Read Batak Dairi Perhukum 16 Bible Online

Perhukum 16 - Batak Dairi bible

Perhukum 16

¹Tikan sidari laus mo si Simson mi kuta Gaza, pejumpa mo ia i sidi bak sada kalak daberru sibabijalang, nai laus mo ia meddem rebbak daberru idi.

²Nai idengkoh pengisi kuta Gaza mo i sidi ngo si Simson. Nai, ikulilingi kalak i mo bekkas idi janah ipèma mo ia suntuk bernginna i i pengkeruhen kuta i. Tapi oda ngo lot kadè ibakin kalak i bernginna i kumerna dok atè kalak i, “Nahan enggo kessa mbincar mataniari pè, asa sibunuh ia.”

³Tapi oda ngo i sidi si Simson meddem soh mi siceggen. Ndungo ngo ia tengah bernginna idi nai laus mi pèntu pengkeruhen kuta i. Iberkat mo pèntu kuta idi karina rasken gerruk-gerukna karinana. Nai ipersanken mo pèntu idi mi babo barana, janah merembah mi babo uruk sinikèparen kuta Hebron.

⁴Kessa i ngkelleng mo atè si Simson taba sada kalak daberru i Napa Sorek. Gerar daberru idi imo si Delila.

⁵Nai roh mo lima kalak perkuasa Palistin mendahi daberru idi janah mendokken, “Ajar-ajari mo si Simson asa uè ia memagahken bamu kadè ngo rusia kegegohenna i, janah bakunè carana mengagoken gegohna i. Merkitè bagi ndorok mo kami roh lako mengèkèti bak menalukensa. Kuberèken kami pè sikali èn bamu terseribu seratus kèpèng pirak.”

⁶Nai nina si Delila mo taba si Simson, “Alè Simson, kadè ngo memakin asa bagi gegohmu? Kennah kadè ngo ibaing pengèkètimu, asa mago gegohmu i? Bagahken mo lebbèken baku.”

⁷Ialoi si Simson mo, “Mula ièkèti aku dekket pitu tinali jarat janah madèng ngkerrah kalohon, gabè ndalmeh mo aku janah gabè tosè bagè jelma biasa.”

⁸Nai iberèken perkuasa kalak Palistin i mo bai si Delila pitu tali jarat rimbaru siso ngkerrah kalohon dèng. Kessa i, sinderrangna memèma kalak Palistin i bilik tengah sidèban, ièkèti si Delila mo si Simson bak tinali-tinali idi ninganna menenggoken, “Simson! Enggo roh kalak Palistin!” Mèter ipengerettesken si Simson mo tinali-tinali jarat idi. Merposteppen mo tinali i tosè bagè bennang merontang ibaing api. Oda mo terbettoh dèng rusia kegegohen si Simson.

¹⁰Nai nina si Delila mo taba si Simson, “Ah, luap ngo ko keppè. Kipergait-gaitken aku sambing ngo ko keppè. Kettu mo, bagahken mo baku merkitè kadè ngo asa ndorok kono èkèten!”

¹¹Ialoi si Simson mo, “Mula ièkèti aku bak tinali rimbaru siso nung dèng ipakkè, ndotè mo aku janah gabè tosè jelma biasa.”

¹²Sinderrang mèma kalak Palistin i bilik sidèban, ibuat si Delila mo barang piga-piga tinali rimbaru, nai ièkèti mo si Simson. Kessa i mersurak mo ia, “O Simson! Enggo roh kalak Palistin!” Tapi ipengerettesken si Simson mo tinali tinali idi i tanganna nai tosè bagè kalak memostepken bennang.

¹³Nai nina si Delila mo taba si Simson, “Ah, tong dèng ngo ipergait-gaitken kono aku! Luap ngo ko. Iah mo, bagahken mo merkitè kadè ngo kono ndorok èkèten!” Ialoi si Simson mo, “Mula pitu nggolongen bukku sinidandan bègu i italiken mi bennang pertenunen, nai irakutken mi kayu pertenunen idi, gabè ndotè mo aku janah gabè tosè bagè jelma biasa.”

¹⁴Nai ibakin si Delila mo si Simson terpeddem nai idandan mo sipitu nggolongen buk si Simson i mi bennang pertenunen. Enggo kessa bagidi irakut mo mi kayu pertenunen idi, ninganna menenggoken, “O Simson! Enggo roh kalak Palistin!” Ndungo mo si Simson ninganna iruntun mo bukna gabè ntalkas mo ibas pertenunen idi nai.

¹⁵Nai kessa i idokken si Delila mo tabasa, “Uè, idokken kono mo kelleng atèmu baku keppèken ndaoh ngo ukurmu baku nai! Enggo mo petellu kali èn aku ipergait-gaitken kono, janah sakat bagèndari oda uè kono memagahken kasa bagidi mergegohna kono.”

¹⁶Gennep ari pukpuk mo mengobok-ngobok si Delila janah isessak, gabè pèahen mo si Simson mendengkoh.

¹⁷Ujungna ibagahken si Simson mo rusiana. “Oda nung dèng igettap bukku,” nina si Simson. “Enggo isohken aku bai Dèbata gabè milikna sinikelinen. Kessanai tubuh enggo gabè kalak merpantang aku. Mula igonting bukku, mago mo kegegohenku; ndotè mo aku janah tosè bagè jelma biasa.”

¹⁸Irasaken si Delila enggo mo ibagahken si Simson saut rusia sinibagasen ukurna. Kumarna i itennahken mo berita ènda taba perkuasa-perkuasa Palistin, “Roh mo kènè sikali èn nai. Enggo mo ibagahken si Simson rusiana taba aku.” Roh mo kalak idi janah merembah riar bai si Delila.

¹⁹Enggo kessa bagi icoling-coling si Delila mo si Simson soh terpeddem i abing-abingenna, nai idiloi mo kalak janah idokken lako menggonting pitu nggolongenna buk si Simson. Kessai ipekia-kia mo si Simson, kumerna enggo mago kegegohenna.

²⁰Nai mersurak mo ia, “O Simson! Enggo roh kalak Palistin!” Ndungo mo si Simson janah idokdok dèng mo ia ndorok mpellut bagè sienggona. Oda ibettoh enggo itadingken JAHOWA ia.

²¹Nai itangkup kalak Palistin mo ia janah icokil anak matana. Iembah kalak i mo ia mi Gaza janah mengèkètsa bak dua rantè tembaga, nai ipebengket mo ia mi bagasen kurungen. I sidi mo ibaing ulaenna menutu.

²²Tapi sidekkah i sidi ma mo tubenna nola tubuh bukna mengolihi.

²³Tikan sidari mertumpu mo karina perkuasa kalak Palistin lako merpèsta janah memèlèken pèlèen mertuhu-tuhu bai Dagon, dèbata kalak i. Merendè mo kalak i, “Enggo iberèken sembahenta banta kemenangen meraloken si Simson, musuhta idi!”

²⁴Sinderrangna meroang-oang idi kalak i, idokken kalak idi mo, “Embah kènè mo si Simson misènda, asa sibaing gabè mahan pertaba-tabaenta.” Nai ialengi kalak i mo ia cènder i kellang-kellang dua tihang mbellen. Idah jelma nterrem idi kessa mo si Simson, ipoji kalak i mo Dèbata Dagon janah merendè, “Enggo iberèken sembahenta taba kita kemenangen meraloken musuh sienggo mencèdai nagerrinta janah simemunuh bagidi buèna horongta!”

²⁶Idokken si Simson mo taba anak-anak daholi simenegunegusa i, “Osari mo tanganku asa ndorok kujamah tihang-tihang pandak dangaen bages ènda, kerna naing ngo aku katèngku tunandè i sidi.”

²⁷Dom sessak merpenjet-penjet jelma i bages idi. I sidi ma ngo limana perkuasa kalak Palistin. Janah i langit-langit bages idi lot ngo kira-kira 3.000 kalak buèna. Karina ngo kalak i menonton janah mengerèhè si Simson.

²⁸Tupung katika i mersodip mo si Simson; nina mo, “Ialè, JAHOWA Sintèmbul i, dak uè mo Ko mernèngèt aku. Berèken nola mo gegoh bangku giam sikali ènda nai sambing pè, alè Dèbata, asa merkitè pemaing ènda ndorok aku memales bai kalak Palistin sienggo mencokil duana anak matangku.”

²⁹Enggo kessa bagi ikaol si Simson mo binangun sidua sinitengah dangaen bages i. Nai ninganna menulakken dekket tangan kambirang mi binangun sisada janah tangan kamuhunna mi binangun sisada nai,

³⁰itenggoken mo, “Barang matè aku rasken kalak Palistin ènda!” Merkitè nasa tuk gegohna, itulakken mo binangun-binangun i gabè mbulak mo janah mendempang perkuasa kalak Palistin silima i rasken jelma nterrem sidèbanna silot i sidi. Matè ma mo bak si Simson. Tapi buèen ngo ibunuh tikan permatèna idi daripada sinderrang nggelluhna dèng.

³¹Enggo kessa bagidi merrohen mo kaka-anggina dekket karina sincelketna lako mengaleng bangkèna. Iembah kalak i mo bangkèna idi, janah ikuburken ibas pendèbaen si Manoah, bapana. Ia pendèbaen i imo i kellang-kellang Zora dekket Esytaol ngo. Duapuluh tahun mo dekkahna si Simson gabè pengulu Israel.