Read Batak Dairi Perhukum 20 Bible Online

Perhukum 20 - Batak Dairi bible

Perhukum 20

¹Nai merrohen mo karina bangsa Israel mulai i Dan kan utara nai soh mi Bersyeba i selatan, dekket Gilead kebincaren, lako menguèi dilo-dilo idi. Mertumpu mo kalak i janah mersada i Mizpa i hadeppen JAHOWA.

²Karinana lot ngo 400.000 balapergunggung perdalan nènèh. Pengulu-pengulu i gennep marga Israel nai pè roh ma ngo mi sidi.

³Sinderrangna bagidi enggo idengkoh kalak marga Benjamin mertumpu kalak Israel sidèbankenna idi i Mizpa. Nai mengkuso mo kalak Israel i taba kalak Lewi siterbunuh siterbuangna i, “Sukutken mo lebbè bai nami bakunè perjadina kejahaten idi!” Ialoi kalak Lewi idi mo, “Singgah ngo aku dekket siterbuangku idi i Gibea i tanoh kalak Benjamin janah mermalam i sidi.

⁴

⁵Nai roh mo kalak Gibea berngin-berngin lako menulusi aku. Ikulilingi kalak i mo sapo bekkasku merberngin i lako naing memunuh aku, tapi gabè irampok kalak i mo siterbuangku i sampè matè.

⁶Nai kubuat mo bangkèna janah kupenggel-penggel, nai kupentengesken mo taba sisipuluh dua marga bangsanta gennep tersimpenggel. Asa kubakin pè bagi kumerna enggo mengulaken jahat kalak Gibea i janah pemaluken i tengah-tengah bangsa Israel.

⁷Kalak Israel ngo karina kènè silot i sèn. Asa bagèndari pè kupido mo pertimbangen bai ndènè.”

⁸Rebbakken cènder mo karina kalak simertumpu i bekkas i janah mendokken, “Karinana kita ulang lot balik mi undung-undung barang pè mi sapo.

⁹Bagèen mo sinaing bakinenta: Mertendung mo kita lako menentuken barang isè kalakna kennah berkat menjuhap Gibea.

¹⁰Sipersipuluh ibas karina anak laki Israel nai kennah mo pepadaken pangaen lako bai kalak siberkat mergeraha. Sidèbankenna i berkat mo menjuhap Gibea lako menghukum kalak i kumerna kejahaten sienggo ibakinken kalak i i tengah-tengah bangsa Israel.”

¹¹Bagidi mo bangsa Israel mersada taki lako mengkubu Gibea.

¹²Enggo kessa bagi ipasulak bangsa Israel mo pasulakkenna mi suberri nagerri marga Benjamin lako pesakatken berita ènda: “Kejahaten kadè ngo enggo merulah bai ndènè?

¹³Sohken kènè mo kalak perpengelako luhlah sini Gibea idi nai bai nami asa kubunuh kami kalak i janah merkitè bagi kupetumpat kami kejahaten sibagidi i tengah-tengah Israel nai.” Tapi oda ngo isarihken kalak Benjamin rana kalak Israel sidèban idi.

¹⁴Baliksa merrohen nola mo kalak Benjamin i karina kuta sininagerri Benjamin i lako mengalo kalak idi nai buèna 26.000 soridadu. Janah laènkenna i dèng ma pengisi Gibea sendiri pè enggo pepulungken 700 kalak siterpilih. Karina kalak i jaluk ngo janah mengarimbalangken batu. Mula mengarimbalang kessa kalak i, situk poda nung pilit.

¹⁵Arinkenna i ipepulung kalak imo i gennep kuta kalak i nai buèna 26.000 soridadu. Janah laènken i deng ma pengisi Gibea pe enggo pepulungken 700 pilihen kalakna. Karina kalak i jaluk pandè merarimbalang. Mula mengarimbalang i oda nung pilit situk pe.

¹⁶

¹⁷Kettan kalak Israel sidèban i enggo terpepulung 400.000 soridadu buèna sienggo terlatih mergeraha.

¹⁸Laus mo soridadu bangsa Israel i mi bekkas mersembah i Betel, janah mengkusoken bai Dèbata, “Ialè JAHOWA, marga apaina ngo i tengah-tengah nami nai kennah perlebbè berkat menjuhap kalak Benjamin?” Ialoi JAHOWA mo, “Marga Juda.”

¹⁹Sibarembenkenna berkat mo kalak i janah merundung-undung i gembar kuta Gibea.

²⁰Ibakin kalak i mo bekkas nuhnuhen soridadu kalak i pehadep dekket kuta i, nai ijuhap mo.

²¹Nai remuar ma mo balapergunggung kalak Benjamin lako juhap janah ibunuh mo 22.000 soridadu Israel sidarinkenna idi.

²²Kerna ketaluen idi, laus mo bangsa Israel mi bekkas mersembah ninganna tangis mendahi JAHOWA i bekkas idi soh berngin. Ikusoken kalak idi mo, “Alè JAHOWA, kennah laus dèng ngo kami menjuhap dengan sibeltek nami kalak Benjamin idi?” Ialoi JAHOWA mo, “Uè, laus mo kènè.” Kumernaken idi gabè nggasang nola mo balapergunggung Israel i mengolihi, gabè iatur kalak idi nola mo nuhnuhen kalak i bagè ari perlebbè idi.

²³

²⁴Laus mo kalak i pedua kaliken menjuhap balapergunggung kalak Benjamin idi.

²⁵Janah pedua kaliken ma mo remuar kalak Benjamin idi merjuhap. Ibas sikali èn ibunuh kalak i mo 18.000 soridadu-soridadu pilihen ibas balapergunggung Israel nai.

²⁶Nai laus nola mo bangsa Israel mi Betel janah tangis mendahi JAHOWA. Puasa mo kalak idi i sidi soh mi berngin janah memèlèken pèlèen perdamèen bak pèlèen situtungen bai JAHOWA.

²⁷Sinderrangna idi i Betel ngo Pèti Perpadanen Dèbata, janah si Pinehas anak si Eleazar, kempu si Aron, merkebbas bagè Imam. Nai mengkuso mo bangsa Israel, taba JAHOWA, “Ialè JAHOWA, kennah laus dèng ngo kami menjuhap dengan sibeltek nami kalak Benjamin idi, barang tah kennah ngo kami petadiken geraha ènda?” Ialoi JAHOWA mo, “Juhap kènè mo kalak i! Baremben Kuberèken mo kemenangen bai ndènè.”

²⁸

²⁹Mendengkoh pengaloi JAHOWA idi, ibakinken kalak Israel nola mo soridaduna i bekkas-bekkas mboni i sikuliling Gibea.

³⁰Nai i ari petelluken ijuhap kalak i mo balapergunggung Benjamin merkitè persusur nuhnuhen menghadep Gibea bagè sienggo ibakinken kalak i i ari-ari simadèngkenna i.

³¹Ijuhap kalak Benjamin ma mo, janah uè roh mendarat i kuta idi nai. Bagè sienggona, itubennai kalak i mo memunuh kalak Israel i bekkas ndahar i ruar kuta i dalan menuju dempak Betel dekket i dalan menuju dempak Gibea. Terbunuh mo tellupuluh kalak Israel.

³²Kumerna i idokdok kalak Benjamin mo enggo italuken kalak i kalak Israel idi bagè siperlebbè idi. Tapi enggo kin ngo mertaki soridadu Israel asa mondar lako mengendo soridadu kalak Benjamin idi mi dalan-dalan mbellen, ndaoh i kuta i nai.

³³Tikanna mondar parangen kalak Israel, janah menusun nuhnuhen kalak i nola i Baal-Tamar, dengan kalak sinibakinkenna i sikuliling Gibea mènter mendarat i bekkas percibonien kalak idi nai siniruar kuta i.

³⁴Kalak siterpilih ngo karina kalak i i suberri Israel nai; buèna 10.000 kalak. Masa mo geraha mertuhu-tuhu tikan si 10.000 kalak i menjuhap Gibea. Oda èdep kalak Benjamin, sinempas nai talu kalak i.

³⁵Mennang mo kalak Israel ibakin JAHOWA meraloken kalak Benjamin, asa ibas sidarinkenna idi ibunuh kalak Israel mo 25.100 kalak soridadu kalak Benjamin.

³⁶Idèng mo asa satdar kalak Benjamin enggo talu kalak i. Enggo mersengaja nuhnuhen huntuen balapergunggung Israel mperrus meradepken kalak Benjamin i nai kumerna iharapken kalak i ngo anak buahna sinipercibonien i sikuliling Gibea.

³⁷Isudu kalak i siciboni idi mo mbengket menjuhap Gibea; mersèrak mo kalak i mi gennep bekkas kuta i janah memunuh karina jelma sinisidi.

³⁸Tapi enggo kin ngo sada pekkat kalak i lebbèen mula lot kessa ngkapal cèmber api mercèmpul mi babo i tengah-tengah kuta idi nai,

³⁹kennah balik nola mo nuhnuhen huntuen idi menjuhap musuh. Sinderrangna i enggo ibunuh kalak Benjamin 30 soridadu kalak Israel janah idokdok enggo italuken kalak i nola ma kalak Israel bagè siperlebbè i.

⁴⁰Tapi sintempu mo mercèmpul cèmber mi babo i tengah-tengah kuta Gibea nai. Tersengget mo kalak Benjamin tumulih kessa kalak i janah mengidah enggo melekkup karina kuta kalak i.

⁴¹Janah tikan bagidi merbalik mo nuhnuhen huntuen soridadu Israel menjuhap, nai gabè sitermoto mo pengakap soridadu kalak Benjamin i kumerna enggo satdar kalak i bakunè pè pasti kennah talu nai ngo kalak i.

⁴²Nai, mperrus mo kalak i bai kalak Israel i nai menuju mi padang gurun, tapi oda terbaing kalak i maluah. Terkurung mo kalak idi i kellang-kellang nuhnuhen huntuen soridadu Israel dekket nuhnuhen sienggo roh nola kettan kuta nai. Menggongken ketaluen mparah kalohon mo kalak Benjamin.

⁴³Ikeppung janah iletlet kalak Israel mo kalak idi pukpuk soh mi sada bekkas kan kebincaren Gibea. Ninganna mengeletlet ibunuh kalak i mo

⁴⁴18.000 soridadu siterlatih ibas balapergunggung kalak Benjamin nai.

⁴⁵Mulak mo dèba soridadu kalak Benjamin i ninganna mperrus arap padang gurun menuju mi delleng-delleng batu i Rimon. Ibunuh mo 5000 kalak bai kalak i nai i tengah ndalan. Sidèbankenna i iletlet terrus soh mi Gideom. Ibas kalak i nai lot ngo 2.000 kalak ibunuh.

⁴⁶Asa lot ngo 25.000 kalak — soridadu kalak Benjamin ibunuh sidarinkenna i karinana i soridadu mahantu ngo berranina.

⁴⁷Tapi lot ngo bai kalak simperrus i nai arap padang gurun menuju mi delleng-delleng batu i Rimon 600 kalak simpellutna. Merian i Rimon mo kalak i empat bulan dekkahna.

⁴⁸Kessa i nola balik ma mo kalak Israel juhap janah memunuh karina kalak Benjamin sitadingna dèng — daholi, daberru, anak-anak bang pinakan pè. Karina kuta sininagerri idi ilekkup kalak i.