Read Batak Dairi 1 Johanes 4 Bible Online

1 Johanes 4 - Batak Dairi bible

1 Johanes 4

¹Kènè alè dengan si nikekellengen! Ulang tok kènè taba karina kalak simendokken dom Tendi Perbadia ia, tapi unjuni kènè mo lebbè ia tah tuhu bai Dèbata nai Tendi silot bana i barang tah oda. Ai enggo mèduk nabi palsu merrohen bagèndari èn.

²Èn mo tandana: barang isè kalak mengaku, Jesus Kristus Roh mi dunia èn tosè bagè jelma, kalak sibagidi ngo idomi Tendi siroh bai Dèbata nai.

³Tapi kalak siso mengaku bagi tersèngèt Jesus, oda ngo idomi Tendi siroh bai Dèbata nai ia, tapi idomi tendi anti Kristus ngo ia. Ukum tersèngèt Tendi i enggo ibagahken bai ndènè, kennah roh ngo ia, janah enggo mo i dunia èn bagèndari.

⁴Tapi kènè alè pa, Dèbata ngo sidasa kènè. Enggo mo italuken kènè nabi-nabi palsu i, ai merkuasaan ngo Tendi silot bai ndènè dari pada tendi siroh i dunia jahat èn nai.

⁵Iranaken nabi palsu i ngo tersèngèt dunia janah idengkohken dunia èn ngo kalak i, kumarna i dunia èn nai ngo kalak i.

⁶Tapi ukum kita dukak-dukak Dèbata ngo; jadi barang isè menandai Dèbata, idengkohken ngo kita. Tapi siso dukak Dèbata, oda ngo idengkohken katanta. Merkitè bagidi sibettoh mo laènna Tendi simengkeruduk jelma lako menandai Dèbata bak tendi simengelalingken.

⁷Kènè alè dengan si nikekellengen! Mersikekelengen mo kita, ai bai Dèbata nai ngo kelleng i. Barang isè kalak merukur kelleng, dukak Dèbata ngo ia janah itandai ngo Dèbata.

⁸Kalak siso perkelleng oda ngo itandai kalak sibagidi Dèbata; kerna kelleng ngo Dèbata.

⁹Ipetarar Dèbata ngo kellengNa i banta merkitè ipasulak AnakNa roh mi dunia èn, asa merkitè AnakNa i gabè nggelluh kita.

¹⁰Èn ngo kelleng i: Oda ngo kita lebbèen mengkekelengi Dèbata, tapi Dèbata ngo mengkekelengi kita janah pasulakken AnakNa mi dunia èn, asa merkitè Anakna i gabè terolih kesasaan dosa kita.

¹¹Kènè alè dengan si nikekellengen, mula bagi mo keppè kelleng atè Dèbata banta, otang kita pè patut ngo mersikekelengen dekket denganta sidèban,

¹²ai isè poda nung mengidah Dèbata, tapi ibagasen Dèbata ngo kita janah dom masèh atèNa ngo kita mula mersikekelengen kita samah kita.

¹³Kumarna enggo iberrèken Dèbata banta TendiNa sibettoh mo enggo nggelluh ibagasen Dèbata i kita janah kita pè ibagasen Dèbata.

¹⁴Ukum kami enggo mo kuidah kami Anak Dèbata, janah kubagahken kami ngo i bai jelma, ai ipasulak Dèbata ia lako gabè Raja Sipaluahken dunia èn.

¹⁵Barang isè mengaku Anak Dèbata ngo Jesus i, gabè sada mo ia dekket Dèbata janah nggelluh ibagasen Dèbata mo ia.

¹⁶Sibettoh janah sikettoki ngo kelleng atè Dèbata banta. Kelleng ngo Dèbata. Barang isè nggelluhna idomi kelleng, kalak sibagidi ngo nggelluh rebbak Dèbata, janah Dèbata rebbak dekketsa.

¹⁷Nai gabè ipesuntuk mo kelleng atè i banta, asa gabè pang janah mersampang atè kita menghadep Dèbata tikan ari perhukumen i, ai tosè bagè Kristus ngo nggelluhta tukasi pè i dunia èn dèng kita.

¹⁸Barang isè kalak mengerasaken kelleng Dèbata, oda mbiar kalak sibagidi; kerna talu ngo ukur mbiar idi ibakin kelleng situhunna. Asa barang isè kalak mbiar oda perkelleng kalak sibagidi. Ai roh mo ukur mbiar kerna Hukum.

¹⁹Gabè perkelleng atè mo kita kumarna enggo lebbèen Dèbata mengkekelengi kita.

²⁰Mula lot kalak mendokken, “Kukekelengi ngo Dèbata,” keppèken ikosomi denganna, perluap ngo jelma sibagidi. Mula dengan siniidah oda nikekellengen, tuhu kin mo ia mengkekelengi Dèbata siso nung idah.

²¹Jadi èn mo perèntah si sijalo bai Kristus nai: Barang isè mengkekelengi Dèbata, kennah kelleng ngo atèna midah denganna.