Read Batak Dairi 3 Johanes 1 Bible Online

3 Johanes 1 - Batak Dairi bible

3 Johanes 1

¹Alè Gayus sinikekkellengen! Aku pengendeng kuria, simengkekelengi kono tuhu-tuhu,

²kusodipken ngo asa selloh karinana meradepken kono, janah njuah-njuah ma bagè sikubettoh dak selloh ngo bak tendimu.

³Sampang kalohoon ngo atèngku tikan roh dengan magahken bangku bakunè burjumu mengkenggelluhken berita sènteng bai Dèbata nai.

⁴Oda lot mengelebbihi sampang atèngku dari pada mula kudengkoh dukak-dukakku mengkenggelluhken sukuten sènteng bai Dèbata nai.

⁵Merandal ngo nibaingmu i nggia taba dengan-dengan samah Kristen, bagi ma pè dekket taba simadèng itandai kono pè enggo itamuèi ko.

⁶Enggo ibagahken kalak i karina idi i kuria si nisèn tersèngèt ngkellengmu i. Ulaken mo dakdak mengurupi kalak idi asa ndorok kalak i mennerusken perdalanenna. Janah ulaken mo i merdemmu mi lemmo atè Dèbata.

⁷Ai berkat pè kalak i kemulihken mengulaken ulaan Kristus oda ngo lot pengurupiin bai kalak i ukum bai kalak siso menandai Dèbata nai.

⁸Kumarna i kennah kita samah-samah Kristen ngo mersiurupen, asa merkitè bagidi enggo dekket kita mennukutken berita sènteng bai Dèbata nai.

⁹Enggo kutengesken suratku mendahi kuria i kunu pè joppok, tapi oda iuèi si Diotrepes, kerna dak naing igegohi ngo nola katèna asa ia nola pengendeng kuria.

¹⁰Roh kessa aku sikali èn, kutersèngèti mo ulah-ulahna i, imo kejahatenna dekket luapna lako mengelèai kami! Oda pellin i kessa tupèh, ai tikan roh dengan samah Kristen, oda uè ia menjalo janah dekket ngo kalak siuè menjalo pè gabè igerra, janah ipellaus ngo dengan idi i kuria i nai.

¹¹Ulang mo èkutken simeroha i nggia, tapi simerandalna i mo codi. Bai Dèbata nai ngo rohna karina kalak simaingken selloh, janah barang isè kalak oda memmaing selloh, oda dèng itandai ia Dèbata.

¹²Karina ngo kalak memmoji si Demetrius, janah Dèbata pè memmojisa ngo. Kami pè kupoji kami ngo ia kerna selloh ngo pengindangkenna i, janah ibettoh kono ngo, bennar ngo pengindangken nami i.

¹³Matcam dèng ngo nemmu bagèna sinaing dokkenkenku bamu nggia, tapi kupikiri oda selloh mula arap surat kubaing.

¹⁴Kuharap ngo oda pella ndekkah nèngè roh ngo aku asa pejumpa kita janah asa hadep kita mengeranai.

¹⁵Dak damè mo bamu! Menenges salam ngo bamu dengan silot i bekkasku, janah pessoh ma salamku taba karina dengan mersada-sada.