Read Batak Dairi Perhukum 17 Bible Online

Perhukum 17 - Batak Dairi bible

Perhukum 17

¹Lot mo sada kalak anak laki mergerar si Mika. Merian i uruk aur Efraim ngo ia.

²Tikan sidari idokken mo taba inangna, “O nangè, tikan kembalangen kèpèng inang seribu seratus kèpèng pirak, kudengkoh ngo isumpahi kono simenangko i. Enda ngo nangè kèpèng i! Aku ngo memuat.” Ialoi inangna idi mo, “Katerra pè ipasupasu JAHOWA mo ko alè pa!”

³Ibalikken si Mika kessa mo kèpèng i taba inangna, nai nina inangna i mo, “Asa maluah kono alè pa, ibas sumpah sienggo kuruapken idi nai, kupèlèken mo pirak ènda bai JAHOWA asa bakinen mahan gana-gana kayu sinilampis bak pirak. Jadi kuulakken mo kèpèng idi bamu.”

⁴Asa enggo kessa ibalikken si Mika kèpèng idi taba inangna, ibuat inangna idi mo dua ratus ngkabuah ibas kèpèng idi nai, janah iberèken bai sada kalak tukkang pirak. Nai idokken mo tukkang i memahan sada gana-gana kayu ilampis dekket pirak i. Nai ibakin mo gana-gana idi i sapo si Mika.

⁵Si Mika sendiri pè lot ngo enggo sada bekkas pemèlèen bana. Ibahan ngo tah piga-piga gana-ganaen sembahen dekket sirambar efod ninganna ipebangkit mo sakalak ibas dukakna daholi nai gabè imam.

⁶Ibas katika i oda ngo lot dèng raja bai kalak Israel; gennep jelma mahanken kadè dok atèna bennar.

⁷Sinderrangna idi ma lot mo sada kalak anak perana ibas marga Lewi nai. Merian i Betlehem i nagerri Juda kin ngo ia lebbè.

⁸Tapi bagèndari enggo itadingken kuta i janah sidang merdalan menulusi bekkas sidèban. Sidang perdalanenna idi, soh mo ia mi sapo si Mika i uruk aur nagerri Efraim.

⁹Ikusoken si Mika mo tabasa, “Kalak dikè ngo kènè?” Ialoi kalak i mo, “Kalak Lewi i Betlehem sini Juda nai ngo aku. Sidang menulusi bekkas mahan ianen ngo aku.”

¹⁰Idokken si Mika mo, “Isèn mo ko merian rebbak aku, asa ko gabè pemernoi bak imam nami. Kuberèken pè bamu luas sipuluh riar pirak gennep tahun, bagi ma dekket pakèen bak pangaan.”

¹¹Iuèi anak perana bak kalak Lewi i mo, nai ipebangkit si Mika mo ia gabè imamna. Merian i bages si Mika mo ia janah ibakin mo ia tosè bagè anak kandung si Mika sendiri.

¹³Nai nina si Mika mo, “Yaah, bagèndari enggo tok ukurku selloh mo ibaing JAHOWA taba aku kumerna enggo lot sada kalak Lewi gabè imam taba aku.”