Read Batak Dairi Perhukum 3 Bible Online

Perhukum 3 - Batak Dairi bible

Perhukum 3

¹Lako mengoji kalak Israel siso nung mengakapi geraha i Kanaan, ibelli JAHOWA ngo barang piga-piga bangsa nai merian i nagerri idi.

²Ibakin JAHOWA bagi- di pellin naing lako mengajari Israel ngo mergeraha gennep cundut, tuana kalak i siso nung dekket mergeraha.

³Bangsa-bangsa simerian i nagerri idi imo; bangsa Palistin simerian ibas silima kuta, karina bangsa Kanaan, bangsa Sidon, dekket bangsa Hewi simerian i Delleng Libanon, mulai i delleng Baal-Hermon nai soh mi dalan menuju Hamat.

⁴Merian kalak i i sidi lako gabè batu pengojien bai bangsa Israel ngo. Merkitè bagidi terbettoh mo tah iuèi bangsa Israel ma ngo perèntah-perèntah siniberèken JAHOWA bai empung kalak i merkitè si Musa.

⁵Kumerna i ngo kalak Kanaan, Het, Amori, Feris, Hewi dekket Jebus tong merian i nagerri i rasken dekket bangsa Israel.

⁶Merkabinen mo bangsa Israel dekket bangsa-bangsa i, janah dekket menembah dèbata kalak idi.

⁷Merdosa nola mo bangsa Israel taba JAHOWA, Dèbata kalak i. Lupa mo kalak i tabaSa gabè mersembah taba sembahen Baal dekket Asyera nola mo kalak i.

⁸Nai melaga mo JAHOWA taba bangsa Israel, janah ibelli mo kalak i italuken Raja Kusyan- Risyataim i Mesopotamia nai. Ualuh tahun mo dekkahna raja idi mengerajai kalak i.

⁹Nai kessa i tenggo-tenggo mo bangsa Israel mengido pengurupien bai JAHOWA, nai iberèken JAHOWA mo si Otniel lako paluahken kalak i. (Si Otniel imo anak si Kenas, anggi si Kaleb).

¹⁰Isenggeppi Tendi JAHOWA mo si Otniel asa gabè ia mo simenguluken bangsa Israel. Berkat mo ia mergeraha, nai iberèken JAHOWA mo kemenangen bana mengalo raja Mesopotamia.

¹¹Nai mènak mo nagerri i empatpuluh tahun dekkahna. Enggo kessa i matè mo si Otniel.

¹²Nai ipungkah bangsa Israel nola mo merdosa taba JAHOWA, gabè ibakin JAHOWA mo si Eglon, raja Moab, gabè mergegohen asa kalak Israel.

¹³Mersada mo raja Eglon bak bangsa Amon dekket Amalek, nai italuken mo kalak Israel, kessa i itaban mo kuta Jeriko, kuta korma i.

¹⁴Sipuluh ualuh tahun mo dekkahna bangsa Israel irajai si Eglon.

¹⁵Tapi sinderrangna tenggo-tenggo bangsa Israel mengido pengurupien taba JAHOWA, iberèken mo si Ehud lako paluahken kalak i. Jaluk ngo ukum si Ehud; anak si Gera ngo ia ibas marga Benjamin nai, janah cemmalna ia ngo menaruhken taba Raja Eglon belasting sipatut gararen bangsa Israel.

¹⁶Tikan sidari iteppa si Ehud mo sada peddang sidua babah lot naing sitengah mèter geddangna. Ibentingken mo peddang i ibas abakna kan kamuhun ibagasen bajuna,

¹⁷nai laus mo ia pesakatken belasting bai bangsa Israel nai taba Raja Eglon. Nggomok kalohon ngo raja i.

¹⁸Enggo kessa iberèken belasting i, ipasulak si Ehud mo simerembah kèpèng emmas idi balik.

¹⁹Tapi mengadi mo si Ehud kessa soh mi batu-batu merokir i gembar Gilgal, nai balik mo mendahi si Eglon. Ibas katika i tupung ngo si Eglon i bilik simehembur kan dates jerrona. Nai nina si Ehud mo taba si Eglon, “Alè raja nami! Lot ngo berita rusia kuembah taba raja i.” Nai nina raja i mo, “Pèma mo lebbè,” nai idokken ia mo karina naposona asa mendarat janah menadingkensa pellin dekket si Ehud. Kessa i, ijolmiti si Ehud mo raja i tupung kundul, ninganna mendokken, “Lot ngo berita bai Dèbata nai bai raja i.” Mendengkoh i, cènder mo raja i.

²¹Mènter isintak si Ehud mo peddangna dekket tangan kambirangna kan abakna kamuhun nai, nai ijulukken mo mbages kalohon mi beltek raja i. Karina babah peddang i soh mi sukulna rembuk mi pessoh-pessoh beltek raja i, sanga ntelpus sakat mi gurungna. Ibelli si Ehud mo i sidi peddang i.

²³Nai karuar mo ia ninganna menutup janah mengkonci pèntu bilik idi,

²⁴nai laus mo ia. Tikan roh naposo raja i, janah idapet merkonci ngo pèntu-pèntu bilik i, idok kalak i mo tong dèng ibagasen raja i janah tupung laus mi podi.

²⁵Enggo kessa ipèma kalak i narih ndekkah janah oda lot ibuka raja i pèntu i, bagè sèk mo ukur kalak i, nai ibuat mo anak konci janah kibuka pèntu i. Keppè enggo mo gampar matè raja kalak i i hatap i.

²⁶Sinderrang mema-mèma bagidi dèng kalak i, enggo mo mperrus si Ehud mi Seira memellus arap batu-batu merokir.

²⁷Enggo kessa soh ia mi uruk delleng Efraim, mèter isempul mo sarunèna mendiloi kalak Israel lako mergeraha. Merrohen mo kalak i nai iuluken mo kalak i susur i uruk i nai.

²⁸“Ekutken aku” nina taba kalak i, “Enggo italuken JAHOWA kalak Moab, musuh ndènè idi kemulihken aku.” Asa ibas penguluken si Ehud, susur mo kalak Israel i uruk idi nai. Italuken kalak i mo bekkas penurèparen kalak Moab i Laè Jordan. Sada kalak poda lot musuh i ibelli kalak i njuah-njuah lako suberrang.

²⁹Ibas perjuhapen idi ibunuh kalak i ngo kira-kira 10.000 soridadu kalak Moab simahantuna, oda lot maluah.

³⁰Arinkenna i talu mo Moab meraloken Israel, nai mènak mo nagerri i ualuhpuluh tahun dekkahna.

³¹Pengendeng i podina nola imo si Samgar anak si Anat. Ia pè juhap ngo lako paluahken kalak Israel. Merkitè tongket lipat-lipat lembu, ibunuh ngo 600 kalak Palistin.