ngo kita. Tapi karuar ngo kalak i banta nai asa kennataan, tuhu-tuhu ngo oda denganta kalak i.

²⁰Ukum kènè enggo mo idomi Tendi Perbadia si niberrèken Jesus Kristus. Kumarna idi ngo asa itandai kènè sukuten situhunna bai Dèbata nai.

²¹Jadi kutengesken surat ènda mendahi kènè, oda kerna mak dèng itandai kènè sukuten situhunna bai Dèbata idi nai, tapi kumarna enggo itandai kènè i ngo janah ibettoh kènè ngo, ukum Dèbata idi oda pennah merluap.

²²Kalak simerluap imo simendokken, oda nina Raja Sipaluah ukum Jesus i si niperbagah-bagah Dèbata. Kalak sibagidi mo Musuh Kristus; oda ngo iakkui kalak idi Bapa i barang pè Anak i.

²³Ai barang isè oda tok taba Anak i, oda ma ngo tok ia bai Bapa i, janah simengketoki Anak i, ikettoki ma mo bak Dèbata.

²⁴Kerna naidi, jamoti kènè mo sukuten sienggo idengkoh kènè i mulana i nam ibagasen pusuh peratèen ndènè. Mula ijamoti kènè ngo i mendè, nggelluh ibagasen Bapa i mo kènè rebbak dekket Anak i.

²⁵Èn ngo niperbagah Kristus banta, imo kenggelluhen situhunna janah soh mi amman sumendah.

²⁶Idi mo sikusukutken taba kènè, tersèngèt kalak sinaing mengelalingken kènè.

²⁷Tapi ukum tersèngèt kènè sendiri, enggo ngo iarirken Kristus TendiNa bai ndènè. Janah sidekkah merian TendiNa ibagasen kènè, oda pella nèngè ajaren kènè. Ai iajari Tendi i ngo kènè tersèngèt karinana janah sènteng ngo nipeddahkenNa i, oda luap. Kerna naidi, uèi kènè mo nipeddahken Tendi i, janah tettap mo kènè ibagasen Kristus.

²⁸Bagèndari pè alè pa, dak nggelluh ibagasen Kristus mo kènè, asa roh kessa Ia luas, gabè tok mo kita janah pang menghadepSa, oda pella ciboni kerna mèla.

²⁹Ai ibettoh kènè ngo ukum Kristus nggelluh ibagasen hendak Dèbata ngo. Jadi bettoh kènè mo, barang isè nggelluh mengèkutken nipergeddo Dèbata, kalak sibagidi ngo dukak Dèbata.