Read Batak Dairi Alamat 19 Bible Online

Alamat 19 - Batak Dairi bible

Alamat 19

¹Enggo kessa i kudengkoh mo sora merdengung bagè sora jelma nterrem i sorga nai dak mendilo-ndiloken, “Halèluya! Bai Dèbatanta ngo kelluahen, kemuliaan dekket kuasa!

²bennar janah sènteng ngo hukumNa! Enggo idabuh hukum taba perlangkah julu meddem mbellen i, sienggo mencèdai dunia èn merkitè perulanna luhlah i. Enggo ihukum Dèbata Ia, bales kumarna ibunuh kalak i naposo Dèbata.”

³Nai nina jelma nterrem i dèng ma, “Halèluya! Mercèmpul ngo mi dates cèmber simengelettup kuta i soh mi amman sumendah!”

⁴Nai tangkep mo pengulu siduapuluh empat i dekket pernggelluh siempat simencingkoi tahta i lako mersembah taba Dèbata sikundul i tahta i. Nina kalak i mo, “Amèn, Halèluya!”

⁵Nai terdengkoh mo sora i tahta i nai mendokken, “Poji kènè mo Dèbatanta alè kènè karina naposoNa dekket kènè karina simerkebiaren midah Dèbata, singkèdèk bang simbelgah pè!”

⁶Enggo kessa i kudengkoh mo sora bagè sora jelma nterrem kalohoon bagè sora laè mbellen merdeggar janah purpar bagi, bagè sora renggur, nina mo: Halèluya! Tuhan Dèbatanta simenggem-nggemmi karinana i ngo bagèndari memmerèntah.

⁷Lolo mo kita janah mersampang atè; sipoji mo kesangapenna i; kerna enggo dapet ari perbayonken Anak Biri-biri i, janah enggo merkebbas berru tokoren i.

⁸Enggo iberrèken bana oles ndalit merkillong i mahan pakèen [Pakèen ndalit merkillong idi imo pengelako mendè ummat Dèbata.]

⁹Nai nina malaèkat i mo taba aku, “Suratken mo èn; sayurntua ngo barang isè idilo mi pèsta perjejapen Anak Biri-biri i.” Janah nina malaèkat i dèng ma, “Èn ngo kata bennar bai Dèbata nai.”

¹⁰Jadi tangkep mo aku i hadeppen malaèkat i naing mersembah, tapi mèter nina mo taba aku, “Ulang aku sembah kono, tapi Dèbata mo sembah! Aku pè denganmu naposo ngo janah tosè bagè kaka-anggimu sienggo menjalo sukuten bai Jesus nai!” Ai tendi ngo mendasdas nabi-nabi i mengkesaksiken tersèngèt Jesus.

¹¹Nai kuidah mo mbuka sorga janah remuar mo sada kuda putih. Ukum simemmasang kuda i mergerar Kettoken janah Persènteng ngo. Adil ngo ia mendabuh hukum bang ibas geraha pè.

¹²Bagè nala api ngo mataNa janah merudang ngo takalNa. Iokirken ngo sada gerar ipas dagingna janah isè poda bettoh-bettohen i laènken Ia.

¹³Merguyu daroh ngo jubahna. Gerarna idokken, “Kata Dèbata.”

¹⁴Ièkut-èkut balapergunggung sorga ngo Ia janah karina kalak i mengkunduli kuda putih bak meroles kaèn linen putih mersillak.

¹⁵Karauar ngo i babahNa nai sada peddang ntajem kalohoon, janah merkitè peddang i ngo italuken karinana bangsa, janah iperèntah ngo kalak i merkitè tongket bessi. Ia ngo mengilang anggur ipas pengilangen anggur pungur Dèbata simenggem-nggemmi karinana.

¹⁶Tersurat ngo gerarNa idi ipas jubahNa dekket ipas pahaNa, “Raja ni karina raja janah Tuhan ni karina tuan.”

¹⁷Nai kuidah mo sada kalak malaèkat cènder i babo mataniari. Nggang ngo idiloken taba karina manuk-manuk simerkabangen i, “Roh mo kènè pulung mi kerja mbellen nisukutken Dèbata!

¹⁸Roh mo kènè kipangan jukut daging raja-raja, jukut daging pakalima-pakalima dekket jukut daging ummat manusia simbelgah bang singkèdèk pè, hamba barang siso hamba pè.”

¹⁹Nai kuidah mo binatang i dekket raja-raja dunia èn bak balapergunggungna mertumpu lako geraha mengalo simemmasang kuda putih i bak balapergunggungNa.

²⁰Nai tertangkup mo binatang i rebbak dekket nabi palsu sienggo menghanaken tanda kelengangen i hadeppen binatang i. (Merkitè tanda kelengangen i ngo ikilang binatang i jelma sienggo lot pertanda binatang i bana, dekket kalak simenembah gombarenna.) Nai ibuang mo gelluh-gelluhen binatang i dekket nabi palsu i mi laut api barèrang mergollah-gollah.

²¹Balapergunggungna i pè iripasken ngo merkitè peddang sikaruar i babah simemmasang kuda putih i nai. Jadi merrohen mo manuk-manuk kipangan jukut kalak siterbunuh i sanga bessuren.