Read Batak Dairi Perhukum 7 Bible Online

Perhukum 7 - Batak Dairi bible

Perhukum 7

¹Tikan sidari njengkas kalohon ndungo mo si Gideon dekket karina parangenna. Laus mo kalak i janah merundung-undung i gembar Laè mul Harod. Kettan utara kalak i perundung-undungen kalak Midian ngo, i napa i gembar Uruk More.

²Idokken JAHOWA mo taba si Gideon, “Mbuèsu ngo parangenmu idi. Oda nggèut Aku memerèken kemenangen taba kalak i meraloken kalak Midian, kerna dok atè kalak i mo i podi ari, mennang pè kalak i kumernaken gegoh kalak i sendiri ngo, gabè oda ipoji kalak i Aku.

³Asa mongmongken mo taba parangenmu, ‘Barang isè mbiar, kennah ndor mo itadingken Delleng Gilead èn janah balik mi bagesna.’ ” Nai lot mo 22.000 kalak simolih; janah pellin 10.000 nai ngo kessa tading.

⁴Nai nina JAHOWA nola mo taba si Gideon, “Mèduksu dèng ngo parangenmu i. Babai mo kalak i mi laè. I sidi mo Kusaring kalak i lako mahan denganmu. Mula Kudokken bamu, ‘En mo kalakna sikennah berkat dekket ko,’ kennah berkat mo ia. Tapi mula Kudokken, ‘En kalakna oda ndorok berkat dekket ko,’ oda ndorok berkat ia.”

⁵Nai ibabai si Gideon mo kalak i mi laè, nai idokken JAHOWA mo taba si Gideon, “Kalak simengènum laè bagè pendilat biang, kennah pejaè bai kalak si menjèngkur nai lako mènum.”

⁶Nai lot mo 300 kalak simeniruk laè ibas tanganna nai; karina sidèbanna i menjèngkur ngo lako mènum.

⁷Kessa i nola idokken JAHOWA mo taba si Gideon, “Dekket si 300 kalak simeniruk laè idi mo, Kupaluah kènè janah merèken kemenangen bai ndènè meraloken kalak Midian. Pasulak mo balik sidèbankenna i.”

⁸Kumerna i ipasulak si Gideon mo karina kalak Israel sidèbanna i balik laènken sitellu ratus idi. Karina bekkel dekket sarunè ibuat mo bai kalak sibalik idi nai. I lembeng jèhèenken bekkas kalak Israel ngo merundung-undung ukum kalak Midian.

⁹Bernginkenna i mengerana mo JAHOWA mbang si Gideon, “Ndungo mo ko, Gideon. Berkat mo kènè menjuhap perundung-undungen kalak Midian. Mennang pè ko Kubaing meraloken kalak i.

¹⁰Tapi mula mbiar ko, arahken mo si Pura, naposomi rebbakken kènè laus mi perundung-undungen musuh.

¹¹Dengkohenmmu mo nahan i sidi barang kadè siniranaen musuh, janah idi mo memakin kono gabè berani merjuhap.” Nai laus mo si Gideon bak si Pura, mi perbalengen perundung-undungen musuh.

¹²Merdaraken ngo i lembeng i kalak Midian, Amalek dekket kalak sidèbanna siroh i padang gurun nai. Idahen tosè bagè balang pulung meremmut. Mèduk kalohon ngo unto kalak i bagè kersik i biding laut.

¹³Tikanna soh kessa si Gideon mi sidi, idengkoh mo lot sada kalak menukutken nipina taba denganna. Bagèen mo nina, “Mernipi ngo aku lot sengkimpal roti tergoling-goling mbengket mi perundung-undungenta ninganna ibemba mo sada undung-undung. Merumpak mo undung-undung i rata mi tanoh.”

¹⁴Ialoi denganna i mo, “Yah, ukum i kennah peddang si Gideon anak si Joas, kalak Israel i ngo i. Mella bagi enggo pana iberèken Dèbata kemenangen tabasa meraloken kalak Midian bak karina balapergunggungta!”

¹⁵Tikan idengkoh si Gideon tersèngèt nipi kalak i bak lapatenna, sujud mo ia menembah Dèbata. Nai balik mo ia mi perundung-undungen Israel janah mendokken, “Kebbas mo kènè! Iberèken JAHOWA mo kemenangen bai ndènè meraloken balapergunggung Midian!”

¹⁶Nai ipella si Gideon mo sitellu ratus parangenna idi gabè tellu nuhnuhen. Iberèken mo tersada sarunè dekket goci sin obor bai gennep kalak soridadu.

¹⁷Nina si Gideon mo taba kalak i, “Mula soh kessa aku mi perbalengen perundung-undungen kalak Midian, perdatèken kènè mo aku selloh, janah bakinken kènè ma mo bagè sikubakin.

¹⁸Mula kusempul kessa dekket nuhnuhenku sarunè kennah sempul kènè ma mo sarunè ndènè. Nai kennah mo mersurak kènè i sikuliling perundung-undungen i, ‘Bai JAHOWA dekket bai si Gideon!’ ”

¹⁹Mayak tengah berngin, sakat mo si Gideon bak denganna i mi perbalengen perundung-undungen musuh. Ibas katika i kalak simenjaga perundung-undungen i, mbaru dèng ngo mergancih. Nai isempul si Gideon bak nuhnuhenna mo sarunè janah ipempustakken goci-gocina.

²⁰Bagi ma mo ibaing nuhnuhen sidua nai. Nai karina mo kalak idi mencèkèp oborna i tangan kambirangna, janah menempul sarunè silot i tangan kamuhunna. Mersurak mo kalak i, “Peddang bai JAHOWA dekket bai si Gideon!”

²¹Hot ngo cènder kalak i karina i bekkasna gennep i sikuliling perundung-undungen idi. Nai mperrus mo karina barat-burut balapergunggung musuh i ninganna derru-derru.

²²Sinderrang ipersora si Gideon dekket denganna i sarunè, mersisebbu bana mo balapergunggung i samahsa ibakin JAHOWA merkitè peddang kalak i. Mperrus mo kalak i dempak Zerera soh mi Bet-Sita dekket kuta Abel-Mehola sinigembar Tabat.

²³Nai idilo ma mo marga Naptali, Asyer, dekket marga Manasye agia sinikebincaren bang sinikesunduten Laè Jordan pè. Nai iletlet kalak i mo soridadu kalak Midian.

²⁴Bagi ma mi karina ladang sinidelleng Efraim, itengesken si Gideon ngo berita dilo-dilo i, “Roh mo kènè mengalo kalak Midian. Pertahanken mo Laè Jordan bak karina anak laè soh mi Bet-Bara. Ulang duè kalak Midian suberrang i sidi nai.” Nai kebbas mo karina kalak Efraim, ipertahanken kalak idi mo Laè Jordan dekket karina anak laè sakat mi Bet-Bara.

²⁵Dua pertaki kalak Midian imo si Oreb dekket si Zeeb itangkup kalak i. Ibunuh mo si Oreb i Batu Oreb janah si Zeeb ibunuh i bekkas pengilangen anggur Zeeb. Ilajuken kalak Efraim mo mengeletlet kalak Midian, janah iembah mo takal si Oreb dekket si Zeeb bai si Gideon i kèpar Laè Jordan kettan kebincaren.