Read Batak Dairi Perhukum 13 Bible Online

Perhukum 13 - Batak Dairi bible

Perhukum 13

¹Nai merdosa nola mo kalak Israel taba JAHOWA, nai ibelli JAHOWA mo kalak Palistin mengerjai kalak i sidekkah empatpuluh tahun.

²Ibas katika i lot mo sada kalak anak laki i kuta Zora. Gerarna si Manoah, i marga Dan nai. Gempus ngo sinibagesna.

³Tapi tikan sidari ipeteridahken malaèkat JAHOWA mo dirina tabasa janah mendokken, “Sidekkahna èn oda ndorok ko merdukak, tapi oda ndekkah nèngè mengkandong mo ko, janah menubuhken sada anak.

⁴Kumerna i jaga mo dirimu selloh. Ulang ko mengènum anggur barang pè mengènum simperngis, barang kipangan barang kadè pantangen.

⁵Enggo kessa tubuh anakmu idi, mak ndorok igonting kono bukna, kerna mungkah i kurungen manik nai enggo itentuken ia gabè kalak merpantang. Ia ngo luas juhap lako paluahken bangsa Israel ibas kuasa kalak Palistin nai.”

⁶Kessa i laus mo sinibages si Manoah mendahi sinibalèna janah mendokken tabasa, “Lot ngo ndai utusen Dèbata roh taba aku; rupana tosè bagè malaèkat Dèbata, gabè sanga ngo aku mbiar. Oda lot kukusoken barang i dikè nai ia roh, janah ia pè oda ma ngo ibagahken gerarna taba aku.

⁷Tapi idokken ngo, ukum aku naing mengkandong ngo janah menubuhken sada dukak daholi. Janah idokken nola dèng ma oda ndorok kuènum anggur barang pè ènumen mperngis, barang pè kipangan barang kadè sambing pantangen, kumerna kennah isohken ngo anak i bai Dèbata gabè sada kalak merpantang sidekkah nggelluhna.”

⁸Mendengkoh i, mersodip mo si Manoah taba JAHOWA, bagèen, “Ialè JAHOWA, uè dèng ma mo Ko nemmu pasulakken naposoMu idi mendahi kami lako magahken kadè sikennah bakinen nami taba anak i enggo kessa ia tubuh.”

⁹Ibegèken Dèbata ngo pengidoen si Manoah. Roh nola mo balik malaèkat JAHOWA idi sinderrang tupung kundul-kundul sinibages si Manoah i juma. Ibas katika i oda i sidi sinibalèna.

¹⁰Jadi, lojang mo ia memagahken simasa i tabasa, “Kalakè, tengen mo lebbè, enggo roh nola, kalak siroh tikanna i mendahi aku.”

¹¹Mènter mo ièkutken si Manoah sini- bagesna i. Ijolmiti mo jelma i janah mengkusoken, “Kènè ngo simerembah berita taba sinibagesku?” “Aku ngo i tuhu,” nina mengaloi.

¹²Nai ikuso si Manoah nola mo, “Mula enggo saut kaduan kadè sinidokken ndènè idi, kadè ngo sikennah ulaenken anak idi? Bakunè ngo nggelluhna luas?”

¹³Ialoi malaèkat JAHOWA idi mo, “Oda ndorok sinibagesmu mengènum anggur barang mengènum simperngis janah oda ndorok kipangan barang kadè simerasal i batang anggur nai, barang pè kadè pantangen. Kennah ngo ia mengulaken karina sienggo kudokken tabasa, janah menjaga asa ulang lot siso mak iulaken.”

¹⁵Nai nina si Manoah mo tabasa, “Uè mo kè nemmuken memèma sinempas. Kulasken kami mo lebbèken kambing bajar bai ndènè.”

¹⁶Tapi idokken malaèkat JAHOWA idi mo, “Agia nola pè kupèma i sènda, ulang kono harap kupangan kadè sinipehantarmu idi nahan. Tapi, mula naing hantarenmu nai ngo katèmu, hantari mo idi mahan pèlèen situtungen, janah pèlèken mo bai JAHOWA.” Oda satdar dèng si Manoah ia simengerana idi dekketsa imo malaèkat JAHOWA. Asa nina mo, “Mula bagi, uè mo giam nemmuken kènè memagahken gerar ndènè, asa mula saut sinidokken ndènè idi luas, asa ndorok kami pesangapken kènè.”

¹⁸Nai mengkuso mo malaèkat JAHOWA idi, “Kadè ngo sebabna asa sèkel kono memettoh gerarku? Ukum gerarku, kelengangen ngo idi.”

¹⁹Nai ibuat si Manoah mo sada kam- bing bajar dekket situk pagè, nai ibakin mo i babo batu janah ipèlèken taba JAHOWA, imo JAHOWA simenghanaken kelengangen.

²⁰Tikan lakat api mi babo i langgaten idi nai idah si Manoah bak sinibagesna i mo malaèkat JAHOWA idi laus mi dates arap dilah api idi, menuju mi langit. I sidi mo asa satdar si Manoah Malèkat JAHOWA ngo keppèken idi; nai sujud mo ia dekket sinibagesna mersembah. Kessa i oda nung nèngè kalak i mengidah malaèkat idi.

²²Nai nina si Manoah mo taba sinibagesna i, “Matè mo kita keppèken kerna enggo iidah Dèbata.”

²³Ialoi sinibagesna i mo, “Mula naing ibunuh JAHOWA kin ngo kita, pasti oda uè Ia menjalo pèlèen sienggo sipèlèken baNa idi, bagi ma oda bagahenkenNa karinana simasa ènda taba kita barang pè menukutken bagè sienggo niranakenNa i taba kita.”

²⁴Kessa barang piga-piga bulan nai nola ketaring janah menubuhken sada anak mo sinibages si Manoah idi nai ibakin mo gerarna si Simson. Makin mbelgah mo anak i janah ipasu-pasu JAHOWA;

²⁵janah sinderrang merian i perundung-undungen marga Dan, silot i kellang-kellang Zora dekket Esytaol ia, tubenna mo Tendi JAHOWA memerèken gegoh tabasa.