Read Batak Dairi Rut 3 Bible Online

Rut 3 - Batak Dairi bible

Rut 3

¹Enggo kessa barang sadikè dekkah nola, idokken si Naomi mo mbang si Rut, “Kennah kuusahaken ngo asa ndorok nola kono sijahè janah mersampang atè.

²Otang mencamet rasken daberru-daberru i juma si Boas, ngo kono? Asa ibettoh ko, pamilinta ngo si Boas i. Asa, dengkoh mo lebbèken! Berngin èn naing laus ngo ia mi jumana mengerrik pagè.

³Bagèndari pè meridi mo ko, pispisi mo dagingmu dekket minak sibaungkus, janah pakkè mo geddamu simerandalna kalohon. Nai laus mo ko mi bekkas i dikè nahan si Boas menarsari. Pema mo i sidi soh pul ia mangan dekket mènum, tapi ulang sanga ibettoh ia i bekkas idi kono.

⁴Datèken mo pak dikè ia laus meddem. Mula enggo terpeddem ia, laus mo kono mi sidi janah ongkam mo cabingna, nai galè mo kono kan telagahenna. Nahan bagahenkenna ngo bamu barang kadè sikennah ulaenkenmu.”

⁵“Uè, Namberru,” nina si Rut mengaloi, “kubakin pè karina bagè sinidokken Namberru idi.”

⁶Nai laus mo si Rut mi bekkas jelma mengerrik i. Ibaingken mo i sidi karina bagè sinidokken simatuana idi.

⁷Enggo kessa pul mangan bak mènum si Boas, puas mo iakap janah sennang ukurna. Nai laus mo ia meddem mi gembar pagè ndierrik i. Hanjar-hanjar roh mo si Rut janah iongkam mo cabing si Boas, nai galè mo ia i gembar nèhèna.

⁸Tengah mberngin terengnget mo si Boas janah naing kumessing. Tapi tersengget mo ia mengidah lot sada kalak daberru meddem i telagahenna.

⁹“Isè ngo ko?” nina si Boas. “Si Rut ngo aku, dahkè,” nina si Rut me- ngaloi. “Pamili ncelket nami ngo keppè kènè sikennah mertanggung jabab i nggelluhku. Katerra pè uè mo kènè memuat aku gabè sinibages ndènè.”

¹⁰“Katerra pè ipasu-pasu JAHOWA mo kono alè nangè,” nina si Boas. “Mertimbangken kadè sienggo nibakinmu bai simatuamu, belgahen dèng ngo sinibakinmu bagèndari pacidahken mbelgah ngkelleng atèmu. Ndorok sambing ngo kono nemmuken menulusi sinibalèmu terposoen ibas kalak sibèak nai barang pè kalak sincor, tapi oda ngo bagi ibaing kono.

¹¹Kumerna i, pos atèmu, alè Rut. Karina sinipergeddomu i kennah kuulaken; kerna karina kalak sinikuta ènda enggo bettoh-bettohen ukum kono sada kalak daberru simerpengelako selloh ngo.

¹²Tuhuna ngo gia, kennah aku ngo mertanggung jabab menggelluhi kono, kumerna pamilimu ncelket ngo aku. Tapi lot dèng ngo sada kalak nai sidèban si kennah mertanggung jabab lako menggelluhi ko. Janah ia dèng ngo sincelketna daripada aku.

¹³I sèn mo kono lebbèken berngin èn. Baremben siceggen kukusoken pè lebbèken barang tah uè ia mengulaken tanggung jababna idi bamu tah barang oda. Mula nggèut ngo ia, selloh; tapi mula oda ngo ia uè, merpadan ngo aku merkitè gerar Dèbata singgelluh i, kuulaken mo tanggung jababku idi. Bagèndari pè meddem mo kono i sèn soh siceggen.”

¹⁴Nai meddem mo si Rut i sidi i gembar nèhè si Boas. Njengkas sibarembenkenna langat dèng enggo kèkè si Rut asa ulang sanga idah dèba. Kumerna oda toko iakap si Boas mula lot sada kalak pè bettoh-bettohen roh si Rut mi bekkas idi.

¹⁵Idokken si Boas mo taba si Rut, “Talkasi mo sabè-sabèmi janah gamparken i sènda.” Nai italkasi si Rut mo sabè-sabèna janah iamakken. Iorèken si Boas mo mi sabè-sabèna i kira-kira duapuluh kilo pagè. Nai iampèken mo mi bara si Rut. Enggo kessa bagi, laus mo si Boas mi kuta.

¹⁶Soh kessa si Rut mi sapo, ikusoken simatuana mo, “Bakunè ma ngo, nggia?” Nai isukutken si Rut mo karina sienggo ibakin si Boas tabasa.

¹⁷“Janah,” nina si Rut menguduti, “ia nola dèng ngo memerèken pagè ènda karina taba aku, kerna nina ia oda ndorok aku balik mendahi Namberru mula kadè poda lot kukanting.”

¹⁸Nai nina si Naomi mo, “Pèma sambing mo nggia, soh mi idah kono barang bakunè dungna nahan. Oda nggèut kom si Boas mula mak dèng merkedungen ènda ibaing sidari èn.”