Read Batak Dairi Rut 2 Bible Online

Rut 2 - Batak Dairi bible

Rut 2

¹Lot ngo sada kalak sincelket si Naomi, tarapken sinibalèna, si Elimelekh arnia. Bèak ngo ia janah kalak mersangap. Gerarna si Boas.

²Tikan sidari nina si Rut mo taba si Naomi, “Namberru, paduè mo aku laus mi juma lako memitiki pagè simerdabuhen ibas tangan pemotik idi nai. Katèngku bakunè pè lot nai ngo kalak memelli aku mengulaken bagi.” “Selloh, lè nang!” nina si Naomi, “lako mo!”

³Nai laus mo si Rut mi juma janah menjemputi pagè kan podi simerani idi nai. Keppèken tupung mo ia laus mi juma si Boas.

⁴Oda kellang sadikè ndekkah roh mo si Boas i Betlehem nai janah mendokken njuah-njuah taba si merrani idi. “Katerra pè dak idengani JAHOWA mo kènè,” nina. Ialoi simerani idi mo, “Katerra pè ipasu-pasu JAHOWA mo kènè Partua nami!”

⁵Nai ikusoken si Boas mo taba mandurna, “Isè ngo daberru adèi?”

⁶Ialoi mandur idi mo, “Daberru bangsa Moab ngo ia rimbaru roh dèng rebbakken si Naomi i nagerri Moab nai.

⁷Ipengidoken ngo baku nai asa ndorok ia mengèkut-ngèkut kan podi pemotik idi lako mitiki pagè simerurusen. Mulai ceggen i nai ngo ia pukpuk karèjo janah bagèndari dèng mo asa mengadi ia sikejap i sapo-sapo i.”

⁸Nai idokken si Boas mo taba si Rut, “Dengkoh mo lebbèken. Ulang pella laus ko memitiki pagè sinijuma ndèba. Sinisèn i sambing mo pitiki rasken dekket pengulangku daberru i. Datèken mo barang mikè kalak i laus merrani. Dak èkutken mo kalak i janah ulang ndaoh-ndaoh ko bai kalak i nai. Mula muasen kono, buat sambing mo laè ibas kiong sienggo isini pengulu anak laki i. Enggo kudokken asa ulang iganggu kalak idi kono.”

¹⁰Mendengkoh idi, sujud mo si Rut i lebbè si Boas janah mendokken, “Oda ngo patut aku menjalo bagidi sellohna pemakin ndènè. Kalak sidèban ngo aku janah oda nemmuken pella patut perdatèenken ndènè!”

¹¹Ialoi si Boas mo, “Enggo kudengkoh ter- sèngèt karina pemaingmu taba simatuamu daberru kessa nai matè sinibalèmu. Enggo kubettoh itadingken kono ngo partuamu dekket nagerrimu lako roh janah merian i sènda rebbak dekket kalak siso tinandaenmu.

¹²Katèrra pè ibales JAHOWA mo karina simendè sinibaingmi. Katerra pè ijalo kono mo kadè sipatut berèenken JAHOWA Dèbata Israel bamu, kumerna enggo kono roh culenggem tabaSa!”

¹³Ialoi si Rut mo, “Mendè kalohon ngo ibakin kènè taba aku, tukasi pè oda dos aku dekket pengula ndènè i. Terrapo kalohon ngo ukurku kerna simerandal sinibakin ndènè idi.”

¹⁴Enggo kessa dapet tikkina mangan, idokken si Boas mo taba si Rut, “Roh mo kènè mangan. En roroh ndènè.” Nai mangan mo si Rut rasken dekket simerani i. Iberèken si Boas dèng ma ngo nditak sinipanggang tabasa, janah bessur ngo si Rut mangan i. Enggo kessa pul mangan, lot dèng ngo ibana.

¹⁵Enggo kessa i laus nola mo si Rut lako mitiki pagè. Enggo kessa laus ia idokken si Boas mo taba pengulana i, “Mula ibuati pagè sienggo nikelcingen, belli sambing mo bagi. Ulang termèla ia bakin kènè barang pè ilagai kènè. Dolien mo pengoroti kènè dèba ipas sienggo ikelcingi idi nai, janah mengerèhrèhken lako bana asa ipitiki.”

¹⁷Inunuti si Rut ngo mitiki pagè i soh ciboen. Enggo kessa ierrik rohi pagè sinipitikenna i, keppèken enggo mo ipepulung lot kira-kira sipuluh kilo.

¹⁸Nai balik mo ia mi kuta merembah hasil sinipitikenna i janah ipacidah bai simatuana sadikè sienggo nipepulungna i. Janah iberrèken ma mo pangaen siso kerrisa sinderrang mangan idi.

¹⁹Nai idokken si Naomi mo tabasa, “I dikè nai ngo dapèt kono èn karina? I juma isè ngo ko karèjo sidari èn? Katerra pè ipasu-pasu JAHOWA mo simemakin selloh taba kono idi!” Nai isukutken si Rut mo bai si Naomi ukum juma bekkasna lako mitiki pagè i imo juma sada kalak anak laki mergerar si Boas.

²⁰“O lè nggia, pamilinta ndessing dèng ngo ukum ia,” nina si Naomi. “Ia ngo sipatut mertanggung jabab taba kita. Katerra pè ipasu-pasu JAHOWA mo ia. Dak ngo ipahèi JAHOWA padanNa, bang bai jelma singgelluhna dèng bak bai jelma sienggo kumellip.”

²¹Enggo kessa i idokken si Rut dèng ma, “Namberru, idokken kalak i dèng ma ngo dahko tabaku, ndorok dèng ngo aku nina memitiki pagè rasken dekket pengulana i soh kerri karina perranien kalak i.”

²²“Uè, lè nggia,” nina si Naomi mengaloi si Rut, “tuhu ngo gia lotien ngo kono karèjo rebbak pengula daberru i juma si Boas i. Kerna mula laus kono mi juma ndèba, nggèut ngo iganggu dèba kono i sidi!”

²³Kumerna i, dak tong mo si Rut mengèkutken daberru pengula i juma si Boas. Dak i sidi mo ia memitiki pagè soh kerri peranien i karina bang peranien perlebbè bak peranien perpodi. Janah sidekkahna i merian rebbak simatuana i ngo si Rut.