Read Batak Dairi Perhukum 11 Bible Online

Perhukum 11 - Batak Dairi bible

Perhukum 11

¹Ukum si Jepta sada kalak soridadu mahantu janah berani ngo. Merian i Gilead ngo ia. Bapana mergerar si Gilead tapi inangna sada kalak sibabijalang.

²Lot dèng ngo anak bapana idi sidèban tarap bindoharana. Enggo kessa mbelgah dukak-dukakna i ipelaus kalak i mo si Jepta i sapo nai. Nina kalak i mo tabasa, “Oda lot terolih kono ibas harta tinading bapa nami, kumerna dukak tarap daberru sidèban nai ngo kono.”

³Kumerna i isirang mo si Jepta bai denganna sibeltek idi nai ninganna laus janah merian i nagerri Tob. Rebbak mo ia i sidi dekket pulungen perjahat nai laus mo kalak i menamun.

⁴Enggo kessa barang sadikè dekkah nola ikubu kalak Amon mo kalak Israel.

⁵Sidang masa idi, berkat mo simpantasniasè kalak Israel silot i Gilead janah mengarahken si Jepta menadingken nagerri Tab.

⁶Idokken kalak i mo tabasa, “Uluken mo kami mengalo kalak Amon.”

⁷Tapi ialoi si Jepta mo, “Otang ceggo kalohon ngo atè ndènè taba aku? Enggo ipelaus kènè aku i bages bapangku nai. Kasa mo bagèndari nola kessa ibagasen posek kènè, roh nola kènè mendahi aku?”

⁸Ialoi kalak idi mo, “Roh pè kami kumerna sèkel ngo kami asa kono bagèndari menguluken karina pengisi Gilead lako mengalo bangsa Amon.”

⁹Nina si Jepta mo mengaloi, “Mula iarahken kènè aku balik mi Gilead lako mengalo bangsa Amon, mula iberèken JAHOWA kemenangen banta, aku mo gabè perkuasa taba kènè.”

¹⁰Ialoi kalak i mo, “Imo tuhu. JAHOWA mo saksina.”

¹¹Nai berkat mo si Jepta rasken dekket nasa pengulu Gilead. Nai kessa i ipebangkit pengisi Gilead mo ia gabè pengerajai janah pengulu. Janah i hadeppen JAHOWA i Mispa, idokken si Jepta mo ranana taba pengisi Gilead.

¹²Enggo kessa i ipasulak si Jepta mo kalak mendahi raja Amon lako mendokken bagèen, “Kadè ngo salah nami asa dak ijuhap kènè nagerri nami?”

¹³Ialoi raja bangsa Amon mo suruhen idi, “Tikan roh bangsa Israel i Mesir nai, ilaum kalak i ngo tanoh nami, mulai i Laè Arnon nai soh mi Laè Jabok bak Laè Jordan. Bagèndari pè ulaken mo idi ibagasen damè.”

¹⁴Nai ipasulak si Jepta nola dèng ma mo kalak pasulakkenna mendahi raja Amon,

¹⁵lako mengaloi bagèen, “Oda lot irampasi bangsa Israel tanoh kalak Moab, barang pè tanoh kalak Amon.

¹⁶Sinderrang itadingken kalak Israel tanoh Mesir, ituju kalak i ngo mi teluk Akaba arap padang gurun nai soh mi Kades.

¹⁷Kessa i ipasulak kalak idi mo kalak mendahi raja Edom lako mengido ijin memellus nagerrina. Tapi oda iduè kalak i arap i. Kessa i bagi ma mo ipengidoken taba raja Moab, tapi ia pè oda ma ngo iduè kalak i memellus arap nagerrina. Kumerna i merian mo bangsa Israel i Kades.

¹⁸Kessa i nola iterrusken kalak i mo merdalan tarap padang pasir, tapi oda ngo arap nagerri Edom dekket Moab, tapi gabè muat dalan merkuliling nola ngo gabè soh mi kebincaren Moab, i kèparen Laè Arnon. Ibahan kalak i mo sapo-sapona i sidi, tapi oda ngo isuberrangi laè idi, kumerna termasuk nagerri Moab ngo ladang i.

¹⁹Enggo kessa i ipasulak bangsa Israel mo kalak mendahi si Sihon, raja Amori i Hesybon lako mengido ijin memellus nagerri Amori, kumerna naing laus mi nagerri kalak i sendiri ngo kalak i.

²⁰Tapi oda iduè si Sihon kalak i, kumerna oda tok ia pellin memellus sambing kessa kalak i. Baliksa nola gabè ipedempu mo karina balapergunggungna nai mermarkas i Jahas nai ijuhap mo kalak Israel.

²¹Tapi JAHOWA, Dèbata Israel, merèken kemenangen bai bangsa Israel meraloken si Sihon bak balapergunggungna. Bagidi mo dalanna bangsa Israel menaban karina tanoh kalak Amori simerian i nagerri idi.

²²Itaban kalak i mo nagerri Amori i mulai i Arnon nai kettan Selatan, soh mi Utara Laè Jabok, dekket i padang gurun kan kebincaren nai, soh mi Laè Jordan kettan kesunduten.

²³Asa JAHOWA, Dèbata Israel, i ngo pelausken kalak Amori mahan keperluen bangsa JAHOWA.

²⁴Jadi bagèndari pè naing ngo buatenmu katèmu balik? Ukum tanoh siniberèken dèbata Kamos, dèbata ndènè idi, taba kènè ndorok ngo tong hot bai ndènè. Tapi kadè sienggo iberèken JAHOWA, Dèbata nami taba kami, kennah kupertahanken kami ngo.

²⁵Idok kono ngo lotien dèng ko daripada si Balak anak si Zipor, raja Moab? Ukum si Balak oda nung mengula barang pè mergeraha dekket kami.

²⁶Tellu ratus tahun dekkahna Israel mengiani Hesybon dekket Aroër bagi ma sosor silot i sikulilingna, dekket karina kuta sinibiding Laè Arnon. Kasa sidekkahna èn oda ibuat kono i balik?

²⁷Sandok oda lot i, oda lot salah kami taba kono. Kono ngo salah kumerna ijuhap kono kami. JAHOWA mo merhukum simemutusken ari sidari èn perkara ènda bai bangsa Israel dekket bangsa Amon.”

²⁸Tapi oda isarihken si Amon tennah si Jepta idi.

²⁹Kessa i isenggeppi Tendi JAHOWA mo si Jepta. Nai laus mo si Jepta mendahi ladang Gilead bak Manasye kessa i balik mi Mizpa i Gilead. I sidi nai nola iterrusken mo perdalanenna dempak ladang bangsa Amon.

³⁰Merpadan mo si Jepta bai JAHOWA, “Mula iduè JAHOWA ngo aku menaluken kalak Amon,

³¹janah njuah-njuah aku balik jadi barang isè sambing perlebbè karuar i bagesku nai lako kihalopken aku, kupèlèken ngo i mahan pèlèen situtungen bai JAHOWA.”

³²Nai isuberrangi si Jepta mo Laè Jordan lako menjuhap kalak Amon, janah mennang mo ia ibakin JAHOWA.

³³Ikubu si Jepta mo kalak i habis-habisen i Asyer nai soh mi ladang i sikuliling Minit — karinana lot ngo duapuluh kuta — janah sakat mi Abel-Keramim daohna. Mèduk kalohon ngo kalak Amon matè, gabè talu mo kalak i meradepken kalak Israel.

³⁴Tikan balik si Jepta mi Mispa, mèter roh mo berruna menghalopkensa ninganna tumatak bak memalu gendang. Pellin sada i ngo kessa berruna.

³⁵Isi mènter idah si Jepta kessa ia, gabè bonek kalohon mo ukur si Jepta dungna iribaki mo geddana ninganna mendokken, “Nong alè berrungku, melalana i atè-atèngku! Kasa nola kennah kono memakin melui atè-atèngku? Enggo merbulaban aku bai JAHOWA, janah mak ndorok nèngè kusondari.”

³⁶Nai nina simerbaju idi mo taba si Jepta, “Enggo merbulaban bapa bai JAHOWA, janah enggo iduè JAHOWA bapa memales kejahaten kalak Amon, musuh bapa idi. Jadi kadè kin sienggo nipadanken bapa, kennah ngo pesauten bapa.”

³⁷“Pellin èn,” nina simerbaju idi menguduti, “lot sada pengidoenku: Paduè mo aku laus dua bulan lako merdalan-dalan rasken dekket dengan-denganku i delleng. I sidi mo kutangisken nasipku, kumerna matè mo aku keppèken bajar-bajar dèng.”

³⁸Iuèi bapana mo pengidonna i ipeberkat mo laus. Laus mo berruna idi dekket dengan-denganna mi delleng lako tangis melui i sidi, kumerna matè nèngè mo ia sinderrang mak dèng sijahè janah merdukak.

³⁹Enggo kessa pul dua bulan, balik mo ia mendahi bapana, nai ibakinken bapana mo kadè sienggo niperbagahna kin taba JAHOWA. Asa matè mo simerbaju idi sinderrang bajar-bajar dèng. I sidi nai mo mulai somal bai kalak Israel,

⁴⁰gennep simerbaju laus mi Gilead empat ari gennep tahun lako marsak mernèngèt berru si Jepta.