Read Batak Dairi Perhukum 12 Bible Online

Perhukum 12 - Batak Dairi bible

Perhukum 12

¹Ibas katika i kebbas mo marga Efraim lako geraha, nai isuberrangi kalak i mo Laè Jordan menuju mi Zafon. Idokken kalak i mo taba si Jepta, “Kasa kono laus menjuhap bangsa Amon oda iarahken kono kami? Bagèndari pè tutungen nami mo kono bak pengisi bagesmu.”

²Mongkam mo si Jepta, “Lot ngo persilisihen mahantu i tengah-tengah kalak Amon dekket kami kalak Gilead. Enggo ngo kudiloi kènè lako mengurupi paluahken aku bai kalak Amon nai, tapi oda roh kènè.

³Asa enggo kessa sèk atèngku oda nèngè roh kènè lako mengurupi aku, kujuljulken mo laus mengalo kalak Amon idi, agia nola pè kennah matè aku. Nai mennang mo aku ibakin JAHOWA meraloken kalak i. Bagèndari pè kasa nola kènè roh lako menjuhap aku?”

⁴Kessa i ipepulung si Jepta mo karina kalak Gilead, nai juhap janah italuken kalak i mo kalak Efraim. Ukum kalak Gilead simerian i Efraim dekket Manasye enggo isangko kalak Efraim ia kalak i enggo pejaèken dirina ipas Efraim margana nai.

⁵Iiani kalak Gilead sienggo tupung mergeraha i ngo bekkas penuberangen i Laè Jordan, asa ndorok iambat kalak Efraim sinaing mperrus. Mula tikan lot sada kalak Efraim, naing katèna mperrus, nai mengido ijin lako suberrang, ikusoken kalak Gilead mo tabasa, “Tah mada ngo kalak Efraim ko?” Mula ialoi, “Oda,”

⁶idokken kalak i mo ia lako mendokken kata “Syibolet.” Iruapken mo “Syibolet” kumerna oda ngo ndorok pandè ia lako mendokken kata i dekket selloh. Nai itangkup kalak i mo ia janah ibunuh i sada bekkas penuberangen laè i. Jadi terbunuh mo 42.000 kalak Efraim tikanna idi.

⁷Ennem tahun mo dekkahna si Jepta menguluken kalak Israel. Kessa i matè mo ia nai ikuburken mo i kutana imo i kuta Mizpa i Gilead.

⁸Enggo kessa si Jepta, gabè si Ebzan kan Betlehem nai nola mo menguluken bangsa Israel.

⁹Lot ngo tellupuluh anak si Ebzan dekket tellupuluh berruna. Ipejahèken ngo berruna i taba kalak marga sidèban, janah iririt ma mo tellupuluh simerbaju i marga sidèban nai mahan sinibages anakna idi. Pitu tahun dekkahna si Ebzan menguluken bangsa Israel,

¹⁰kessa i matè mo ia janah ikubur i Betlehem.

¹¹Enggo kessa si Ebzan, si Elon marga Zebulon nola mo menguluken bangsa Israel sipuluh tahun dekkahna.

¹²Kessa i matè mo ia nai ikubur mo i Ayalon i ladang kalak Zebulon.

¹³Kessa si Elon, si Abdon anak si Hilel i Piraton nai nola mo menguluken bangsa Israel.

¹⁴Lot ngo empatpuluh kalak dukakna daholi, dekket tellupuluh kalak kempuna daholi. Gennep ngo kalak i lot sada kalodè pasangenna. Ualuh tahun ngo dekkahna bangsa Israel iuluken si Abdon.

¹⁵Kessa i matè mo ia nai ikubur mo i Piraton i tanoh Efraim kan delleng ladang kalak Amalek.