Read Batak Dairi Perhukum 14 Bible Online

Perhukum 14 - Batak Dairi bible

Perhukum 14

¹Tikan sidari laus mo si Simson mi Timna, janah idah mo sada kalak simerbaju kalak Palistin i sidi.

²Nai balik mono ia janah mendokken taba partuana, “Kelleng ngo atèngku midah sada kalak simerbaju berru Palistin i Timna. Pengidoenku taba ko Pa dekket ko nangè lakè mo ririt kènè ia.”

³Tapi nina partuana idi mo, “Kasa nola mo kennah laus mendahi kalak Palistin lako memuat berru, salang kalak i pè oda ngo bangsa JAHOWA? Oda nèngè ngo lot ibas horongta nai sendiri barang pè ibas karinana bangsanta nai sada kalak simerbaju cocok iakap ko?” Ialoi si Simson mo bai bapana i, “Tapi berru kalak Palistin i ngo ngkelleng atèngku. Janah harap ngo aku uè bapa mengeriritsa lako baku.”

⁴Oda ibettoh partua si Simson magahken JAHOWA ngo maingken si Simson mendokken bagidi. Kumerna sidang petokoken katikana ngo JAHOWA lako menjuhap kalak Palistin. Ibas katika i irajai kalak Palistin ngo kalak Israel.

⁵Nai laus mo si Simson mi Timna rebbakken dekket partuana. Sinderrang mengelausi sinterpuk pekken anggur kalak i, pejumpa mo si Simson dekket sada anak singa. Merngaor mo singa idi,

⁶nai sintempu mènter ipergegohi kuasa JAHOWA mo si Simson. Nai ipersuragè mo singa idi dekket tanganna, bagè sada kambing sambing. Oda pella ibagahken i taba partuana.

⁷Kessa i idahi nola mo simerbaju i ninganna mengerana-ranai dekketsa, janah ngkelleng ngo atè si Simson tabasa.

⁸Enggo kessa barang sadikè dekkahna, laus nola ma mo si Simson lako jejap bai simerbaju idi. Nderrang merdalan i sumirpang mo ia singgah menengen bangkè singa sienggo nibunuhna idi. Kessa soh ia mi sidi itengen mo mbuè kalohon renggicing ibagasen rangrang bangkè i, janah lot ma tenggolina.

⁹Ipelluk mo tenggoli i merkitè tanganna, nai terrus mo ia merdalan ninganna kipangani tenggoli idi. Nai kessa i laus mo ia mendahi partuana janah iberrèken mo dèba tenggoli idi bai kalak i, janah ipangan kalak i mo. Tapi oda ngo ibagahken si Simson ia tenggoli idi ibuat ibas bangkè singa nai.

¹⁰Enggo kessa laus bapa si Simson mi sapo simerbaju i, ibaing si Simson mo pèsta i sidi, kumerna bagi ngo ketcemalen kalak simatah daging.

¹¹Sinderrangna idah kalak Palistin ia, ipilih kalak i mo tellupuluh kalak anak perana lako mendenganisa.

¹²Nai idokken si Simson mo taba kalak i, “Lot ngo koning-koningenku. Mula ndorok ibettoh kènè, kuberrè mo kènè tersirambar kain linen halus dekket tersimpasang pakèen merandal. Kuberèken mo bai ndènè tikki pitu ari sidekkah pèsta jejap ènda, lako memagahken taba aku.

¹³Tapi mula oda ngo ndorok dapet kènè, kènè nola mo karina kennah memerèken bangku kain linen halus dekket simpasang pakèen merandal.” Nai idokken kalak Palistin idi mo, “Toko! Bagèndari pè ruapken mo koning-koningen idi.”

¹⁴Nai nina si Simson mo, “Karuar ngo pangaen bai sikipangan nai. Karuar sintenggi, bai simergegoh nai.” Enggo pè ilausi tellu ari oda lot dèng kalak i ndorok memettoh lapaten koning-koningen i.

¹⁵Nai i ari peempatken idokken kalak i mo taba sinibages si Simson, “Kennah mo ko mengèlèk-ngèlèk sinibalèmu i asa uè ia memagahken bai nami lapaten koning-koningen idi. Mula oda ko uè, kulekkup kami mo ko bak karina kènè sisimpangaen. Rupana idilo kono kami asa lako salpun ngo keppè harta nami.”

¹⁶Kumerna i, laus mo sinibages si Simson mendahi si Simson ninganna tangis idokken mo, “Kubettoh ngo oda keppè ngkelleng atèmu baku. Kasa mo ibakinken kono koning-koningen taba dengan-denganku, tapi oda ibagahken kono kadè lapatenna taba aku? Pana ceggo ngo atèmu baku!” Nina si Simson mo, “Pèma mo lebbè! Salang bai partuangku sendiri pè oda kubagahken, kasa nola mo bamu kennah bagahenkenku?”

¹⁷Sidekkah pitu ari pèsta idi pukpuk dak tangis sambing sinibages si Simson idi: Janah kumerna dak pukpuk ia merngengngeng, nai i ari pepituken, ibagahken si Simson mo lapaten koning-koningen idi tabasa. Nai ibagahken sinibages si Simson idi mo taba kalak Palistin.

¹⁸Asa, sinderrang makdèng sundut mataniari ari pepituken idi, idokken kalak sinikuta idi mo taba si Simson, “Kadè mo tenggien daripada tenggoli nai? Janah kadè nola dèng tergegohen daripada singa?” Ialoi si Simson mo, “Mula oda kin iperalat kènè sinibagesku, oda dapet bettohen ndènè lapaten koning-koningen idi!”

¹⁹Mènter sintempu mo si Simson gabè ipergegohi kuasa JAHOWA, nai laus mo ia mi Askelon. Ibunuh mo i sidi tellupuluh kalak anak laki simerpakèen merandal. Ibuat mo pakèen kalak i janah kiberèken bai sitellupuluh kalak sienggo ndorok menerka lapaten koning-koningenna i. Kessa i, balik mo ia mi sapona ibagasen mbatdal.

²⁰Nai ipejahèken simatuana mo sinibages si Simson i bai anak-anak kèla si Simson tikan perunjukna i.