Read Batak Dairi Perhukum 6 Bible Online

Perhukum 6 - Batak Dairi bible

Perhukum 6

¹Sikali nai balik nola mo merdosa bangsa Israel taba JAHOWA, gabè ibelli mo bangsa Midian mengerajai kalak i pitu tahun dekkahna.

²Sondel ngo mbiarna kalak Israel midah kalak Midian, gabè ciboni mo kalak i ibagasen liang dekket i bekkas melongo sidèban i delleng-delleng.

³Tambahna nola dèng ma gennep mersuan kalak Israel, roh mo kalak Midian rebbak dekket kalak Amalek bak kalak sidèbanna i padang gurun nai menjuhap kalak Israel.

⁴Merundung-undung mo kalak i, i tanoh Israel janah mencèdaken karina suan-suanen sinisidi soh mi tanoh sikuliling Gaza kettan selatan. Bagi ma pinakan biri-biri, lembu dekket kalodè bangsa Israel iapus kerri. Kadè nèngè poda lot itadingken kalak i gabè kadè nèngè poda lot panganen bangsa Israel.

⁵Merrohen ngo kalak i rumimba-rimba merembah pinakan dekket undung-undung kalak i lahlah kalohon. Enggo lahlahsu kalak i dekket untana mak nèngè terkira. Merrohen mo kalak i lako mencèdaken nagerri idi,

⁶janah oda terkekadè kalak Israel kalak i.

⁷Nai tenggo-tenggo nola mo bangsa Israel mengidoken bai JAHOWA asa iurupi kalak i mengalo kalak Midian.

⁸Ipasulak JAHOWA mo sada kalak nabi taba kalak i. Nina nabi idi mo, “Bagèen ngo pendokken JAHOWA, Dèbata Israel: ‘Enggo Kupaluah kènè i perhambaen Mesir nai.

⁹Enggo Kupaluahi kènè bai kalak Mesir dekket bai kalak sini nagerri simengalo kènè ènda nai. Enggo ngo Kupelaus kalak i i nagerri ènda nai sinderrangna ikubu kènè kalak i, nai Kuberèken mo tanoh kalak i bai ndènè.

¹⁰Enggo Kudokken bai ndènè magahken Aku ngo JAHOWA Dèbata ndènè, janah siso ndorok kènè menembah dèbata bangsa Amori sienggo iani kènè kutana bagèndari. Tapi oda ngo iuèi kènè perèntahKu.’ ”

¹¹Tikan sidari roh mo malaèkat JAHOWA mi kuta Ofra, nai dogok mo ia i terruh kayu sempènur, milik si Joas, sada kalak ibas horong Abiezer nai. Tupung mengerrik pagè ngo, anakna simergerar si Gideon i bekkas pengilangen anggur. Iulaken ngo bahanna idi mboni-mboni asa ulang idah kalak Midian.

¹²Ipeteridahken malaèkat JAHOWA idi mo dirina tabasa janah mendokken, “Alè, anak perana mahantu! Idengani JAHOWA ngo ko.”

¹³Ialoi si Gideon mo, “Sintabi mo, tuan nami! Mula tuhu ngo JAHOWA mendengani kami, kasa mo bagèen sempa mendahi kami? I dikè ngo karina kelengangen sienggo pennah ipetupa JAHOWA arnia dekket sinisukutken empung nami tersèngèt barang bakunè cara JAHOWA mengarak kalak i karuar i Mesir nai? Bagèndari enggo itadingken JAHOWA kami janah ibelli ngo kami merkinisohna irajai kalak Midian.”

¹⁴Nai iberèken JAHOWA mo perèntah ènda bai si Gideon, “Ibagasen karina gegohmu berkat mo ko lako paluahken kalak Israel ibas kuasa kalak Midian nai. Aku ngo pasulakken kono.”

¹⁵Ialoi si Gideon mo, “Kasa kennah aku, alè JAHOWA? Bakunè mo aku paluahken bangsa Israel ibas kuasa kalak Midian nai. Ibas marga Manasye pè horongku ngo sindalmèhna kalohon. Janah ibas kami sisimpangaen pè aku mo siso lot lapatenna.”

¹⁶“Pasti ngo ndorok kono!” nina JAHOWA, “kumerna Aku ngo mengurupi kono. Kennah ndorok janah murah ngo ripasenkenmu kalak Midian, kalih kin bagè pellin mengalo sada kalak sambing.”

¹⁷Ialoi si Gideon mo, “Mula tuhu-tuhuna ngo aku ikellemoken JAHOWA, cuba mo kidahken berrèken sada tanda magahken JAHOWA ngo tuhuna memerèken perèn- tah ènda taba aku.

¹⁸Pengidoenku uè mo JAHOWA memèma lebbèken i sènda mèma roh nola Aku pehantarken pangaen bai JAHOWA.” “Selloh,” nina JAHOWA, “kupèma pè soh balik kono.”

¹⁹Nai balik mo si Gideon, nai imasak mo sada kambing bajar, janah ibuat mo sipuluh kilo nditak, nai ibahan mo roti siso meragi. Nai ibakin mo jukut idi ibagasen kendang, janah kuahna ibas koden, nai iembah mo karinana idi janah ipehantar bai malaèkat JAHOWA simemèma i terruh benna sempènur i.

²⁰Idokken malaèkat JAHOWA idi mo, “Gamparken mo jukut bak roti idi i babo batu ènda ninganna tuangken mo kuah gulè i mi babona.” Ibakin si Gideon mo bagè sinidokkenna tabasa i.

²¹Nai idoroken malaèkat i mo tanganna, ninganna merkitè punca kayu sinicèkepna i, ikuit mo gulè bak roti idi. Lakat mo batu idi nai kerri mo messeng gulè bak roti idi. Nai mèter mersep mo malaèkat idi.

²²Satdar mo si Gideon JAHOWA sendiri ngo keppè siroh mendahisa i. Nai ibagasen mbiar, idokken si Gideon mo, “Enggo cilaka aku, alè JAHOWA sintèmbul kalohon i! Kumerna enggo pedempak abè aku dekket malaèkatMu!”

²³Tapi nina JAHOWA mo tabasa, “Pos mo atèmu! Ulang kono mbiar. Oda matè ko!”

²⁴Nai ipajek si Gideon mo sada langgaten i sidi janah ibaing mo gerarna “JAHOWA ngo benna Ketuahen.” Tong dèng ngo lot langgaten idi i Ofra imo kuta kalak Abiezer.

²⁵Bernginkenna idi idokken JAHOWA mo perèntah ènda bai si Gideon, “Buat mo lembu tonggal bapamu, imo lembu simerandalna kalohon simerumur pitu tahun. Rontas mo langgaten Baal sinipajek bapamu, nai rumpakken mo tihang pertanda sembahen Asyera sinigembar langgaten idi.

²⁶Pajek mo i babona idi sada langgaten sienggo itukkangi selloh. Nai nola kennah tutung mo lembu tonggal idi bolet mahan pèlèen bai JAHOWA. Pakkè mo tihang pertanda sembahen Asyera sienggo nirumpakkenmu idi mahan sebbanna.”

²⁷Nai ipilih si Gideon mo sipuluh kalak naposona, nai laus mo kalak i mahanken bagè sinidokken JAHOWA tabasa i. Tapi kumerna mbiarsu ia taba simpangansa dekket taba kalak sinikutana idi, oda pang ia mengulaken idi ukum mahar. Gabè tupung berngin mo ibahanken i.

²⁸Ndungo kessa pengisi kuta i siceggen sibarembenkenna, idah kalak idi mo enggo merumpak langgaten dèbata Baal dekket tihang pertanda sembahen Asyera i. Idah kalak idi ma mo enggo ipajek nola i bekkas idi sada langgaten janah enggo nola ma itutung lembu tonggal mahan pèlèen.

²⁹Mersikusoen mo kalak idi samahsa, “Ulah-ulah isè ngo ndia èn?” Enggo kessa iperèso, ibettoh kalak i mo, si Gideon anak si Joas ngo keppè pandè ulah.

³⁰Nai nina kalak i mo taba si Joas, “Enggo irontas anakmu langgaten Baal janah mengerumpakken tihang pertanda sembahen Asyera sinigembar langgaten idi. Kerna i, embah mo dukakmu idi mi sènda. Kennah patèenken ngo ia!”

³¹Tapi nina si Joas mo taba karina simengalosa idi, “Ai merpihak taba Baal ngo kènè janah mengampinisa? Barang isè merpihak kansa, bunuhen mo sidari èn! Mula tuhuna ngo Baal idi Dèbata, belli mo ia sendiri muat bèla dirina, kumerna langgatenna ngo sinirontasken idi.”

³²Kumerna idokken si Joas, “Belli mo Baal idi sendiri mengalo si Gideon, kerna ia mengerontas langgatenna,” asa mungkah i sidi nai igerari dèba mo si Gideon “Jerubaal.”

³³Tikanna idi enggo mo mertumpu karina kalak Midian, Amalek bak marga-marga sidèban sinipadang gurun kettan kebincaren Laè Jordan. Isuberrangi kalak i mo Laè Jordan, janah merundung-undung i Lembeng Jizreel.

³⁴Tapi isenggeppi Tendi JAHOWA ngo si Gideon, gabè isempul mo sarunèna lako mendiloi horong kalak Abiezer asa roh rebbak dekketsa.

³⁵Ipasulak ma mo pasulakkenna mendahi marga Asyer, Zebulon, Naptali dekket marga Manasye — agia sikettan kebincaren barang sikan kesunduten Laè Jordan pè, lako mendokken taba kalak i asa rasken dekketsa. Nai merrohen mo kalak i karina lako mengurupi si Gideon.

³⁶Nai idokken si Gideon mo taba Dèbata, “Ialè JAHOWA, enggo idokken Kono magahken uè ngo Kono memakè aku lako paluahken bangsa Israel.

³⁷Mula tuhuna ngo bagidi, i babo tanoh èn, bekkas nami cemmal mengerrik pagè, enggo kugamparken penggontingen bukbuk biri-biri. Mula pellin bukbuk biri-biri ènda sambing ngo kessa baremben ntaptap ibaing hembun, janah tanohna oda, idi mo tandana magahken ipebangkit Kono aku lako paluahken bangsa Israel.”

³⁸Nai hana mo bagidi: Tikan ndungo si Gideon siceggen sibarembenkenna janah kiperroh bukbuk biri-biri idi, dapetsa mo laè hembun sada mangkuk.

³⁹Nai nina mo mbang Dèbata, “Alè Jahowa, ulang mo ko mènter melaga mula mengerana aku sikali nai. Duè mo aku memakin sada nai pengojien merkitè penggontingen bukbuk biri-biri ènda. Tapi ukum sikali èn naing mo nemmuken pellin bukbuk biri-biri èn sambing ngkerrah, ukum tanohna ntaptap.”

⁴⁰Bernginkenna i, ihanaken Dèbata mo bagè sinipido si Gideon i, asa siberembenkenna siceggen ngkerrah ngo tuhuna bukbuk biri-biri idi, tapi ukum tanohna ntaptap ngo kumerna hembun idi.