Read Batak Dairi Perhukum 9 Bible Online

Perhukum 9 - Batak Dairi bible

Perhukum 9

¹Tikan sidari laus mo si Abimelekh anak si Gideon mi kuta Sikhem bekkas kula-kula inangna. Mengeranai mo ia i sidi dekket kalak i nina mo,

²“Oji mo kusoken bai karina pengisi Sikhem, siapai ngo sisellohen; irajai pitupuluh kalak dukak si Gideon, barang irajai sada kalak sambing? Bagahken ma mo bai kalak i, ukum aku ncelket dèng ngo taba kalak i.”

³Nai laus horong kula-kula inang si Abimelekh idi mendahi kalak Sikhem janah pesakatken tennah si Abimelekh bai kalak i. Nai ipekkatken pengisi Sikhem idi mo lako menguèi si Abimelekh, kumerna dok atè kalak i tuhuna ngo lot dèng perpamilinkenna taba kalak i.

⁴Nai nola dèng ma iberèken kalak i mo tabasa pitupuluh kèpèng pirak sinibuat kalak i ibas bages bekkas mersembah taba Baal-Berit nai. Merkitè riar idi iupahi si Abimelekh mo simpulungen jelma siso meradat lako merdengan tabasa,

⁵nai laus mo kalak i mi kuta bapana mi Ofra. Ibunuh ia mo i sidi sipitupuluh kalak dengan sibeltekna idi i babo sada batu. Tapi ukum si Jotam, anak siampun-ampun si Gideon oda ngo dekket kenna bunuh kumerna ciboni ngo ia.

⁶Nai mertumpu mo karina pengisi Sikhem dekket Bet-Milo, ninganna laus mi benna kayu sempènur keramat i Sikhem. I sidi mo kalak i pebangkitken si Abimelekh gabè raja.

⁷Enggo kessa idengkoh si Jotam tersèngèt i, laus mo ia cènder mi babo Delleng Gerizim, nai mersurak mo ia taba kalak i, “Dengkohken kènè mo aku, alè kènè kalak Sikhem, asa idengkohken Dèbata ma kènè!

⁸Masa mo sikali mertumpu mo kayu lako memilih rajana. Nai idokken kalak i mo taba kayu zaitun, ‘Kono mo raja nami.’

⁹Nai ialoi kayu zaitun idi mo, ‘Ah, oda nggèut aku, nina. Kerna mula gabè raja ndènè aku, kennah gabè mentadi ngo aku menghasilken minak zaitun mahan haliu lako pesangapken sembahen dekket JAHOWA.’

¹⁰Nai nina karina kayu i mo taba kayu ara, ‘Kono mo leh gabè raja nami.’

¹¹Tapi ialoi kayu ara idi mo: ‘Oda nggèut aku, kumerna mula gabè raja ndènè, kennah mentadi ngo aku mer- buahken buah kayu ara tenggi-tenggi.’

¹²Enggo kessa bagi, idokken karina kayu i mo taba kayu anggur, ‘Ukum bagi, kono mo gabè raja nami.’

¹³Tapi ialoi kayu anggur i mo, ‘Mènter mentadi mo aku menghasilken anggur sipesampangken atè sembah-sembahen dekket jelma, petarik-tarik lako gabè raja ndènè sambing!’

¹⁴Kumerna i idokken karina kayu i mo mbang rambah simerdori, ‘Kono mo gabè raja nami.’

¹⁵Ialoi rambah merdori i mo, ‘Mula tuhu-tuhuna ngo kènè nggèut memakin aku gabè raja, roh mo kènè culèndung mi terruhku. Mula oda uè kènè, ruar mo api ibas dahan-dahanku simerdori ènda nai menutung kerri nasa kayu arès sini Libanon.’ ”

¹⁶“Asa,” nina si Jotam mo menguduti, “Tah dok atè ndènè ngo merkitè ipebangkit kènè si Abimelekh gabè raja ndènè, enggo mo dok atè ndènè kènè memaing selloh janah roh ibas ukur mpanting nai? Enggo mo katè ndènè iulaken kènè sipatutna meradepken si Gideon, bapangku, bak horong simpangansa? Enggo mo katè ndènè ibales kè pengkepkep bapangku

¹⁷sienggo mergeraha lako keperluen bai ndènè? Èngèt kènè mo, enggo mengaban-ngabanken kessah ia lako paluahken kènè ibas kuasa kalak Midian nai.

¹⁸Tapi bagèndari iselbuh kènè ngo kadè-kadè bapangku. Enggo ibunuh kènè karina dukak-dukakna enggo ibunuh kene — sikali rabbat pitupuluh kalak i babo sada batu. Ukum si Abimelekh anak bapangku tarap siterbuangna nai ngo ia. Tapi ipebangkit kènè ngo ia gabè raja Sikhem, pellin kumernaken lot dèng perpamilinken ndènè tabasa.

¹⁹Mula tuhu-tuhu ngo selloh janah arap ukur tutus janah mbersih perulaen ndènè i sidari èn meradepken bapangku bak dukak-dukakna, lako mo mersennang-sennang mo kènè dekket si Abimelekh, janah belli mo mersennang-sennang ma ia dekket kènè.

²⁰Tapi mula oda ngo bagi sèntengna, katerra pè remuar mo api bai si Abimelekh nai mengelekkup habis pengisi Sikhem bak Bet-Milo. Janah katerra pè remuar ma mo api tarap pengisi Sikhem bak Bet-Milo nai mengelekkup si Abimelekh.”

²¹Enggo kessa i mperrus mo si Jotam ninganna merian i Bear mo ia, kumerna mbiar ngo ia midah si Abimelekh, dengan sibeltekna i.

²²Tellu tahun mo dekkahna si Abimelekh mengerajai Israel.

²³Nai ipemasa Jahowa mo peraloen taba si Abimelekh meradepken kalak Sikhem gabè ialo kalak idi mo ia.

²⁴Masa pè i imo asa merbales ngo kejahaten si Abimelekh dekket kalak Sikhem simengajar-ngajarisa lako memunuh dukak-dukak si Gideon sipitupuluh kalak i.

²⁵Ibakinken kalak Sikhem idi mo pengerimrim i babo delleng lako menangkup si Abimelekh. Gennep kalak simentas i sidi ipupusi pengerimrim idi. Nai ibagahken mo simasa i taba si Abimelekh.

²⁶Sidangna i enggo roh si Gaal anak si Ebed rasken bak kaka anggina lako merian i Sikhem; janah tok ngo ukur kalak Sikhem tabasa.

²⁷Laus ngo kalak i menapu anggur i pekken-pekken anggur nai, nai ibahan mo ènumen anggur, janah memajek kerja. Mangan mènum mo kalak i i bekkas penembahen sembahen kalak i ninganna menumpahi si Abimelekh.

²⁸“Isè ngo pana kita èn asa kennah tunduk bai si Abimelekh?” nina si Gaal. “Isè ngo ia situhunna? Otang anak si Gideon ngo ia janah rasken si Zebul wakilna i enggo gabè hamba si Hemor, bapa si Sikhem, empungta!”

²⁹“Mula aku kin mengerajai kalak Sikhem ènda, tuhu-tuhu enggo dung kessah si Abimelekh i! Kennah kudokken mbangsa, ‘Aci! Arahken balapergunggungmu janah bèta mi ruar lako juhap!’ ”

³⁰Melaga mo si Zebul, raja kuta Sikhem mendengkoh rana si Gaal idi.

³¹Ipasulak mo pasulakkenna mendahi si Abimelekh lako magahken tennah bagèen, “Enggo roh si Gaal anak si Ebed rasken dekket kaka-anggina mi Sikhem janah mengajar-ngajari pengisina lako mengalo kono.

³²Kumerna i, laus mo kono bak karina orangmu ciboni mi juma tikan berngin.

³³Ceggen baremben enggo kessa mbincar mataniari, kubu mo sintempu kuta idi. Janah mula remuar si Gaal bak orangna mengalo kono, idi mo katikana bamu lako menjuhapsa!”

³⁴Nai kebbas mo si Abimelekh bak karina anak buahna bernginna i. Mersèrak mo kalak i gabè empat nuhnuhen nai ciboni mo kalak idi i sikuliling kuta Sikhem.

³⁵Idah si Abimelekh bak orang-orangna kessa mo karuar si Gaal janah cènder i pèntu pengkeruhen kuta i, mèter karuar mo kalak i karina ibas percibonienna nai.

³⁶Idah si Gaal mo kalak i, nai nina mo taba si Zebul, “Tengon! Lot kalak susur misèn i babo ndelleng nai!” “Ah, oda ngo jelma i,” nina si Zebul, “pellin lèndung delleng i ngo kessa i.”

³⁷Nai nina si Gaal nola mo, “Tuhu! Lot ngo jelma susur i pispis uruk nai, janah sada nuhnuhen nai enggo menuju dempak èn roh kan benna sempènur keramat adèi nai!”

³⁸Idokken si Zebul mo taba si Gaal, “Imo, enggo idikè bagèndari babahmu simbellang i? Nderrangna idokken kono mahan kadènta mo tunduk taba si Abimelekh i? En mo kalakna sienggo nilèanmu i. Lakè mo juhap kènè kalak i bagèndari!”

³⁹Nai ibabai si Gaal mo karuar kalak Sikhem janah mengalo si Abimelekh.

⁴⁰Tapi ijuhap si Abimelekh mo ia gabè mperrus mo ia. Mèduk ngo jelma radas soh mi pèntu pengkeruhen kuta i.

⁴¹Dungna balik mo si Abimelekh mi Aruma, janah merian i sidi. Ipelaus si Zebul mo si Gaal bak kaka-anggina mperrus i Sikhem nai gabè oda nèngè mo ndorok kalak i i sidi merian.

⁴²Sibarembenkenna itebennai kalak Sikhem mo menadingken kuta, naing laus mi juma janah ibagahken mo simasa i taba si Abimelekh.

⁴³Nai ipepulung si Abimelekh mo orang-orangna, janah ibaing mo kalak i gabè tellu nuhnuhen, nai laus mo kalak i ciboni i juma-juma. Itengen kessa mo pengisi kuta i laus mi juma, mendarat mo ia i percibonienna nai, ninganna ibunuhi mo kalak i.

⁴⁴Sinderrangna sagal-sugul si Abimelekh dekket nuhnuhenna mengkubu mi pengkeruhen kuta i, nuhnuhen sidua nai mengeletlet janah memunuhi jelma simperrus mi juma-juma.

⁴⁵Sidarinkenna i iterrusken si Abimelekh ngo juhap janah itaban mo kuta i; ibunuhi mo jelma pengisina, nai ilala mo kuta i, kessa i icirciri dekket sira.

⁴⁶Tikan idengkoh kalak silot ibas bèntèng Sikhem tersèngèt simasa i, mbengket mo kalak i mi bagasen lubang i terruh bages sembahen El-Berit lako ciboni.

⁴⁷Nai ibagahken dèba mo taba si Abimelekh, ukum kalak sinibentèng Sikhem i enggo mertumpu i sidi.

⁴⁸Kumerna i laus mo si Abimelekh bak orangna mi delleng Zalmon. Ipenggelli kalak i mo dahan-dahan kayu merkitè kapak, nai ipersani kalak i mo dahan kayu i i barana, nai idokken ma mo orangna i memakin bagè sienggo nibakinna i.

⁴⁹Asa karina mo kalak i kipenggelli dahan-dahan kayu i, ninganna merdalan mengèkutken si Abimelekh. Karina dahan kayu i ipegukguk kalak i mo i babah lubang bages sembahen i, nai itutung mo sinderrangna ibagasen dèng kalak Sikhem i merian. Kumerna i matè mo karina pengisi Sikhem i, kira-kira seribu kalak anak laki bak daberru.

⁵⁰Enggo kessa i laus mo si Abimelekh mi Tebes. Ikubu mo kuta i janah itaban.

⁵¹I tengah-tengah kuta idi lot ngo sada palas ntegguh kalohon. Nai mperrus mo karina pengisi kuta i mi sidi. Mbengket mo kalak i mi bagasen palas i janah igerruk mo pèntuna, ninganna laus mi babo.

⁵²Enggo kessa i roh mo si Abimelekh mi sidi lako mengkubu palas i. Tikan soh kessa ia mi pèntu palas i janah naing mengelekkup,

⁵³idabuhken sada kalak daberru mo sada batu penggilingen mi babontakalna gabè rettak mo tulan takalna i.

⁵⁴Sagal-sugul mo si Abimelekh mendilo anak perana simerembah sinjatana janah mendokken, “Sintak mo peddangmu janah bunuh mo aku; oda nggèut aku mula idokken dèba aku ibunuh sada kalak daberru.” Asa itikam anak perana idi mo ia gabè matè.

⁵⁵Idah kalak Israel kessa mo enggo matè si Abimelekh, molih mo kalak i karina.

⁵⁶Bagidi mo carana Dèbata memalesken taba si Abimelekh kumernaken kejahaten sinibakinna meradepken bapana, kumerna ibunuh kaka-anggina sipitupuluh kalak.

⁵⁷Janah ihukum Jahowa ma ngo kalak Sikhem kumerna kejahaten kalak i. Tosè ngo simasa i bagè sienggo idokken si Jotam anak si Gideon terèngèt kalak i tikanna isumpahi kalak i.