Read Batak Dairi 1 Johanes 5 Bible Online

1 Johanes 5 - Batak Dairi bible

1 Johanes 5

¹Barang isè percaya, Jesus i ngo Raja Sipaluah niperbagah-bagah Dèbata, kalak sibagidi ngo dukak-dukak Dèbata. Janah barang isè kelleng atèna midah Bapa i, kelleng ma ngo atèna midah anak i.

²Sibettoh ngo mula sikekelengi dukak-dukak Dèbata, mengkekelengi Dèbata ngo kita janah siuèi kataNa.

³Ketteridahen mengkekelengi Dèbata imo kennah siuèi kataNa. Oda pella mberrat mengulaken kataNa sinidokenNa banta i,

⁴ai barang isè dukak Dèbata kennah tertalukensa ngo dunia jahat èn. Janah tertaluken kita ngo dunia èn merkitè kepercayanta.

⁵Isè ngo ndorok mennaluken kejahaten dunia èn? Pellin kalak sipercaya bai Jesus Anak Dèbata ngo kessa.

⁶Jesus Kristus i ngo sienggo roh mi dunia èn merkitè-kitè laè perridiin i dekket merkitè daroh kemmatèenNa i. Roh ia oda ngo merkitè laè sambing, tapi merkitè laè dekket daroh ngo. Tendi Perbadia i ngo mengkesaksiken i janah tuhu ngo i, ai oda pennah luap Tendi i.

⁷Jadi lot ngo tellu saksi:

⁸Imo Tendi Perbadia, laè dekket daroh — janah dos ngo pengindangken sitellu i.

⁹Tok ngo kita mi si niindangken jelma, tapi percayaen ngo kita mi si niindangken Dèbata. Idi mo kesaksiin nibaingken Bapa i tersèngèt AnakNa i.

¹⁰Kerna naidi, barang isè percaya bai Anak Dèbata, enggo ikesaksiken èn ibagasen pusuh perratènna; tapi barang isè oda percaya bai Dèbata, dosken gabè memmaing perluap ngo Dèbata idi ibaing, kemmulihken oda percaya idi ia mi sienggo ipettarar Dèbata imo AnakNa i.

¹¹Èn ngo kesaksiin i: enggo iberrèken Dèbata banta nggelluh situhunna soh mi sidekkahna, janah AnakNa i ngo benna kenggelluhen situhunna i.

¹²Barang milik isè Anak idi, milikna ma ngo kenggelluhen situhunna i; janah barang isè oda milikna Anak idi; oda ma ngo milikna kenggelluhen i.

¹³Kusuratken idi bai ndènè sienggo percaya bai Anak Dèbata, asa ibettoh kènè ngo, enggo bai ndènè kenggelluhen siamman sumendah i.

¹⁴Pang janah sampang atènta mi hadeppen Dèbata, kumarna idengkohken ngo karina pengidonta merguru mi lemmo atèNa.

¹⁵Jadi kerna sibettoh ngo i uèi ngo pengidonta, tahu ma mo kita jalonta ma mo barang kadè sipido baNa nai.

¹⁶Mula lot idah kènè dengan Kristen mengulaken dosa, siso pella merembah mi kemmatèen, mersodip mo kènè taba Dèbata, nai iberrèken Dèbata mo bana kenggelluhen i. Lot ngo dosa merembahken mi kemmatèen, janah ukum dosa tersèngèt mi kemmatèen i, oda ngo kudokken asa isodipken kènè bai Dèbata.

¹⁷Karinana pengellako salah, dosa ngo i, tapi lot ngo dosa siso pella merembah mi kemmatèen.

¹⁸Sibettoh ngo karina jelma sienggo gabè dukak Dèbata, oda nèngè ngo dakdak iuèi mengulaken dosa, kerna ikellini Anak Dèbata ngo ia, janah oda terkekadè Sibolis i ia.

¹⁹Sibettoh ngo bai Dèbata nai ngo rohta, tukasi pè suberri dunia èn ikuasai Sibolis.

²⁰Sibettoh ma ngo enggo roh Anak Dèbata mi dunia èn janah iberrèken ngo banta perbinettohen, asa sitandai Dèbata perbennar i. Ibagasen Dèbata perbennar i ngo kita, janah nggelluh merkitè AnakNa Jesus Kristus. Ia ngo Dèbata perbennar janah Ia ma ngo kenggelluhen siamman sumendah.

²¹Kènè alè pa, peddaoh kènè mo diri ndènè bai bègu bak sembahen idi nai.