Read Batak Dairi Alamat 18 Bible Online

Alamat 18 - Batak Dairi bible

Alamat 18

¹Enggo kessa i, kuidah mo sada kalak malaèkat sidèban susur i sorga nai. Mbelgah ngo kuasana. Kumarna cuhayana, ncihur ngo suberri dunia èn ibaing.

²Nggang kalohoon ngo idiungken, “Enggo tumpat Babel simbellen i! Enggo tumpat daberru i! Bekkas sètan dekket tendi jahat ngo ia, janah ranjang-ranjang manuk-manuk si nikecegoken jelma.

³Karina bangsa enggo mengènum anggur pengellakona luhlah i, janah raja-raja dunia èn enggo merlangkah julu meddem dekketsa. Enggo bèak karina pertiga-tiga i suberri dunia èn kemulihken nipergeddo dagingna siso terantaken i.”

⁴Nai kudengkoh mo sora sidèban i sorga mendokken, “Karuar mo kènè alè ummatKu! Karuar mo kènè ibagasenNa nai! Ulang mo ièkutken kènè dosa-dosana i, asa ulang dekket kènè menggongken hukum simengenna bana!

⁵Ai enggo mertinèncuk dosana soh mi langit, janah enggo ièngèt Dèbata karina kejahatenna i.

⁶Balesken kènè mo bana tosè bagè pemmaingna i bai ndènè; balesken kènè mo dua kali lempit bana, bales ni karinana pemmaingna i. Baing kènè mo perrènumenna dua kali lempit lebbih mperngis dari pada ènumen si nipènumkenna bai ndènè.

⁷Baing kènè mo bana kinidersa dekket kinipersuk dos buèna bagè kesangapen dekket kiniduma si ni abinkenna mi dirina, ai dak nina ngo mi dirina, ‘Aku ngo raja, oda mbalu Aku, oda kurasai bonek!’

⁸Kumarna naidi ngo asa ipas sidari roh olpek bana — persakiten, bonek bak lèhè. Itutung mo ia ibas api, ai sondel ngo kuasa Tuhan Dèbata simenghukumsa.”

⁹Karina raja si ni tanoh èn sienggo dengan daberru i mengulaken luhlah dak menangisi kuta i, mula idah kalak i kessa mo mercèmpul cèmber i api simengelettupsa i nai.

¹⁰Ndaoh-ndaoh mo kalak i cènder, ai mbiar ngo ia kenna kepersukenna i, janah nina mo, “Inang ngalè nang, sondel kinipersuk ngo mengenna taba — kuta Babel sitermurmur janah kuta ntegguh i! Ibagasen sada jom sambing ngo roh hukum lako petumpatken kono!”

¹¹Pertiga-tiga ni dunia èn pè tangis mo janah bonek kumarna oda nèngè lot menokor tiga-tiga kalak i.

¹²Oda lot nèngè menokor emmas, pirak, intan dekket mutiara kalak idi i; bagi ma dekket kaèn linen, kaèn mbara, sutera bak kaèn mbalo, bagi ma dekket kayu maharga, gading bak barang-barang kayu maharga, tembaga, bessi dekket marmar;

¹³kulit manis, rempah ratus, pemurpuri, minak mur bak kemenjen; kuda bak kurèta, katoban bang jelma pè.

¹⁴Nina pertiga-tiga i mo taba daberru i, “Karina sinaing imiliki kono, oda ngo lot nèngè, janah karina si nikecemmalkenmu dekket kinimendèmu enggo mo mersep. Oda nèngè jumpa kono i!”

¹⁵Pertiga-tiga sienggo gabè kaya jong i kuta i nai gabè ndaoh-ndaoh mo ia cènder, ai mbiar ngo kalak i dais mi kinipersuk kuta i. Dak tangis ngo kalak i janah merhendem,

¹⁶nina ngo, “Nong ngalè nang, cilakana i kuta sitermurmur i! Ncemmal kin ngo ko merpakèen linen janah meroles mbara mbèrèng, dakdak kin ngo kono memakè emmas, intan bak mutiara pè!

¹⁷Keppèken ibagasen sada jom sambing ngo enggo mo mago karina kinibèakna i!” Ndaoh-ndaoh nai ngo cènder juru mudi dekket pesisir, bak perkeppel dekket karina simencari i laut,

¹⁸janah dak mendilo-ndiloken tikan idah kalak i mercèmpul cèmber api simengelettup kuta i, nina mo, “Oda lot i dikè kuta bagè kuta mbellen èn!”

¹⁹Nai icircirken kalak i mo cirabun mi babontakal mahan tanda bonek, ninganna derru-derru, “Nong ngalè nang cilakana i kuta mbellen èn! Kinibèakna i ma ngo makinken kalak perkeppel i laut gabè kaya, keppèken ibagasen sada jom sambing, enggo mersep bana nai karinana!”

²⁰Mersampang atè mo kono alè sorga, dekket kènè alè ummat Dèbata, bagi ma rasul-rasul dekket nabi-nabi pè, ai enggo ibalesken Dèbata hukum bana mahan bales sinibakinna i bai ndènè!

²¹Enggo kessa i, ipekèkè sada malaèkat mergegoh mo sada batu — mbellen nasa lessung mbellen — ibentirken mo i mi laut, ninganna idokken, “Bagèen ngo carana kuta Babel sitermurmur idi ibentirken gabè oda jupa nèngè.

²²Oda nèngè terdengkoh i tengah-tengahmi sora kucapi dekket sora perendè bang sora sordam bak sarunè pè! Oda nè dapet i tengah-tengahmi kalak pandè meneppa, barang sora mennutu pè mak terdengkoh nèngè i sidi.

²³Oda lot idah dèba nèngè bendella togok i tengah-tengahmi; oda nèngè terdengkoh oang-oang tikan merbayo i sidi, ai enggo sap i suberri dunia èn pertiga-tigamu janah kemulihken kedatunmu ikilang kono ngo karina bangsa ni tanoh èn!”

²⁴Ihukum pè Babel i, kumarna terdapet ngo i kuta i daroh nabi-nabi, daroh ummat Dèbata — dekket daroh karina siterbunuh i dunia èn.