Read Batak Dairi 2 Johanes 1 Bible Online

2 Johanes 1 - Batak Dairi bible

2 Johanes 1

¹Bangku nai ngo surat èn, pengendeng kuria, mendahi inang sienggo ipilih Dèbata, bak mendahi dukak-dukakna sikukekkellengi tuhu-tuhu. Oda ngo pellin aku sambing, dekket ngo taba karina simenandai sukuten sènteng bai Dèbata nai simengkekelengi kènè,

²ai enggo merian ibagasensa berita sènteng tarap Dèbata i nai janah dak ngo rebbak dekket kita soh mi amman sumendah.

³Dak iberrèken Dèbata mo banta pasu-pasuNa, masèh atèNa dekket damèNa bang Jesus Kristus Anak Bapanta i, ibagasen kesèntengen dekket kelleng.

⁴Sampang kalohoon ngo atèngku, kerna kudengkoh lot ngo dukak-dukakmu alè nangè mengkenggelluhken kata sènteng bai Dèbata nai, bagè sienggo idokken Bapa i banta.

⁵Kerna naidi alè nangè, memmes ngo kupido bamu asa karinana kita dak mersikekelengen samah kita bang taba dengan pè. Oda ngo kata rembaru sikudokken èn, ai i mulana i nai ngo enggo sijalo i kessa nai percaya kita.

⁶Mersikekkellengen, merlapaten ngo i, siuèi pati-patiin Dèbata. Janah pati-patiin sinidengkoh ndènè i mulana i nai imo asa mersikekelengen dekket dengan.

⁷Enggo mèduk kalak sipengoto-ngotoi mersèrak mi suberri dunia èn, imo kalak siso mempertuhuken Jesus Kristus roh mi dunia èn merrupaken rupa jelma. Kalak sibagidi, perluap ngo i janah Musuh Kristus.

⁸Kerna naidi mermanat mo kènè, asa ulang bennè nola bai ndènè nai sienggo kuberrèken kami bai ndènè i. Kerencetken kènè mo asa karina kènè menjalo upah mertinèncuk bai Dèbata nai.

⁹Kalak siso merian ibagasen peddah Kristus, tapi menurimpang nola ngo i sidi nai, oda ngo rebbak Dèbata kalak sibagidi. Tapi kalak simerian ibagasen peddah Kristus, merlapaten ngo i rebbak Bapa bak Anakna i ngo ia.

¹⁰Kerna naidi, mula lot kalak roh mendahi kènè, janah mengajarken peddah simeralo mi peddah Kristus, ulang jalo kènè kalak i mi bages ndènè; ulang pella dokken kènè ‘njuah-njuah’ taba kalak i.

¹¹Ai barang isè mendokken njuah-njuah taba kalak i, dosken dekket ngo enggo ia bagè kalak i mengulaken perulaan jahat i.

¹²Matcam dèng ngo nemmu bagèna sinaing dokkenkenku taba kènè, tapi kurang ngo sellohna mula merkitè surat. Dok atèngku roh ngo aku mendahi kènè janah mengerana tompel dekket kènè, asa dom sampang atènta.

¹³Menenges salam ngo bamu dukak ni denganmu siterpilih i.