Read Batak Dairi Perhukum 2 Bible Online

Perhukum 2 - Batak Dairi bible

Perhukum 2

¹Laus mo malaèkat JAHOWA i Gilgal nai mi Bokhim janah mendokken taba kalak Israel, “Enggo mo Kupedarat kè i Mesir nai, janah memabai kènè mi nagerri sienggo Kuperbagah bai empung ndènè. Enggo ma ngo Kudokken kin, ‘JanjingKu sienggo tettah dekket kènè oda nèngè Kuosè.

²Kumerna i oda ndorok nèngè kènè lako memakin padan dekket pengisi nagerri ènda. Kennah ngo rentuhenken ndènè karina langgaten kalak i.’ Tapi keppè oda ngo iulaken kènè kadè sienggo Kudokken idi. Baliksa nola ngo enggo iulaken kènè!

³Asa, bagèndari pè dengkohken mo! Oda nè Kupuari kalak sini nagerri ènda mula dahari kènè mergeraha bak kalak i. Gabè musuh ndènè mo kalak i, janah terjerret mo kènè, gabè dekket nola mo kènè menembah sembah-sembahen kalak i.”

⁴Enggo kessa pul ibagahken malaèkat idi berita idi, derru-derru mo karina bangsa Israel.

⁵Kumerna i ngo asa igerari bekkas idi Bokhim. Nai i bekkas i mo kalak Israel memèlèken pèlèen bai JAHOWA.

⁶Enggo kessa ipeberkat si Josua kalak Israel laus, berkat mo kalak i lako mengiani tanoh milik kalak i gennep.

⁷Sidekkah nggelluh si Josua merpenguèi taba JAHOWA ngo kalak Israel. Enggo kessa matè pè si Josua dak tong dèng ngo kalak i menguèi taba JAHOWA sidekkah kalak i iuluken kalak sienggo mengidah sendiri nasa kelengangen sinibakin JAHOWA bai kalak Israel.

⁸Si Josua anak si Nun suruhen JAHOWA idi matè merumur siratus sipuluh tahun.

⁹Ikubur mo ia i tanohna sendiri, imo i Timnat-Serah i suak delleng Efraim kan utara Delleng Gaas.

¹⁰Kessa i nola matè mo karina sisada cundut idi. Janah cundut sitan podina nola oda nèngè itandai JAHOWA, kumerna kalak i oda mengerasai kadè sienggo ibakin JAHOWA bai bangsa Israel.

¹¹Kessa bagi merdosa nola mo kalak Israel taba JAHOWA. Oda nèngè isembah kalak i JAHOWA, Dèbata empung kalak i, imo Dèbata sienggo mengarak kalak i mbungkas i Mesir nai. Ipungkah kalak idi nola mo menembah Baal dekket Asytoret bagi bak dèbata-dèbata sidèban sinisembah bangsa-bangsa kumaliang kalak i. Nai melaga mo JAHOWA taba kalak i, janah ibelli mo penamun menjuhap dekket mengelaum kalak i. Oda lot mergoldè nèngè kalak i mengalo musuh i kumaliang kalak i.

¹⁵Gennep kalak i laus mergeraha, ialo JAHOWA ngo kalak i, bagè sienggo kin isèngètken bai kalak i. Asa gabè mpiah kalohon mo iakap kalak i.

¹⁶Nggati ngo ibarèken JAHOWA lubalang lako menguluken kalak i lako merjuhap paluahken kalak i ibas pulungen penamun nai.

¹⁷Tapi oda isarihken kalak i simenguluken i. Isembah kalak i ngo dèbata-dèbata sidèban, janah oda nèngè setia taba JAHOWA. Oda ngo ièkutken kalak i codien tosè bagè pengelako empung kalak i sidak tong merpenguèi taba perèntah-perèntah JAHOWA.

¹⁸Mula iberèken JAHOWA sada kalak pengulu bai bangsa Israel dakdak ngo iurupi JAHOWA pengulu idi. Janah sidekkah nggelluh dèng pengulu idi, dak tong ngo ipaluah JAHOWA kalak i bai musuh-musuh kalak idi nai. Masèh ngo atèNa taba kalak i, idengkohken kessa kalak i mernong-alè kumerna ipekia-kia janah idohken.

¹⁹Tapi enggo kessa matè simenguluken i, makin merrohana mo pengelako bangsa i dari pada cundut sienggona. Merpenguèi taba dèbata-dèbata sidèban mo kalak i janah menembah dèbata sidèban idi. Balik mo kalak idi mi ketcemalen-ketcemalen kalak i jahat i janah oda nggèut mengobah pengelako kalak i.

²⁰Kumerna i melaga kalohon mo JAHOWA taba bangsa Israel, janah mendokken, “Enggo Kudokken taba empung bangsa ènda asa ièngèt perpadanenna dekket Aku. Tapi iosè bangsa ènda ngo padan i, ilausi kalak i ngo perèntahKu.

²¹Asa bagèndari pè oda nggèut nèngè Aku lako pelausken bangsa apaina pè silotna dèng i nagerri èn tikan matè si Josua.

²²Kubaing mo bangsa-bangsa idi lako mengoji bangsa Israel, asa Kubettoh tah nggèut ma bangsa Israel mengèkutken perèntah-perèntahKu bagè empung kalak i, barang oda.”

²³Idi mo dalanna oda uè JAHOWA memerèken kemenangen bai si Josua meradepken bangsa-bangsa i. Balikna ibelli JAHOWA ngo kalak i merian i nagerri i, janah oda mènter ndor kalak i ipelaus.