Read Batak Dairi Perhukum 4 Bible Online

Perhukum 4 - Batak Dairi bible

Perhukum 4

¹Enggo kessa matè si Ehud mengolihi nola mo merdosa bangsa Israel taba JAHOWA.

²Nai ibelli JAHOWA mo kalak i italuken si Jabin, raja Kanaan simerbekkas i kuta Hazor. Pakalima balapergunggungna imo si Sisera simerian i Haroset-Hagoyim.

³Lot ngo 900 kurèta perang si Jabin ibas bessi nai. Duapuluh tahun mo dekkahna ia mengerajai kalak Israel ibagasen ketjam. Nai nola tenggo-tenggo mo kalak i mengido pengurupien taba JAHOWA.

⁴Ibas katika i sada kalak nabi daberru ngo menguluken Israel imo mergerar si Debora, sinibuat si Lapidot.

⁵Cemmalna dak kundul-kundul ngo si Debora i terruh kayu korma, i kellang-kellang Rama dekket Betel, i ladang uruk Efraim. Janah mi sidi mo kalak Israel roh lako mengido peddah bana nai.

⁶Tikan sada ari ipasulak mo kalak mendiloi si Barak, anak si Abinoam, kan kuta Kades nai i ladang kalak Naptali. Nai nina mo mbang si Barak, “Enda mo perèntah JAHOWA, Dèbata Israel taba kènè: ‘Pepulung mo 10.000 kalak anak laki ibas marga Naptali dekket Zebulon nai, janah babai mo kalak i mi Delleng Tabor.

⁷Nahan Kubakin mo si Sisera, pakalima balapergunggung si Jabin, roh mendahi kènè i Laè Kisyon rasken soridaduna bak kurèta-kurèta perangna lako mengalo kènè. Tapi Kuberrè mo kemenangen taba kènè ibagasen perjuhapen idi.’ ”

⁸Nai nina si Barak mo taba si Debora, “Mula dekket kono, nggèut ngo aku berkat. Tapi mula oda ngo, aku pè oda nggèut laus.”

⁹Ialoi si Debora mo, “Selloh, dekket pè aku! Tapi èngèt, oda ngo kono nahan merolihken kesangapen. Merkitè sada kalak daberru ngo JAHOWA lako menaluken si Sisera.” Nai berkat mo si Debora rasken dekket si Barak mi Kades.

¹⁰Janah iuluken si Barak mo marga Zebulon dekket Naptali mi Kades. Lot ngo katika i mengèkutken si Barak dekket si Debora 10.000 kalak.

¹¹Ibas katika i si Heber kalak Keni, enggo pejaèken dirina ibas bangsana nai. (Bangsa Keni imo pemparen si Hobab, silih si Musa). Enggo laus si Heber pejengjengken undung-undungna i gembar kayu simerminak i Zaanaim, oda ndaoh i Kedes nai.

¹²Gejapkennai enggo kessa idengkoh si Sisera berkat si Barak mi Delleng Tabor,

¹³ipepulung mo sisibah ratus kurèta perangna sinibahan ibas bessi idi nai, rasken dekket karina balapergunggungna nai iuluken mo kalak idi i Haroset-Hagoyim nai mi Laè Kison.

¹⁴Nai nina si Debora mo taba si Barak, “Aci mo juhap! JAHOWA ngo mendengani ko. Iberèken mo bamu kemenangen sidari èn meraloken si Sisera.” Nai susur mo si Barak i Delleng Tabor nai rasken dekket sisipuluh ribu kalak denganna i,

¹⁵nai ijuhap kalak i mo si Sisera. Nai isompar-baèrken JAHOWA mo karina balapergunggung si Sisera dekket kerèta-kerèta perangna, gabè sampur mo si Sisera ibas kurètana nai, ninganna mperus merdalan nènèh.

¹⁶Iletlet si Barak mo kerèta-kerèta perang bak balapergunggung musuh idi soh mi Haroset-Hagoyim nai ibunuh mo karina nasa balapergunggung si Sisera idi; sada kalak poda ibelli nggelluh.

¹⁷Ningankenna i enggo mo mperrus si Sisera mi undung-undung si Jael, sinibages si Heber, kalak Keni i. Kumerna, meralè-alè ngo Raja Jabin sini Hazor i nai dekket horong si Heber.

¹⁸Tikan roh si Sisera, ihalopken si Joel mo ia janah mendokken, “Roh mo kè, tuan nami, masuk mo kènè mi bagasen undung-undungku ènda; ulang pella kènè mbiar.” Nai mbengket mo si Sisera mi bagasen undung-undung i ninganna itungkupi si Jael mo ia dekket kaèn kirè-kirè pèntu asa mboni ia.

¹⁹Nina si Sisera mo taba si Joel, “Tolong mo berèken giam cituk laè mahan ènumen; muasen ngo aku.” Nai ibuka si Jael mo tabu, bekkas susu, ni nganna iberrè ienum si Sisera, kessai tungkupi nola ia dekket kirè-kirè.

²⁰Nai nina si Sisera mo taba si Joel, “Lako mo cender i lebbè undung-undung i. Mula lot kalak roh mengkusoken bamu lot kalak isen, dokken mo oda lot.”

²¹Ledja kalohon ngo iakap si Sisera gabè tertunduh mo ia nai terpeddem sanga lènek. Ibuat si Jael mo sada tokkok dekket sada pasek-pasek undung-undung, nai sipsip ijolmiti mo si Sisera. Nai mènter ipasekken mo pasek-pasek i serrang perdempakenna sanga ntelpus mi tanoh. Bagidi mo cara si Jael memunuh si Sisera.

²²Tikan roh si Barak menulusi si Sisera, isimbaki si Jael mo selloh si Barak janah mendokken tabasa, “Roh mo kè, asa kutuduhken bai ndènè sinitulusen ndènè i.” Mbengket mo si Barak rasken si Jael, nai itengen mo si Sisera enggo matè, gampar i tanoh dekket pasek-pasek undung-undung letcep ibas perdempakenna.

²³Iberèken Jahowa ngo arinkenna i kemenangen taba kalak Israel meraloken si Jabin, raja Kanaan.

²⁴Muat mi dekkahna makin idohken kalak Israel mo raja i, dungna matè mo ia.