Read Batak Dairi Perhukum 19 Bible Online

Perhukum 19 - Batak Dairi bible

Perhukum 19

¹Sinderrang mak dèng lot raja kalak Israel, lot sada kalak Lewi merbekkas i juma-juma, i terruh pispis delleng Efraim. Ibuat mo sada kalak daberru i Betlehem Juda nai mahan siterbuangna.

²Nai enggo kessa i melaga mo daberru idi tabasa, gabè balik mo ia mi sapo bapana i Betlehem. Enggo kessa merian i sidi daberru idi empat bulan dekkahna,

³laus ma mo kalak Lewi idi mengèkutkensa, lako mengèlèk-ngèlèk asa balik bana. Berkat mo ia merembah sada kalak hambana dekket dua kalodè. Enggo kessa soh mi sidi, ibabai daberru idi mo ia mendahi bapana. Tikan idah bapana i kessa ia, lolo ngo ia menghalopkensa,

⁴janah igegohi mo asa ulang balik nèngè ia. Kumerna i i sidi mo ia tellu ari janah merberngin i sidi rebbak dekket siterbuangna i bagi mangan bak mènum.

⁵I ari peempatken, njengkas mo kalak i ndungo janah merkebbas lako berkat. Tapi idokken bapa daberru idi mo taba kalak Lewi i, “Mangan mo kènè lebbè asa lot gegoh ndènè. Nai ipè asa berkat kènè.”

⁶Nai kundul mo kalak Lewi idi ninganna mangan janah mènum rebbak dekket bapa daberru idi. Tapi tikanna cènder ia lako naing berkat, ièlèk-èlèk bapa daberru idi mo ia asa ulang dèng laus. “Pesennang-sennang kènè mo lebbèken, i sèn mo kènè merberngin,” nina mendokken. Nai i sidi mo kalak Lewi idi sada berngin nai.

⁸I ari pelimaken, njengkas kalohon dèng, sinderrang naing berkat ia, idokken bapa daberru idi nola dèng ma mo, “Yah, mangan mo kènè lebbè; sikedjap nai pè asa berkat kè.” Nai rasken mangan mo kalak i sidua janah ihanjar-hanjari soh naing sundut mataniari.

⁹Nai, tikan naing berkat kalak Lewi i rebbakken siterbuangna bak hambana i, nina bapa daberru idi mo, “Enggo naing gellap ari, sikedjap nai gellap nè mo. Lotien mo kènè i sèn merberngin janah mersennang-sennang. Baremben enggo ndorok kènè njengkas ndungo lako balik.”

¹⁰Tapi oda nè uè kalak Lewi i mer- malam i sidi. Berkat mo ia dekket siterbuangna i, rasken dekket hambana bak kalodèna simerpelano sidua i. Sinderrangna enggo mayak gellap, soh mo kalak i i gembar Jebus (imo Jerusalem). Nai idokken hamba idi mo taba tuanna, “Ialè tuan, singgah mo kita janah mermalam i kuta kalak Jebus ènda.”

¹²Tapi ialoi tuanna idi mo, “Oda! Oda ndorok kita mentadi i bekkas kalak siso kalak Israel pegisina. Bèta mo siterrusken perdalanenta situk nai janah mermalam i Gibea barang i Rama mo kita nahan.”

¹⁴Kumerna i terrus mo kalak i merdalan janah oda mentadi i Jebus. Enggo mo sundut mataniari tikan soh kalak i i Gibea i tanoh marga Benjamin.

¹⁵Singgah mo kalak i i sidi lako mermalam, ninganna mbengket mi kuta i janah laus dogok i kasèan mbellang. Tapi sada kalak poda lot mendokken kalak i mi sapo lako mermalam.

¹⁶Sinderrang kundul-kundul kalak i i kasèan kuta i, roh mo sada kalak situa-tua rembaru balik i jumana nai. Situhuna asalna kettan ladang delleng Efraim nai ma ngo, tapi bagèndari enggo merian i Gibea. (Pengi- si sidèban i Gibea imo kalak Benjamin.)

¹⁷Idah situa-tua i kessa mo kalak Lewi i i kasèan, ikusoken mo, “I dikè nai ngo kènè janah naing laus mikè?”

¹⁸Ialoi kalak Lewi idi mo, “I dèng ngo kami roh i Betlehem sini Juda nai, janah tupung i perdalanen lako balik mi bages nami i juma-juma sini terruh pispis delleng Efraim. I sidi nai ngo asalku. Sada kalak poda lot uè pengisi kuta èn menjalo kami mi bagesna lako merberngin.

¹⁹Oda ngo pella lot kadè sikuperluken kami sidèban, cukup ngo bekkel nami. Lot ngo nggala pagè dekket pangaen kalodè nami; lot ngo roti bak anggur lako baku bak sinibagesku èn dekket hambangku.”

²⁰Nai nina situa-tua i mo, “Pos atèmu, kuurupi pè kè. Ulang pella i kasèan ènda kènè merberngin.”

²¹Nai ibabai mo kalak i mi bagesna ninganna iberrè mangan kalodè kalak i. Janah enggo kessa iborih tamuè-tamuè idi nèhèna, mangan mo kalak i.

²²Sinderrangna galang-gumalè kalak i, sintempu mo bages i ikaliangi kalak jelma luhlah merpengelako sini kuta idi nai. Itumburi kalak i mo pèntu janah mendokken taba situa-tua i, “Sohken mo bai nami daholi siniembahmu idi mi bagesmu èn. Naing kupakè kami ngo ia!”

²³Nai karuar mo situa-tua i janah mendokken taba kalak i, “Ulang mo kè bagi kaltu! Pengidoenku bai ndènè, ulang mo bakin kènè jahat janah siso patut sibagidi, kerna tamuèngku ngo ia.

²⁴Kuberèken pè nahan bai ndènè siterbuangna i dekket berrungku. Ndorok mo pepulak kènè diri ndènè dekket kalak i! Tapi, ulang mo lot si jahat bakin kènè meradepken tamuèngku idi!”

²⁵Tapi kumerna dak ijèngèngi jelma luhlah i ngo pukpuk, nai itulakken kalak Lewi i mo siterbuangna i mi ruar lako bai kalak i. Nai irampok kalak i mo daberru idi oda mentadi soh mi siceggen.

²⁶Mayak terrang ari balik mo daberru idi, tapi pangsan ngo ia i pèntu sapo situa-tua, bekkas sinibalèna i merberngin. Enggo pè mbincar mataniari tong dèng ngo ia i sidi.

²⁷Ceggenna i, sinderrang ndungo sinibalèna i janah memuka pèntu lako berkat, jupasa mo siterbuangna i gampar i lebbè sapo i, janah tanganna mencèkèpi pèntu.

²⁸“Ndungo mo,” nina tabasa, “bèta mo kita berkat.” Tapi oda mengaloi daberru idi kerna enggo matè. Nai, idokong mo daberru idi janah mengampèken i babo kalodèna, nai berkat mo ia lako balik mi bagesna.

²⁹Soh kessa i sapo, mbengket mo ia mi bagasen janah ibuat mo golok nai igettap-gettap mo bangkè siterbuangna i gabè sipuluh dua mpenggel. Enggo kessa i, itengesken ia mo penggel-penggelna i taba sisipiluh dua marga bangsa Israel, gennep tersada mpenggel.

³⁰Karina kalak simernidah i mendokken, “Oda nung dèng masa bagèen, kessa nai mbungkas bangsa Israel i Mesir nai soh mi ari sidari èn. Oda ndorok sip bagi sambing kita. Kennah merarih kita lako muat bèla.”