Read Batak Dairi Perhukum 15 Bible Online

Perhukum 15 - Batak Dairi bible

Perhukum 15

¹Daoh-daoh ariin nola, tikan mosin peranien, laus mo si Simson mendahi sinibagesna i. Iembah mo sada kambing bajar lako bai sinibagesna i. Idokken si Simson mo taba simatuana daholi, “Naing ngo katèngku lebbè mi bilik lako pejumpa bak sinibagesku.” Tapi roh mo simatuana daholi i oda iduè.

²Idokken mo taba si Simson, “Kudok ngo tuhu-tuhu enggo nceggo atèmu bana, asa, enggo kupejahèken nola ia bai anak-anak kèla tikanna i. Tapi ndorok ngo anggina i nola bamu. Mberruèn ma ngo ia.”

³Nai idokken si Simson mo, “Barang kadè kubakin taba kalak Palistin sikali èn, oda nèngè salahku i.”

⁴Nai laus mo ia menangkup tellu ratus sorigala. Ipudun mo dua-dua uit sorigala idi. I punca pemudunen uitna i ibakin mo obor.

⁵Enggo kessa i ilakati mo obor-obor i ninganna ipaluah mo sorigala-sorigala idi mi juma kalak Palistin. Melekkup mo karina pagè sienggo iperani sinibunbunken i sidi. Janah dekket ngo melekkup suan-suaen pagè bak pekken-pekken anggur pè.

⁶Laus mo kalak Palistin memerèso barang isè pegana-gana idi. Nai ibagahken dèba mo taba kalak i, si Simson ngo memaingken i kumerna simatuana i Timna enggo pejahèken sinibages si Simson taba anak-anak kèla si Simson. Kumerna i ilekkup kalak Palistin mo daberru idi bagi dekket pengisi bages bapana soh tumpat.

⁷Nai nina si Simson mo taba kalak Palistin i, “O, patut mo katè ndènè bagidi pemahan ndènè i? Kusumpahken mo oda kom bagi sambing aku mula mak dèng kubalesken simasa èn taba kènè.”

⁸Nai ijuhap mo kalak i mertuhu-tuhu janah ibunuh mo nterrem kalak i. Enggo kessa i, laus mo ia nai merian mo ia ibas liang i sada delleng batu i Etam.

⁹Nai roh mo kalak Palistin mi tanoh Juda ninganna merundung-undung i sidi, kessa i ikubu mo kuta Lehi.

¹⁰Nai ikusoi kalak Juda mo kalak Palistin, “Kasa ikubu kènè kami?” Ialoi kalak i mo, “Roh kami lako menangkup si Simson ngo asa kubakin kami bana bagè pemakinna taba kami.”

¹¹Mendengkoh i, laus mo 3.000 kalak Juda mi liang sini delleng batu Etam. Idokken kalak i mo i sidi taba si Simson, “Alè Simson, oda ngo ibettoh kono magahken kalak Palistin ngo merkuasa banta? Bakunè ngo pemaingmu èn taba kami!” Ialoi si Simson mo, “Pellin memales pemaing kalak i taba aku ngo kessa aku.”

¹²Nina kalak i mo, “Roh pè kami lako mengèkèti janah pesakatken kono ngo taba kalak Palistin.” Idokken si Simson mo, “Bulabanken kènè mo lebbèken magahken oda bunuhen ndènè aku.”

¹³“Selloh,” nina kalak i, “pellin mengèkèti janah pesakatken kono taba kalak Palistin ngo kessa kami. Oda ngo bunuhen nami kono.” Nai ièkèt kalak i mo ia dekket dua tinali rimbaru dèng, janah merembah laus i liang idi nai.

¹⁴Tikan iiring kalak i si Simson sakat mi Lèhi, merlojangen mo kalak Palistin mendapetkensa ninganna menurakisa. Nai sintempu mo ia gabè mergegoh ibakin kuasa JAHOWA. Ipengerettesken mo tinali simengèkèti tanganna idi bagi sambing kalih kin bagè merampek tinali i.

¹⁵Nai jumpasa mo sada tulan isang-isang kalodè rimbaru dèng. Ibuat mo tulan-tulan idi, nai imo ibakin lako memalu 1.000 kalak sampè matè.

¹⁶Nai merendè mo si Simson, “Merkitè isang kalodè, enggo kurabbatken seribu kalak; merkitè isang kalodè, kupegukguk bengkè-bangkè kalak i.”

¹⁷Enggo kessa i, iambongken mo tulan-tulan isang i. Kumerna i mo bekkas idi igerari Ramat-Lehi.

¹⁸Nai muasen kalohon mo iakap si Simson, nai tenggo-tenggo mo ia taba JAHOWA. Nina mo, “Ialè JAHOWA, idèng iberèken Kono kemenangen mbellen èn taba aku. Bagèndari pè, kennah ngo aku matè muasen, asa itangkup kalak Palistin siso menandai Kono èn aku?”

¹⁹Nai ipulka Dèbata mo lubang sini delleng batu i Lehi i, nai menjarir mo laè i sidi nai. Mènum mo si Simson, nai melamlam mo iakap balik. Kumerna i ngo asa igerari laè mul idi Laè Mul Hakor. Tong dèng ngo lot mata mul idi i Lehi.

²⁰Duapuluh tahun mo dekkahna si Simson menguluken bangsa Israel tikanna irajai kalak Palistin kalak i.