Read Batak Dairi Perhukum 8 Bible Online

Perhukum 8 - Batak Dairi bible

Perhukum 8

¹Idokken kalak Efraim mo katana bai si Gideon, “Kasa mo oda dekket kami iarahken tikanna berkat kono mengalo kalak Midian? Kasa bagidi ibakin kono taba kami?” Bagidi mo kalak idi ngut-nguten taba si Gideon.

²Tapi ialoi si Gideon mo, “Kadè sienggo kubakin i dikenna dèng poda i mertimbangken sienggo nibakin ndènè. Kasi nola pè cituk sinibakin ndènè idi, tapi mahargaen ngo sicituk idi daripada karina sienggo ibahanken balapergunggung i horongku nai.

³Kènè ngo sienggo merolihken kuasa bai Dèbata nai, gabè ndorok memunuh si Oreb bak si Zeeb, duana pertaki kalak Midian i. Mertimbangken i mènter kadè mo pana jasangku?” Enggo kessa idokken si Gideon bagidi, oda nèngè mo melaga kalak i.

⁴Sinderrangna i sakat mo si Gideon bak sitellu ratus anak buahna i mi kèpar Laè Jordan. Enggo ledja kalohon kalak i tapi dak tong ngo iempet mengeletlet musuh.

⁵Nai soh mo kalak i mi Sukot. I sidi idokken si Gideon mo taba pengisi kuta i, “Tolong mo berèken kènè situk giam panganen bai anak buahku ènda. Ledja kalohon ngo kalak i, keppèken naing kuletlet kami dèng ngo si Zebah dekket si Salmuna, raja-raja kalak Midian i.”

⁶Tapi ialoi pengulu-pengulu i Sukot idi mo, “Ah, mak dèng giam itangkup kènè si Zebah dekket si Salmuna, enggo mo mènter mengido pangaen kènè! Mahan kadè kennah berèen pangaen anak buahmu?”

⁷Nai nina si Gideon mo, “Selloh mula bagi. Sikali èn mula enggo ipesakat JAHOWA taba aku kemenangen meraloken si Zebah dekket si Salmuna, kubatbat mo kènè merkitè dori dekket tada-tada gurun pasir nai!”

⁸Nai ipuspusken si Gideon mo perdalanenna nai soh mo kalak i mi Pnuel. I sidi pè ipido ma mo pangaen lako bai anak buahna. Tapi dos ngo pengaloi kalak Pnuel dekket pengaloi kalak Sukot.

⁹Kumerna i nina si Gideon mo taba kalak i, “Njuah-njuah ngo aku balik nahan. Janah tikanna idi mo kurumpakken palas kuta èn!”

¹⁰Sinderrangna i tupung i Karkor ngo si Zebah bak si Salumna rasken karina balapergunggung kalak i. Ibas karinana balapergunggung kalak perpadang gurun, pellin 15.000 kalak nai ngo kessa sitadingna; enggo mo rabbat ukum soridaduna 120.000 kalak.

¹¹Ièkut-èkut si Gideon mo perbalengen gurun pasir kettan kebincaren Nobah dekket Jogbeha nai sintempu mo musuh ijuhap.

¹²Mperrus mo si Zebah bak si Salumna, raja kalak Midian sidua i, tapi iletlet si Gideon ngo kalak i janah itangkup, gabè panik mo karina balapergunggung kalak i oda ibettoh tunjulenna.

¹³Enggo kessa i i perdalanen lako balik i pergerahaen idi nai, arap dalan penangkengen Heres ngo si Gideon.

¹⁴Itangkup mo i sidi sada kalak anak perana i Sukot nai, nai ikuso mo anak perana i terèngèt gerar-gerar nasa simpantasniasè i Sukot. Nai isuratken anak perana i mo gerar-gerar idi bai si Gideon — karinana lot ngo 77 kalak.

¹⁵Enggo kessa i laus mo si Gideon menjumpai pengulu-pengulu i kuta i ninganna mendokken, “Pasti ngo ièngèt kènè dèng pennah itonja kènè lako mengurupi aku, kumernaken oda dèng kutangkup si Zebah dekket si Salmuna, otang bagi? Nggèut poda giam kènè memerèken pangaen bai anak buahku; keppèken ledja kalohon ngo kalak i ibas katika i. Tengngen, èn ngo si Zebah bak si Salmuna.”

¹⁶Enggo kessa bagi ibuat si Gideon mo dori bak tada-tada i padang gurun nai, nai ibatbat mo pengulu-pengulu kuta Sukot idi.

¹⁷I Pnuel pè irumpakken mo palas kuta i janah ibunuh karina nasa anak laki sini kuta i.

¹⁸Enggo kessa bagi ikuso si Gideon mo taba si Zebah bak si Salmuna, “Bakunè ngo rupa kalak sinibunuh ndènè i Tabor i?” Ialoi si Zebah bak si Salmuna mo, “Karina kalak i tosè bagè kono, bagè pemparen raja.”

¹⁹“Kaka-anggingku mo idi — dukak-dukak inangku,” nina si Gideon. “Mula oda kin ibunuh kènè kalak i ngganè aku pè oda ma ngo bunuhenku kènè.”

²⁰Nai nina si Gideon mo mbang si Jeter, dukakna situaen, “Bunuh mo kalak i.” Tapi bajar dèng ngo ukum si Jeter. Nai mbiar ngo ia gabè oda roh gèutna menintak peddangna lako memunuh.

²¹Idokken si Zebah bak si Salmuna mo taba si Gideon, “Baing mo, mula daholi ma ngo ko, bunuh mo kami merkitè tanganmu sendiri!” Nai ibunuh si Gideon mo kalak i ninganna ibuat karina perhiasen silot i kerahong unta kalak i.

²²Nai nola idokken bangsa Israel mo taba si Gideon, “Enggo ngo ipaluah kono kami ibas kuasa kalak Midian nai. Kumerna i kono mo nemmuken gabè pengulu nami — kono dekket pinemparmu.”

²³Ialoi si Gideon mo, “Oda. Oda aku gabè pengulu ndènè; anakku pè oda. JAHOWA ngo pengulu ndènè.”

²⁴Tapi nina si Gideon nola dèng ma ngo, “Pellin sada ngo kessa pengidoenku, kudung-kudung sinirampasen ndènè bai musuh nai, berrèken kènè mo nemmuken i taba aku.” (Cemmalna kalak Midian memakè sobeng emmas; dos bagè kalak sidèbanna simerian i perkersiken).

²⁵“Selloh” nina kalak i mengaloi, “lolo ngo ukur nami memerèken taba kono.” Nai ipekimbang kalak i mo sarambar oles, nai merrohen mo gennep kalak i janah menggamparken i sidi kudung-kudung sinirampas kalak i bai musuh nai.

²⁶Karina kudung-kudung emmas siniberèkenna bai si Gideon ibas katika i botongna lot ngo hampir duapuluh kilo, oda dèng dekket perhiasen-perhiasen, bura, oles mètem sinipakkè raja-raja Midian, dekket bura silot ibas kerahong unto kalak i.

²⁷Ibas emmas idi nai, ibahan si Gideon mo sada gana-gana sembahen, nai ibakin mo i kutana, imo i Ofra. Karina kalak Israel laus mo mi sidi lako menembah gana-gana sembahen i, gabè oda nèngè mo isarihken kalak i Dèbata. Janah gabè aring ngo i bai si Gideon dekket simpangansa.

²⁸Oda nèngè mo ndorok merkèkè kalak Midian; enggo mo italuken kalak Israel kalak i. Nai mènak mo nagerri idi empatpuluh tahun dekkahna sidekkah nggelluh dèng si Gideon.

²⁹Kessa geraha idi, balik mo si Gideon mi kutana janah merian i sidi.

³⁰Lot ngo pitupuluh kalak dukakna daholi, kumerna mbuè ngo sinibagesna.

³¹Lot dèng ma ngo siterbuangna i Sikhem; tarap siterbuangna ènda nai lot ngo sada anakna sinigerarenna si Abimelekh.

³²Enggo kessa nggeddang kalohon umurna matè mo si Gideon anak si Joas i. Ikubur ngo ia i perkuburen si Joas, bapana. Ia pendèbaen idi bekkasna i Ofra ngo, imo kuta horong si Abiezer.

³³Enggo kessa matè si Gideon, oda nèngè mo setia kalak Israel taba Dèbata. Isembah kalak i mo Dèbata Baal janah ibaing mo Baal-Berit gabè sembahen kalak i.

³⁴Oda nèngè mo mersembah kalak i taba JAHOWA Dèbata kalak i, sienggo paluahken kalak i ibas kuasa karina musuh i sikuliling kalak i nai.

³⁵Bagi ma mo oda lot ibettoh kalak i memales simerandal bai dukak-dukak si Gideon ibas karina pengkepkep si Gideon bai bangsa Israel.