Read Batak Dairi Perhukum 1 Bible Online

Perhukum 1 - Batak Dairi bible

Perhukum 1

¹Enggo kessa matè si Josua, mengkuso mo bangsa Israel taba JAHOWA, “Alè JAHOWA, marga pai mo bai nami nai kennah lebbèen berkat lako mengalo kalak Kanaan?”

²Ialoi JAHOWA mo, “Marga Juda. Enggo Kuberèken bai kalak i kuasa lako menaban nagerri i.”

³Nai nina marga Juda mo taba marga Simeon, “Urupi kènè mo kami lako mengalo kalak Kanaan dekket menaban nagerri sienggo itentuken JAHOWA bai nami. Asa kuurupi kami ma kènè sikalien lako menaban nagerri sinitentuken JAHOWA bai ndènè.” Nai rasken berkat mo marga Simeon,

⁴dekket Juda laus mergeraha. Janah iberèken JAHOWA mo kemenangen bai kalak i meraloken kalak Kanaan dekket kalak Feris. Radas mo sipuluh ribu kalak soridadu musuh i Bezek.

⁵Jupa kalak i mo si Adoni-Bezek, raja nagerri i, janah ijuhap mo ia.

⁶Meter mperrus mo ia, tapi ijalangi kalak i mo janah menangkupsa ninganna igettap kalak i mo kikambal tangan dekket nèhèna.

⁷Nina si Adoni-Bezek mo, “Arnia enggo kugettap kikambal tangan dekket nèhè pitupuluh raja, nai kubelli mo kalak i kipangan iba-iba panganen simerdabuhen i mèjangku nai. Bagèndari enggo ibakin Dèbata nola baku dos bagè pemakinku taba kalak i.” Nai iembah mo si Adoni-Bezek mi Jerusalem, janah matè i sidi mo ia.

⁸Ijuhap kalak Juda mo Jerusalem, nai itaban janah ilekkup mo kuta i bak ibunuhi mo pengisina.

⁹Enggo kessa i berkat nola mo kalak i menjuhap kalak Kanaan simerian i bekkas uruk-uruk, dekket kuta i pispis delleng; bagi ma dekket kalak simerian kettan ladang dakkir i Selatan,

¹⁰dekket i kuta Hebron, imo kuta sinigeraren Kiryat-Arba arnia. I sidi mo kalak Juda menaluken kalak Sesai, Ahiman bak Talmai.

¹¹I Hebron nai, berkat mo kalak Juda lako mengkubu kuta Debir, sinderrangna i mergerar Kiryat-Sefer.

¹²Sada kalak ibas marga Juda idi nai, mergerar si Kaleb mendokken katana, “Barang isè ndorok menaluken kuta Kiryat-Sefer, kupekabin mo ia dekket berrungku si Akhsa.”

¹³Italuken si Otniel, dukak dedahen si Kaleb simergerar si Kenas mo kuta idi. Nai iberèken si Kaleb mo si Akhsa, berruna i gabè perukat si Otniel.

¹⁴Ibas ari perkabinen kalak i, isessak si Otniel mo si Akhsa asa ipido sinterpuk tanoh bai bapana nai. Nai susur mo si Akhsa i kalodèna nai. Nai ikusoken si Kaleb mo tabasa kadè sèkel atèna.

¹⁵Ialoi si Akhsa mo, “Sèkel ngo aku asa lot bangku barang piga laè mul, kumerna tanoh ngkerrah ngo siniberèken bapa bangku.” Nai iberèken si Kaleb mo bana takal laè sikettan julu dekket takal laè sikettan jèhè.

¹⁶Pemparen simatua daholi si Musa, imo kalak Keni, mengèkutken kalak Juda mbungkas i Jeriko nai, kuta Kurma, janah laus mi tanoh dakkir mi selatan Arad i Juda. Merian i sidi mo kalak idi i tengah-tengah bangsa Amalek.

¹⁷Kessa i rasken dekket marga Simeon, berkat mo marga Juda idi menjuhap janah menaluken kalak Kanaan simerian i kuta Zefat. Isumpahi kalak i mo kuta i, kessa i ipetumpat, nai igerari mo kuta i Horma.

¹⁸Iurupi JAHOWA ngo kalak Juda gabè ndorok mo italuken kalak i ladang kettan delleng. Tapi oda tertaban kalak i ukum kuta Gaza, Askelon bak Ekron pè dekket nasa ladang silot i kumaliangna, kumerna bangsa simerian mengèkut-ngèkut biding laut lot ngo kurèta perang kalak i ibas bessi nai; kumerna i ngo asa oda terpuari kalak Juda kalak i.

²⁰Bagè sienggo iperèntahken si Musa, iberèken mo Hebron bai si Kaleb, kumerna enggo kin lebbèen ipuari si Kaleb sitellu horong pemparen si Enak i kuta idi nai.

²¹Kumerna i ngo asa dak tong dèng merian kalak Jebus i sidi rebbak dekket kalak Benjamin.

²²Laus mo marga Efraim bak marga Manasye pemparen si Josep mengkubu kuta Betel, sinderrangna i mergerar Lus. Janah iurupi JAHOWA ngo kalak i. Sinderrang ipasulak mata-mata mi kuta i,

²⁴pesimbak mo kalak i dekket sada kalak anak laki siroh i kuta idi nai. Nina kalak i mo tabasa, “Mula nggèut ngo kono mengurupi kami asa ndorok kami mbengket mi kuta ènda mendè pè kubaing kami taba kono.”

²⁵Nai ituduhken mo bai kalak i dalan mbengket mi kuta i. Nai ibengketti kalak Efraim bak kalak Manasye mo kuta i janah ibunuh mo karina pengisina, laènken jelma ndai i rasken dekket dukak- dukakna.

²⁶Nai mbungkas nola mo ia mi nagerri kalak Het, janah memajek sada kuta i sidi janah ibakin mo gerarna Lus. Tong dèng ngono idi gerar kuta i.

²⁷Oda ngo ipelaus marga Manasye ukum pengisi kuta Bet-Sean, Taanakh, Dor, Jibleam, dekket Megido bagi kuta-kuta sinigembarna. Asa tong ngo merian i sidi kalak Kanaan.

²⁸Tuhu enggo kessa makin tambah mergegohna kalak Israel, ipaksa kalak i mo kalak Kanaan karèjo, tapi laju ngo oda ipelaus kalak i ukum kalak Kanaan idi i sidi nai.

²⁹I kuta Gezer pè oda ma ngo ipelaus marga Efraim kalak Kanaan pengisi kuta i. Asa, kalak Kanaan pè tong dèng ngo i sidi merian rebbak dekket kalak i.

³⁰Pengisi kuta Kitron dekket Nahalol pè oda ma ngo ipelaus marga Zebulon. Kumernaken i ngo bangsa Kanaan pè tong dèng merian i sidi rebbak dekket kalak i, tapi ipaksa ngo kalak Kanaan idi mengula lako bai kalak i.

³¹Bagi mo pengisi kuta Ako, Sidon, Ahlab, Akhzib, Helba, Afek dekket Rehob pè oda ngo ipelaus marga Asyer.

³²Kumerna i ngo kalak Kanaan, sidasa tanoh i nagerri i dak tong dèng merian i sidi rebbak dekket kalak Asyer.

³³Pengisi kuta Bet-Semes dekket Bet-Anak pè oda ngo ipelaus marga Naptali. Kumerna i mo kalak Kanaan, sidasa tanoh i nagerri idi dak tong dèng merian rebbak dekket kalak Naptali. Tapi, ipaksa ngo kalak i memahan bahanen kalak Naptali.

³⁴Ukum bangsa Amori tong dèng ngo merian i Ayalon, Saalbim dekket Delleng Heres, kumerna isessak kalak i ngo marga Dan makin mi delleng, janah oda iduè susur mi singkendet. Tapi dakdak ngo isessak kalak marga Efraim bak Manasye bangsa Amori i janah ipaksa mengulaken ulaen sidua marga idi.

³⁶I utara Sela, kettan baleng tanoh kalak Amori mengelausi penangkengen Akrabim.