Read Batak Dairi Perhukum 18 Bible Online

Perhukum 18 - Batak Dairi bible

Perhukum 18

¹Sinderrangna i oda lot dèng raja bai kalak Israel. Dak ngo menulusi tanoh dèng marga Dan lako mahan ladang kalak i, kumerna malot dèng kalak i dapetten tanoh rebbakken marga-marga sidèbanna ibas bangsa Israel.

²Kumerna i ipilih kalak i mo lima kalak simergegohna ipas karina horong i marga kalak i simerian i Zora dekket Esytaol nai, ninganna pesakatken ulaen bai silima kalak i lako mengkakapi nagerri idi. Asa berkat mo kalak idi, janah soh mo kalak idi mi ladang kettan delleng nagerri Efraim. Mermalam mo kalak i i sidi i bages si Mika.

³Tikan lako memengketti bages i, idengkoh kalak i mo anak perana marga Lewi idi mengerana, janah itandai kalak i ngo perkatana. Nai idahi kalak i mo ia janah mengkusoken, “Merkadè kono i sèn? Kadè bahanmu? Isè ngo memabai kono mi sèn?”

⁴Ialoi anak perana idi mo, “Asa i sèn pè aku kumernaken si Mika ngo. Ia ngo pebangkitken aku gabè imamna, janah memerèken gaji taba aku.”

⁵Nai nina kalak i mo tabasa, “Mula bagidi kusoken mo lebbè taba Dèbata barang tah merhasil ma ngo perdalanen nami ènda barang oda.”

⁶Ialoi imam idi mo, “Pos mo atè ndènè. Enggo itumpak JAHOWA perdalanen ndènè ènda.”

⁷Enggo kessa i berkat mo silima kalak idi janah laus mi Lais. Iperdatè-datèken kalak i mo pengisi sinisidi. Ntangkas mo bai kalak i ukum pernggelluh pengisi kuta Lais tosè bagè pernggelluh bangsa Sidon ngo. Tukasi pè pinjil kalak i, janah ndaoh bai bangsa Sidon nai, mènak ngo pernggelluh kalak idi janah merdamè-damè, oda lot musuh kalak i. Nduma janah oda kurangen barang kadè pè.

⁸Balik kessa si lima kalak i mendahi kalak denganna sada marga i Zora dekket Esytaol, ipengido mo bai kalak i asa isukutken berita.

⁹Ibagahken kalak i mo, “Aci mo sikubu Lais. Enggo mo mi sidi kami, janah merandal ngo tanohna kuidah kami, mbellang janah nggabur, karina lot ngo i sidi. Ulang mo dak i sèn sambing kita, oda lot merkadè. Sisudu mo laus mi sidi lako menaban nagerri idi. Dapetten ndènè mo oda èdep kalak i kènè roh mengkubu. Tok ngo kami enggo iberèken Dèbata nagerri idi bai ndènè.”

¹¹Kumerna i, berkat mo marga Dan i Zora dekket i Esytaol nai 600 kalak. Jah merembah senjata lengkap,

¹²laus mo kalak i mi kan kesunduten Kiryat-Jearim i aur marga Juda ninganna merundung-undung i sidi. Ingo sebabna bekkas idi igerari Perundung-undungen Dan.

¹³I sidi nai merdalan mo kalak i terrus mi ladang delleng Efraim soh mi bages si Mika.

¹⁴Nai idokken perkakap silima kalak sinipasulak tikanna i mo taba dengan-denganna, “Ibettoh kènè ma ngo lot gana-gana merlampis pirak ibas sada bages èn? Lot dèng ma ngo gana-gana sidèban dekket Efod. Pikirken kènè mo bakunè patut bakinenta.”

¹⁵Nai laus mo kalak i mi Bages si Mika, bekkas anak perana kalak Lewi idi merian, janah mengkusoken bakunè ia.

¹⁶Tikanna i tupung mercènderren ngo siennem ratus balapergunggung marga Dan, simersinjata lengkap idi, i pèntu pengkeruhen.

¹⁷Mbengket mo terrus limana perkakap idi mi bages, nai ibuat kalak idi mo gana-gana kayu merlampis pirak rebbak dekket gana-ganaen sidèban, bak efod. Tupung cènder ngo anak perana kalak Lewi i rasken dekket si ennem ratus balapergunggung idi i pèntu pengkeruhen.

¹⁸Tikanna mbengket silima kalak i mi bages si Mika lako memuat efod bak gana-ganaen sembahen i, mengkuso mo anak perana kalak Lewi i, “Kadè nola ngo sinibahan ndènè èn?”

¹⁹Ialoi kalak i mo, “Sip mo ko. Ulang kusoi. Ekutken mo kami, asa kono gabè imam dekket pemernoi nami luas. Ulang nai ngo gabè imam sada mpangaen sambing, lotien mo gabè imam sada marga.”

²⁰Sennang ngo atè anak perana kalak Lewi i mendengkoh pendokken kalak i. Nai, ibuat mo efod dekket gana-gana sembahen i terrus ièkutken mo kalak i.

²¹Kessa i iterrusken nuhnuhen idi mo perdalanen kalak i, kettan lebbè mo anak-anak, pinakan bak ugas-ugasen kalak i.

²²Enggo kessa ndaoh kalak i, idiloi si Mika mo gembar bagesna i rebbakken mo kalak i menjalangi marga Dan idi. Enggo kessa njolmit taba kalak i,

²³dilo-dilo mo si Mika bak denganna i taba kalak i. Tumulih mo karina marga Dan idi janah mengkusoken taba si Mika, “Kadè pana? Kasa roh bagi buè jelma?”

²⁴Ialoi si Mika mo, “Ilaum kènè ngo gana-ganangku bak imamna, gabè kadèngku nèngè poda lot, keppèken idokken kènè nola dèng ma, ‘Kadè pana!’ ”

²⁵Nina kalak i marga Dan idi mo, “Lotien mo kono sip; ulang sanga nola melaga kalak èn gabè ijuhap kono. Nahan matè nola ko bak karina kènè simpangaen.”

²⁶Enggo kessa idokken bagi, iterrusken marga Dan idi mo perdalanen kalak i. Idah si Mika ndaoh ngo mergegohen kalak i bana nai, kerna i balik mo ia molih.

²⁷Enggo kessa ibabaken marga Dan i imam i bak ugasen pemèlèen sinibahan si Mika i, laus mo kalak i menjuhap kuta Lais, imo sada kuta mènak janah merdamè-damè pengisina (sada lembeng ngo kuta i dekket kuta Bet-Rehob). Ibunuh kalak Dan idi mo karina pengisi Lais ninganna menutung kuta i. Oda lot isè roh lako mengurupi kalak Lais i kumerna pinjil ngo bekkas kalak i janah ndaoh i Sidon nai. Enggo kessa i ipajek kalak Dan nola mo balik kuta i nai merian i sidi mo kalak i.

²⁹Itukari kalak i mo gerar kuta i gabè Dan, mengèkutken gerar empung kalak i, imo si Dan, anak si Jakob.

³⁰Gana-gana sembahen siniembah kalak i, ipajek kalak i mo i kuta i ninganna ipebangkit mo si Jonatan, anak si Gersom, kempu si Musa, gabè imam kalak i. Hot ngo pemparen si Gersom ènda gabè imam marga Dan idi sakat mi tikan iembah bangsa Israel ibuang mi nagerri sidèban.

³¹Tong ngo i kuta Lais gana-gana sembahen sinibahan si Mika idi sidekkahna i Silo Undung-undung Jahowa merian.