Read Batak Dairi Alamat 1 Bible Online

Alamat 1 - Batak Dairi bible

Alamat 1

¹Isi bukku èn imo terrèngèt kadè sinipetarar Jesus Kristus terrèngèt barang kadè sinaing masa oda pella ndekkah nè- ngè. Ibagahken Dèbata ngo taba Kristus asa pacidahken taba pengendeng Dèbata kadè sinaing ndor nè masa. Ipasulak Kristus ngo malaèkatNa taba si Johanes naposoNa, lako magahken simasa i tabasa.

²I indangken si Johanes ngo kata Dèbata janah ikesaksiken ngo tersèngèt Jesus Kristus imo tersèngèt sagumanNa sienggo idah.

³Sayurntua ngo simenjaka dekket simendengkohken kata alamat èn dekket simenjamoti sitersurat ibagasenna, ai ndessing ngo enggo ketikana.

⁴Kènè dengan silot i sipitu kuria i Asia! Aku, si Johanes, mengharapken dak ipasu-pasu Dèbata mo kènè, imo Dèbata bagèndari — Dèbata i sinderbi nai janah Dèbata sinaing roh i — bagi ma dekket tendi sipitu silot i hadeppenna sirebbak memerèntah dekket Dèbata,

⁵dekket bai Jesus Kristus saksi kettoken idi nai. Ia ngo perlebbè ipegelluh i simatè nai janah Ia ma ngo merkuasa taba raja-raja ni dunia èn. Masèh mo atè Jesus midah kita, janah merkitè permatèNa i, Ipaluah ngo kita ipas dosanta nai.

⁶Ibaing ngo kita gabè keturunen raja janah gabè malim i kerajaen Dèbata BapaNa i. Bai Jesus i mo kemuliaan dekket kuasa soh mi amman sumendah! Amèn.

⁷Tengen, roh mo Ia ibagasen hembun! Karina ngo mengidahSa bang kalak sienggo memmantemSa i pè. Derru-derru mo karina bangsa silot i dunia èn menderruken diriNa kumarnakensa. Imo tuhu! Amèn!

⁸“Aku ngo Alpa dekket Omèga (Bennana dekket puncana),” nina Tuhan Dèbata, simengkuasai sagumanna silot. Dèbata bagèndari, Dèbata sienggo lot kin janah Dèbata sinaing roh i.

⁹Aku si Johanes dengan ndènè sisada nasip ibas kinidersa siniakapen gennep simengèkutken Kristus. Mbingit ngo kita menggong sindersa sebagè ummatNa. Mi pulo Patmos ngo aku ibuang kumarna kusukutken Kelluahen bai Dèbata nai, sinipesoh Jesus.

¹⁰Tupung ari Tuhan i, ikuasai Tendi Perbadia ngo aku — nai kudengkoh mo sora i podingku nai nggang kalohoon tosè bagè sora sarunè mengerana.

¹¹Bagèen nina, “Suratken mo si niidahmu mi sada lapihen, nai tengesken mo i mi kuria sipitu èn, imo Epesus, Smirna, Pergamos, Tiatira, Sardis, Piladelpia dekket Laodikia.”

¹²Tumulih mo aku mi podi, menengen isè simermongkami aku i, gabè kuidah mo pitu pelita emmas mernèhè.

¹³I tengah- tengah pelita i kuidah cènder tosè bagè jel- ma memakè jubah nggeddang soh mi nèhèna. Janah i tentenNa lilit kokos emmas.

¹⁴Mbulan ngo bukNa bagè kapas, mernala-nala ngo mataNa bagè api;

¹⁵nèhèNa merkillong bagè tembaga niumbaken i perpandèen, soraNa gumeruhguh bagè sora sampuren ndates.

¹⁶Ijèmak tanganNa kamuhun ngo pitu bintang janah karuar ngo i babahNa nai peddang sidua babah ntajem kalohoon, nai mercala-cala ngo abèNa bagè mataniari mpilngas.

¹⁷Kuidah kessa Ia, tangkep mo aku i lebbè nèhèNa bagè sienggo matè; nai Iampèken mo tanganna kamuhun taba aku, ninganna idokken, “Ulang kono mbiar! Aku ngo merkuasa i mulana nai soh mi puncana.

¹⁸Aku simemerèken nggelluh! Sienggo matè kin ngo enggo Aku arnia, tapi tengen mo, nggelluh ngo Aku soh mi amman sumendah. Merkuasa ngo Aku bang i kemmatèen bang bekkas i balik i.

¹⁹Kernana idi suratken mo si niidahmu, imo simasa bagèndari dekket sinaing masa i podiin èn.

²⁰Èn ngo rusia bintang sipitu si niidahmu i tanganKu dekket pelita emmas mernèhè i. Ukum bintang sipitu i, imo malaèkat-malaèkat sipitu kuria, janah nèhè lampu sipitu i, imo kuria sipitu i.”