Read Batak Dairi Alamat 22 Bible Online

Alamat 22 - Batak Dairi bible

Alamat 22

¹Nai ituduhken malaèkat i dèng ma mo taba aku laè kenggelluhen i, nciho kalohoon janah ncerling menjarir i tahta Dèbata nai dekket i tahta Anak Biri-biri i nai,

²soh mi tengah ndalan mbellen ni kuta i. I biding laè i kacimbang lambung, lot ngo kayu kenggelluhen dak merbuah dua belas kali sitahun, imo gennep bulan. Ukum bulungna mahan daun pejuahken karina bangsa.

³Oda lot i kuta i sikenna sumpah Dèbata. I kuta i ngo tahta Dèbata bak Anak Biri-biri i. I sidi ma ngo naposo Dèbata menguèi Dèbata,

⁴janah idah kalak i mo abè Dèbata. Tersurat ngo gerar Dèbata i perdempaken kalak i.

⁵Oda perlu bai kalak i lampu barang cuhaya mataniari pè, ai oda lot nèngè berngin i sidi, ai Tuhan Dèbata sendiri ngo menendangi kalak i. Nai rebbak memerèntah mo kalak i soh mi amman sumendah.

⁶Nai nina malaèkat i mo taba aku, “Tuhu ngo kata èn janah kettoken. Tuhan Dèbata simemerèken Tendina taba nabi-nabi, Ia ma ngo mengutus malaèkatNa lako magahken mendahi naposona sinaing masa ndor èn.”

⁷“Peratè-atèken mo ènda!” nina Jesus. “Ndor mo Aku roh. Sayurntua ngo kalak simemperatè-atèken alamat sitersurat ibas bukku èn!”

⁸Aku si Johanes ngo sienggo mendengkoh dekket mengidah karinana ènda. Enggo kessa dung kuidah janah kudengkoh, gabè tangkep mo aku mi hadeppen malaèkat simenuduhken karinana i taba aku, janah naing mersembah tabasa,

⁹tapi nina mo taba aku, “Ulang ko mersembah taba aku! Dèbata mo sembah! Denganmu naposo ngo aku janah bagè kaka anggimu nabi-nabi i dekket bagè karina kalak simengeradum-radumi sipesèngèt ibas bukku èn!”

¹⁰Nina dèng ma, “Ulang mo rusiaken sipesèngèt silot ibas alamat nibagasen bukku èn, ai enggo ndessing ketikana permasana i karinana.

¹¹Barang isè jahat, iempet mo maing jahat, barang isè melamun, makin ilamuni mo dirina, barang isè menguèi Dèbata janah barang isè nggelluh ibagasen Dèbata, terrus mo ia nggelluh ibagasen Dèbata.”

¹²“Radumi mo èn!” nina Jesus. “Oda ndekkah nèngè, roh mo Aku merembahken upah taba karinana jelma rembang mi sinibakinna.

¹³Aku Alpa dekket Omèga, Bennana dekket puncana, Perlebbè janah Perpodi.”

¹⁴Sayurntua ngo barang isè simenaptapi olesna soh mpanting ai kalak i ngo kipangan buah kayu kenggelluhen i, janah mbengket mi bagasen kuta i arap pèntuna.

¹⁵Tapi kalak simengulaken kinilèa dekket simerkinangguruun, dekket kalak luhlah, kalak pemunuh, kalak simenembah gana-gana dekket kalak perluap merkitè kata bak pemmahan, karinana sibagidi i ruar ngo bekkasna.

¹⁶“Aku, Jesus ngo mengutus malaèkatKu mendahi kènè asa ibagahken karinana i taba kènè kuria-kuria. Aku ngo pinempar si Daud, Aku ngo bintang pelambuk simercala-cala i.”

¹⁷Nai nina Tendi Perbadia dekket Berru Tokoren i mo, “Roh mo kono!” Karina kalak simendengkoh i mendokken, “Roh mo kono!” Barang isè muasen, roh mo ia! Barang isè uè, itakui mo laè kenggelluhen i, oda pella mennokor!

¹⁸Aku si Johanes, simengindangken karina sipesèngèt nibas alamat èn mendokken: Barang isè menambahi sitersurat ipas alamat èn, itambahi Dèbata mo bana tulbang marè-marè sitersurat ibas bukku èn.

¹⁹Barang isè mengkurangi alamat èn, ikurangi Dèbata mo bana pasu-pasu silot ipas kayu simerrèken kenggelluhen i kuta simbadia i.

²⁰Nina simagahken simasa èn dèng ma, “I mo Tuhu! Ndor ngo Aku roh!” Amèn! Roh mo kono alè Tuhan Jesus!

²¹Dak ipasu-pasu Tuhan Jesus mo kènè karinaNa ummat Dèbata! Amèn!