Read Batak Dairi Perhukum 10 Bible Online

Perhukum 10 - Batak Dairi bible

Perhukum 10

¹Enggo kessa matè si Abimelekh, gabè pengulu mo si Tola anak si Pua, lako paluahken kalak Israel. Kempu si Dodo ngo ia ibas marga Isasar nai. Merian i Samir ngo i ladang dempak delleng Efraim.

²Duapuluh tellu tahun mo dekkahna ia menguluken bangsa Israel, kessa i matè mo ia janah ikuburken i Samir.

³Enggo kessa si Tola, si Jair nola mo menguluken Israel duapuluh dua tahun dekkahna. I Gilead nai ngo asal si Jair.

⁴Lot ngo tellupuluh dukakna daholi. Lot ngo tellupuluh kalodè pasangen kalak i dekket tellupuluh kuta, i aur Gilead. Tong dèng ngo igerari kuta-kuta idi, lebbuh si Jair.

⁵Nai matè mo si Jair, janah ikuburken i Kamon.

⁶Nai balik nola mo merdosa bangsa Israel taba JAHOWA. Oda nèngè isarihken kalak i JAHOWA janah oda nèngè mersembah tabaSa. Isembah kalak idi nola mo dèbata Baal dekket Asytoret, bagi bak dèbata-dèbata bangsa Siria, Sidon, Moab, Amon dekket Palistin.

⁷Kumerna i melaga mo JAHOWA taba bangsa Israel, gabè ibelli Ia mo bangsa Palistin dekket bangsa Amon mengerajai kalak i.

⁸Sipuluh ualuh tahun dekkahna bangsa sidua i mengkia-kia karina kalak Israel simerian i Gilead, imo ladang kalak Amori kettan kebincaren Laè Jordan. Sondel ngo pendersa kalak idi taba kalak Israel.

⁹Isuberrangi kalak Amon dèng ma ngo Laè Jordan lako menjuhap marga Juda, Benjamin dekket Efraim, gabè ndersa kalohon mo iakap bangsa Israel.

¹⁰Nai tenggo-tenggo mo bangsa Israel taba JAHOWA, nina mo, “Enggo merdosa kami taba Kono, kumerna oda nèngè isarihken kami Ko, alè Dèbata nami. Gabè dèbata Baal nola ngo kusembah kami.”

¹¹Ialoi JAHOWA mo, “Arnia irajai bangsa Mesir, Amori, Amon, Palistin, Sidon, Amalek dekket bangsa Maon ngo kènè. Nai tenggo-tenggo mo kènè sidangna i lako mido urup taba Aku, otang bagi? Èngèt lebbè, otang Kupaluah ngo kènè ibas kuasa kalak idi nai?

¹³Bagidi nola pè, dak tong dèng ngo iempet kènè menondali Aku, nai laus mo kènè menembah dèbata sidèban. Bagèndari pè oda nggèut nèngè Aku lako paluahken kènè.

¹⁴Bagi mo lakè mendahi dèbata-dèbata sidèban sinipilih ndènè idi. Taba kalak i mo kènè tenggo-tenggo. Asa kalak i mengurupi kènè mula tikan posek kènè.”

¹⁵Tapi nina bangsa Israel mo taba JAHOWA, “Enggo merdosa kami, alè JAHOWA. Bakin mo barang bakunè sambing dok atèMu, asal mo iurupi Kono kami ari èn.”

¹⁶Nai ipengambongken kalak i mo karina sembahen gana-gana gabè menembah Dèbata nola. Nai melui mo atè Dèbata midah kalak i ibas keposekken i.

¹⁷Ibas katika i tupung merkebbas-kebbas ngo soridadu kalak Amon lako geraha. Merundung-undung ngo kalak i i Gilead. Bangsa Israel pè enggo mertumpu janah merundung-undung i Gilead.

¹⁸Mersungkun mo i sidi ginemgem bak pengulu marga-marga Israel tah lot ma bai kalak idi nai berrani merembah senjata lako mengalo bangsa Amon. Isè ia pang imo ipebangkit gabè pengulu karina pengisi Gilead.