Read Batak Dairi Perhukum 5 Bible Online

Perhukum 5 - Batak Dairi bible

Perhukum 5

¹Ibas arinkenna i merendè mo si Debora bak si Barak anak si Abinoam. Bagèen mo katana:

²Poji mo JAHOWA, kumerna lubalang-lubalang Israel enggo mertaki lako juhap, janah ginemgem enggo ibagah atèna berkat lako geraha.

³Dengkohken mo alè raja-raja dekket raja muda, merendè ngo aku bai Dèbata Israel, imo JAHOWA.

⁴Sidangna berkat Ko kan Seir nai, alè JAHOWA, janah itadingken Kono nagerri Edom, dumegger ngo tanoh èn, baruren langit pè mpulka, janah ipentunahken hembun ngo laèna.

⁵Delleng-delleng dumegger i lebbè pengian Sinai, i hadeppen JAHOWA, Dèbata Israel.

⁶I tikki si Samgar, anak si Anat, dekket i tikki si Jael pè, oda lot pertiga-tiga i nagerri, oda lot mentas perdalan-dalan i dalan mbellen.

⁷Gennep kuta Israel, oda lot pengisina, melongo kalohon sampè roh ko, alè Debora; roh ngo ko tosè bagè inang sinikekelengen.

⁸Sidangna Israel mulai menembah sembahen, gedjuh mo geraha i nagerri kalak i; ibas 40.000 lubalang bangsa nai, sada kalak poda merembah beddil.

⁹Taba karina pakalima Israel simemerèken dirina kumarna ibagah ukurna, kupesakat penghargaenku simbelgah-belgahna. Poji mo JAHOWA!

¹⁰O kènè simengkunduli kalodè mbentar, kènè sikundul i babo belagen maharga, janah kènè karina simerdalan nènèh, beritaken kènè mo berita kemenangen ènda!

¹¹Terdengkoh ngo sora mernangen rami kalohon i gembar sumur-sumur, menoriken kemenangen JAHOWA molih-olih, kemenangen Israel, bangsa JAHOWA. Nai merotor mo kalak i menuju pèntu pengkeruhen kuta.

¹²Kèkè mo ko Debora, janah baing mo èndè. Kèkè mo ko Barak, runtun mo nasa sitertaban.

¹³Lubalang sitadingna dèng merrohen taba penguluna, merrohen kalak i, janah kebbas lako juhap lako baNa.

¹⁴Merdalan ngo kalak i i Efraim nai mi napa, mengèkutken balapergunggung si Benjamin simerotor i lebbè kalak i. Kan Makhir nai merrohen mo pakalima, janah i Zebulon nai kèkè lubalang-lubalang.

¹⁵Simpantasniasè Isasar merrohen rasken si Debora, uè, merrohen ngo Isasar, janah dekket ma ngo si Barak; ièkutken kalak i ngo ia, mengencuahi lembeng. Tapi oda ngo mertentu taki kalak Ruben kumerna malot dos taki kalak i.

¹⁶Kasa mo merian kalak i i tengah-tengah biri-biri? Mada ngo lako mendengkohken permakan mendilo pinakanna? Tuhuna ngo gia oda tertentuken marga Ruben ukurna, kumerna oda lot dos taki i tengah-tengah kalak i.

¹⁷Sinderrangna Zebulon dekket Naptali juhap mertuhu-tuhu i pergerahaen, marga Dan merlek i keppel, janah marga Gad tong merian i kebincaren Jordan, keppèken marga Asyer tennang-tennang janah oda nggèut mèrèt kan bekkas kalak idi i biding laut nai.

¹⁹Mergeraha ngo raja-raja, i Taanakh, i gembar laè Megido, juhap ngo geraha raja-raja Kanaan, tapi oda lot iembah kalak i balik pirak sikira taban-taban.

²⁰Bintang-bintang pè dekket ngo juhap mengalo si Sisera, i bekkas perkoserren kalak i i langit nai.

²¹Merginja ngo laè Kison mengampuh musuh. Juhap, juhap mo mertuhu-tuhu alè tendingku!

²²Ninganna lojang merderrap-derrap ngo sora nèhè kuda idengirken simengkundulisa.

²³“Sumpahi kènè mo kuta Meros, dekket pengisina,” nina malaèkat JAHOWA “kumerna oda roh kalak i lako mengurupi tosè lubalang juhap lako bai JAHOWA.”

²⁴Merlaba ngo si Jael, sinibages si Heber kalak Keni; ibas karina pengisi undung-undung nai, ia mo siterpasu-pasuna kalohon.

²⁵Laè ipengido si Sisera, tapi susu ngo iberèken tabasa, iberèken susu ibas mengkuk bagè patutna meradepken raja-raja.

²⁶Merkitè pasek-pasek dekket tokkok i tanganna ipalu si Jael ngo si Sisera sanga merengep takalna.

²⁷I nèhè si Jael ngo ia nggerbah maknè merkessah gampar i tanoh mèma dapet ajalna.

²⁸Menatap-natap ngo inang si Sisera i jendèla nai, janah mendokken, “Kasa mo ndia lalap dèng, kurètana oda roh, kasa oda terdengkoh perderrap kudana?”

²⁹Sibijakna naposona daberru mengaloi bagè siturah ibas ukurna nai:

³⁰“Sidang memella taban-taban ngo kalak i, gennep soridadu sada barang dua simerbaju. Bai si Sisera, oles man baju simahargana kalohon, bai bindohara, sabè-sabè mersulam merbagè rupa.”

³¹Katerra pè ripas mo musuh-musuhMu, bagè si Sisera, ialè JAHOWA, tapi termurmur mo karina supan-supanMu bagè mataniari i langit. Enggo kesa i, mènak mo nagerri idi empatpuluh tahun dekkahna.