Read Batak Dairi Rut 1 Bible Online

Rut 1 - Batak Dairi bible

Rut 1

¹Arnia sinderrang mak dèng lot raja kalak Israel, masa mo lèhè i nagerri Kanaan. Sinderrangna i lot mo sada kalak anak laki mergerar si Elimelekh. I horong kalak Efrata nai ngo ia, janah merian i Betlehem i nagerri Juda. Kumarna kelehèen i, nai laus mo ia mi nagerri Moab rebbak dekket sinibagesna, si Naomi, dekket anakna sidua kalak i imo, si Mahlon dekket si Kilyon. Nai merian i sidi mo kalak i. Sinderrang i sidi dèng kalak i matè mo si Elimelekh.

³Nai tading mo si Naomi dekket anakna sidua kalak i.

⁴Duana ngo anakna idi jejap taba berru Moab, imo simergerar si Orpa dekket si Rut. Enggo kessa sipuluh tahun,

⁵matè mo duana anak si Naomi idi, gabè kembalangen sinibalèna dekket anakna sidua i mo si Naomi.

⁶Enggo kessa barang sadikè dekkah nola, idengkoh si Naomi mo enggo ipasu-pasu JAHOWA bangsa Israel merkitè mbuah pagè kalak i. Kumerna i kebbas mo si Naomi bak duana permaènna idi lako menadingken nagerri Moab.

⁷Rasken ngo kalak i berkat lako balik mi Juda. I tengah ndalan,

⁸idokken si Naomi mo bai permaènna sidua kalak idi, “Balik mo kènè mi bages kalak èda, partua ndènè. Katerra pè merandal mo ibaing JAHOWA taba kènè, bagè kènè enggo memaing merandal taba aku dekket bai kalak i sienggo matè i.

⁹Katerra pè ipetupung JAHOWA mo rengkap ndènè asa mengolihi sijahè nola kènè.” Enggo kessa idokken bagidi, itennahi si Naomi mo kalak i asa berkat ia janah isanggohi mo kalak i. Tapi derko-derko mo si Orpa dekket si Rut,

¹⁰janah mendokken taba si Naomi, “Oda, Namberru! Dekket ngo kami rebbak Namberru rasken laus mendapetken bangsa ndènè.”

¹¹“Ulang, alè nggia!” nina si Naomi, “lotiin mo kènè balik. Kadè mo gunana ièkutken kènè aku? Otang oda nèngè ndorok aku menubuhken anak mahan sinibalè ndènè?

¹²Lakè mo balik lè nang, kerna enggo tua-tuasu aku lako sijahè nola. Janah mula pè lot dèng harapenku lako sijahè ibagasen berngin ènda ma janah menubuhken anak,

¹³mèter nggèut mo kènè memèma lebbè mbelgah kalak i? Mènter kumernaken idi nola mo gabè sondat kènè sijahè bai anak laki sidèban? Mada, lè nang, ulang mo bagidi! Melui ngo ukurku mengidah sikennah igongken kènè kumerna hukum JAHOWA taba aku.”

¹⁴Nai makin nggang mo tangis si Orpa dekket si Rut, nai itennahi si Orpa mo simatuana i ninganna kisanggohisa, nai laus mo ia balik. Tapi ukum si Rut oda ngo ia nggèut mersirang bai simatuana idi nai.

¹⁵Idokken si Naomi mo tabasa, “Alè Rut, tengngen mo! Enggo balik kakamu mendahi bangsana dekket mendahi sembahenna. Kono pè, lako ma mo alè purmaèn, èkutken mo ia balik!”

¹⁶Tapi ialoi si Rut mo, “Alè Namberru, ulang mo pasulak aku balik bak menadingken kono! Naing dekket ngo aku rebbak Namberru. Barang pak dikè pè kono laus Namberru mi sidi ma mo aku laus. Barang i dikè pè Namberru merian i sidi ma mo aku naing merian. Bangsa Namberru i ngo bangsangku! Dèbata sinisembah Namberru i ma mo sikusembah.

¹⁷Barang i dikè Namberru matè, i sidi ma mo nemmu aku matè janah ikuburken. Ihukum JAHOWA mo aku mberrat kalohon mula nggèut aku sirang bai Namberru nai, laèn mo mula kematèen menirang kita!”

¹⁸Idah si Naomi ngo dak ijuljulken si Rut ngo kennah dekket, gabè oda nèngè terdokkensa barang kadè.

¹⁹Nai iterrusken kalak i mo perdalanenna soh mi Betlehem. Soh kessa kalak i mi sidi, gontar mo karina kuta i. Idokken daberru sinisidi mo, “Tuhuna ngo ndia i si Naomi?”

²⁰“Ulang nè mo dilo kè gerarku si Naomi,” nina si Naomi, “diloken kènè sambing mo aku si Mara, kumarna enggo ibelli Dèbata Pergegoh Sisotercodi i aku nggelluh ibagasen kinidersa.

²¹Sinderrang laus aku i sènda nai cukup ngo lot baku, tapi bagèndari ibabai JAHOWA ngo aku balik kadèngku poda lot nèngè. Kumerna i ulang nèngè mo gerari kènè aku si Naomi, kumerna JAHOWA Pergegoh Sisotercodi i enggo menghukum aku merkitè mermatcam bagè kinidersa.”

²²Bagidi mo tori-torinna bakunè perbalik si Naomi i Moab nai. Soh mo kalak i mi Betlehem tikan mulai mosin merrani.