Read Batak Dairi 1 Johanes 3 Bible Online

1 Johanes 3 - Batak Dairi bible

1 Johanes 3

¹Tengen kènè mo belgahna masèh atè Dèbata niberrèkenNa banta, ai idokken ngo kita dukak-dukak Dèbata; janah tuhu ngo i, ai dukak-dukak Dèbata ngo kita. Kerna i ngo asa oda itandai dunia èn kita, kumarna oda itandai dunia èn Dèbata.

²Kènè karina nikekellengen! Dukak Dèbata ngo kita bagèndari, tapi bakunè kita luas, makdèng ipetarar i ukum bagèndari. Tapi sibettoh ngo, mula enggo roh Kristus, gabè tosè bagè Ia mo kita, ai ntarar mo Ia siidah.

³Karina simengharapken bagidi bai Kristus, tuhu-tuhu mo ijaga dirina asa tettap mpanting ipas dosana nai bagè Kristus siso merdosa i.

⁴Barang isè merdosa, i ngo simengelausi perèntah Dèbata, ai pengellausiin mi perèntah Dèbata i ngo dosa.

⁵Ibettoh kènè ngo, roh Kristus i lako mennasa dosa jelma ngo janah ukum Ia oda ngo nung merdosa.

⁶Karina kalak singgelluh ibagasen Kristus, oda ngo pukpuk mengulaken dosa. Ai kalak simengu- laken dosa, oda nung mengidah Kristus, janah oda nung dèng idah.

⁷Kènè alè pa! Ulang uè kènè ilalingken dèba. Ai barang isè mengulaken lemmo atè Dèbata, kalak sibagidi ngo Anak Dèbata, bagè Kristus roh bai Dèbata nai.

⁸Tapi barang isè dakdak mengulaken dosa, dukak Sibolis ngo kalak sibagidi, ai dak mengulaken dosa ngo Sibolis i mulana nai. Jadi roh Anak Dèbata mi dunia èn, lako petumpatken ulaan sibolis ngo.

⁹Kalak sienggo gabè anak Dèbata, oda nèngè pukpuk dak mengulaken dosa, kerna lot ngo bana bakko Dèbata. Jadi kumarna Dèbata ngo Bapana, oda uè ia dak mengulaken dosa.

¹⁰Èn mo laènna dukak-dukak Dèbata bak dukak-dukak Sibolis; barang isè oda menegulaken lemmo atè Dèbata barang oda mengkekelengi denganna, kalak sibagidi mo oda dukak Dèbata.

¹¹Èn ngo sukuten sienggo idengkoh kènè i mulana nai, kennah mersikekelengen ngo kita dekket dengan.

¹²Ulang mo kita bagè si Kain, sienggo gabè dukak Sibolis, ai ibunuh ngo anggina sendiri. Kadè sebabna asa ibunuh si Kain anggina sendiri? Kumarna salah ngo karina pengellakona, tapi ukum pengellako anggina selloh ngo.

¹³Kerna naidi alè dengan, ulang pella lengang kènè mula ikecegoken dunia èn kènè.

¹⁴Ai sibettoh ngo sienggo suberrang kita i kemmatèen i nai mi kenggelluhen situhunna. Sibettoh ngo i kumarna mersikekelengen ngo kita dekket dengan. Barang isè oda merukur kelleng, merlapaten ngo i tettap dèng ia ipas kemmatèen.

¹⁵Pemmunuh ngo barang isè merceggo atè taba denganna, janah kalak pemmunuh, oda terolih kenggelluhen siemman sumendah.

¹⁶Merkitè dalan bagèen ngo sibettoh cara mengkekelengi denganta; iberrèken Kristus ngo diriNa dekket kessahNa mengkepkep kita, jadi kita pè patut ngo merrèken kessahta mengkepkep denganta.

¹⁷Barang isè kelloten i dunia èn, nai idah mo denganna mpersah bana kurangen, keppèken oda mermasèh atè ia taba denganna simpersah i, bakunè mo ia nina mengkekelengi Dèbata?

¹⁸Kènè alè pa! Ulang mo pellin rananta dekket dilahta mendokken mersikekelengen, tapi naing mo dekket pemmahan.

¹⁹Èn mo tandana kita roh bai Dèbata nai, gabè berrani janah tennang kita i hadeppen Dèbata.

²⁰Tapi mula lot siakap kita mersalah ibas pusuh perratènta, janah sibettoh ntarar ngo i i hadeppen Dèbata, ai belgahen ngo Dèbata ibettoh ngo karinana.

²¹Jadi alè dengan sinikekellengen, mula ibas pusuh peratènta oda lot kita memmaing salah, tok mo kita janah berrani i hadeppen Dèbata.

²²Barang kadè sipido bana nai sijalo ngo i, kumarna siuèi kataNa janah siulaken nipergeddoNa.

²³Ukum nipergeddoNa imo: Kennah percaya kita bai AnakNa Jesus Kristus; janah kennah mersikekelengen kita dekket dengan, bagè sienggo idokken Kristus banta.

²⁴Karina kalak simenguèi kata Dèbata nggelluh ngo ia rebbak Dèbata janah Dèbata ibagasensa. Sibettoh ngo ibagasen kita Dèbata kerna ipettok Tendi Perbadia sienggo niberrèken Dèbata banta.