Read Batak Dairi Perhukum 21 Bible Online

Perhukum 21 - Batak Dairi bible

Perhukum 21

¹Sinderrangna mertumpu kalak Israel i Mizpa, enggo kin ngo ibulabanken kalak i taba JAHOWA sada kalak poda bai kalak i nai padiatken berruna gabè sinibages kalak Benjamin.

²Bagèndari laus ngo kalak i mi Betel janah dogok merbonek atè soh berngin i hadeppen Jahowa. Tangis ngo kalak i janah menenggoken,

³“Ialè JAHOWA, Dèbata Israel, kasa mo kennah masa karinana èn? Marga Benjamin, sada marga ibas bangsa nami nai, enggo naing tompet.”

⁴Sibarembenkenna, njengkas kalohon dèng, ipajek bangsa Israel mo sada langgaten i sidi, nai memèlèken bai JAHOWA pèlèen situtungen dekket pèlèen perdamèen.

⁵Enggo kessa i iperèso kalak i mo ibas gennep marga-marga bangsa Israel nai lot siso dekket laus mertumpu menghadep JAHOWA i Mizpa tikala i. (Tikala i enggo mersumpah kalak i barang isè siso menguèi dilo-dilo mi Mizpa kennah patèenken.)

⁶Masèh ngo atè bangsa Israel midah dengan sibeltekna marga Benjamin i; idokken kalak i mo, “Ari èn kembalangen sada marga ngo Israel.

⁷Kennah bakunè mo sibaing asa lot sinibages kalak Benjamin sitadingna i, kerna enggo sibulabanken taba JAHOWA siso padiatenta berrunta gabè sinibages kalak Benjamin?”

⁸Nai iperèso kalak i mo tah lot ngo sada horong kalak i ibas marga bangsa Israel nai siso dekket laus mertumpu i Mizpa. Janah dapet kalak i mo ukum kalak Jabes i Gilead nai, sada kalak poda keppè lot dekket laus mi Mizpa.

⁹Kumerna, tikan iperèso gerar-gerar siroh, terdapet mo sada poda lot teridah i sidi i Jabes nai.

¹⁰Kumerna i, ipasulak kalak simertumpu i Betel idi mo 12.000 kalak siberranina kalohon bai kalak i nai lako memunuh gennep jelma i Jabes, bang daberru dekket anak-anak.

¹¹Iperèntahken mo kalak i lako memunuh karina anak laki, bagi ma bang daberru siso gadi nèngè.

¹²Nai jupa kalak i mo kalak simerian i Jabes idi nai, lot 400 simerbaju gadi dèng. Iembah kalak idi mo simerbaju-simerbaju idi mi perundung-undungen i Silo sini nagerri Kanaan.

¹³Enggo kessa i ipasulak karina bangsa Israel mo pasulakkenna mendahi kalak Benjamin silot i delleng-delleng batu i Rimon lako mendokken rana perdamèen.

¹⁴Kumerna i balik mo kalak Benjamin i, nai iberèken kalak Israel mo bai kalak i simerbaju-simerbaju i Jabes siso i bunuh i nai. Tapi oda ngo bias dèng buè simerbaju i lako bai kalak Benjamin idi.

¹⁵Masèh ngo atè bangsa Israel midah kalak Benjamin, kumerna enggo rettak kesadaen marga-marga bangsa Israel.

¹⁶Kumerna i, idokken simpantasniasè simertumpu i Betel idi mo, “Oda lot nèngè daberru ibas marga Benjamin. Tapi, bakunè bakinen; oda ndorok kita padiatken berrunta sijahè taba kalak i, kerna enggo sisumpahi barang isè banta nai padiatken berruna sijahè bai sada kalak Benjamin. Asa kennah bakunè nola mo ndia sibaing taba kalak sitadingna ènda dèng asa ndorok lot sinibagesna? Ulang sanga nola kembalangen sada marga Israel sisipuluh duana marga idi. Kennah situlus ngo dalan asa ndorok lot pemparen marga Benjamin podi ari janah tong memiliki tanohna.”

¹⁹“Bagèen mo i,” nina kalak i, “lot ngo sada dalan, imo sinderrang mahan kerja tahun bai JAHOWA i Silo.” (Kettan selatan Silo ènda ngo kuta Betel, janah kettan kesunduten lot dalan mbellen Betel mi Sikhem, janah kan utarana imo kuta Lebona.)

²⁰Nai idokken simpantasniasè simertumpu i Betel idi mo taba kalak Benjamin sitadingna idi dèng, “Laus mo kènè ciboni i pekken-pekken anggur i Silo,

²¹janah entip kènè mo i sidi. Merrohen kessa sikali èn simerbaju-simerbaju i Silo idi nai lako tumataki sidekkah pèsta kerja tahun i bai JAHOWA, kennah karuar mo kènè i pekken anggur idi nai. Nai kennah mo gennep kènè mencekkak sada kalak simerbaju bai kalak idi nai janah mengeluaken mi nagerri Benjamin lako mahan sinibages ndènè.

²²Mula roh bapana barang barang turangna naing mengalengsa ndorok mo dokenenken ndènè, ‘Kupido kami, belli kè mo kalak i bai nami. Oda ngo i pergerahaen nai kalak i kucukung kami. Janah kumerna oda ngo nakkatna iberèken kènè kalak i bai nami, oda ngo mengelausken bulaban kènè i sidi, asa oda mersalah kè.’ ”

²³Nai ibakin kalak Benjamin idi mo bagè sienggo idokken bai kalak i. Gennep mo kalak i mengeluaken tersada simerbaju i simerbaju-simerbaju situmataki i Silo idi nai. Kessa i balik mo kalak i mi nagerri kalak i sendiri janah memajek balik gennep kutana, ninganna menettap mo kalak i i sidi.

²⁴Kalak Israel sidèbankenna idi pè berkat ma mo. Balik mo kalak i mi tanoh kalak i mi nagerrina gennep, mengèkutken horong bak marga-marga kalak i.

²⁵Ibas katika i oda lot dèng raja i Israel. Gennep jelma mengulaken kadè dok atèna selloh.