Read Batak Dairi Rut 4 Bible Online

Rut 4 - Batak Dairi bible

Rut 4

¹Laus mo si Boas mi bekkas runggu i pèntu pengkeruhen kuta. Enggo kessa kundul ia i sidi mentas mo anak laki terncelketten dèng taba si Elimelekh nina si Boas. Nai idiloi si Boas mo ia “Oè, roh ko lebbè kundul mi sèn!” Roh mo ia janah mèter kundul.

²Nai iarahken si Boas mo sipuluh kalak simpantasniasè jelma sinikuta i lako kundul rebbak i bekkas idi. Enggo kessa dogok kalak i,

³mengerana mo si Boas taba jelma si merkadè-kadè dèng dekketsa idi, “Si Naomi enggo balik i Moab nai. Bagèndari naing idèa ngo tanoh milik si Elimelekh arnia, sincelketta i.

⁴Janah katèngku kennah ngo bettohenmu tersèngèt mi si. Mula uè ngo ko menokor, dokken mo i lebbè jelma sikundul i sèn. Mula oda ngo, dokken ma mo ntangkas, kumerna pellin kita sidua ngo merhak tersèngèt mi si; kono perlebbè, nai ipè asa aku.” Ialoi kalak i mo, “Uè, kutokor pè.”

⁵Nai nina si Boas mo, “Selloh mula bagi. Tapi, mula itokor kono tanoh idi bai si Naomi nai, kennah ma ngo igelluhi kono si Rut, daberru Moab i, simengkebaluken anak si Naomi arnia. Kumerna, kennah tong ngo gabè milik pemparen sienggo kumellip idi tanoh i.”

⁶Ialoi kalak i mo, “Ukum bagi ngo, oda tellap aku. Bagèndari pè dolien mo kupaluah hakku kalak perlebbè sipatut kennah menokor tanoh idi. Oda lot gunana kutokor tanoh idi ukum oda ngo gabè milik pinemparku. Sellohen mo kono menokor idi.”

⁷Sinderrangna i mula lot kalak merdèa barang menukar barang kadè hartana, asa lako mensahken sibagidi ncemmalna italkasi simerdèa idi mo solopna, nai iberèken mo i bai sipenokor i. Bagidi mo carana kalak Israel mensahken mula merdèa barang menokor tanoh.

⁸Kumerna i, tikan idokken kalak i bai si Boas, “Sellohen mo kono menokor,” iosari mo solopna ninganna isohken bai si Boas.

⁹Nai nina si Boas mo mbang simpantas niasè dekket karina jelma sinididi, “I ari sidari èn, karina mo kènè gabè saksi enggo kutokor bai si Naomi nai karina silot bai si Elimelekh arnia dekket silot bai dukak-dukakna si Kilyon dekket si Mahlon.

¹⁰Tambahna i nola dèng ma kugelluhi mo si Rut, daberru Moab, simengkebaluken si Mahlon arnia i gabè sinibagesku. Merkitè bagidi hot tong ngo tanoh idi milik tading-tadingen kalak sienggo kumellip idi. Janah pinemparna pè tong ngo lot i tengah-tengah kadè-kadèna dekket i kutana. Èngèt kènè mo idi kaltu, kènè mo karina gabè saksina sidari èn.”

¹¹Idokken karina simpantas niasè bak jelma sidèban sinisidi mo, “Uè, kami mo tuhu saksina. Katerra pè ibakin JAHOWA mo sinibagesmu idi bagè si Rahel dekket si Lea simenubuhken nterrem anak bai si Jakob. Katerra pè nduma mo ko i tengah-tengah horong Efrata janah katerra pè terberita mo ko i Betlehem.

¹²Katerra pè dukak-dukak sinaing berèenken JAHOWA bamu merkitè daberru menguda ènda nai mo memaingken kènè sisimpangaen bagè si Peres, anak si Juda bak si Tamar.”

¹³Nai ibuat si Boas mo si Rut gabè sinibagesna. Ipasu-pasu JAHOWA ngo si Rut gabè mbadan mo ia janah menubuhken sada anak.

¹⁴Idokken daberru-daberru mo taba si Naomi, “Nipoji mo JAHOWA! Enggo iberèken bamu sada kempu daholi i ari sidari èn lako pehèdu-hèduken kono. Katerra pè gabè terberita mo anak i i Israel!

¹⁵Sèang kalohon ngo permaènmu idi bamu. Enggo iberèken bamu lebbih daripada kadè sindorok iberèken pitu anak daholi. Bagèndari enggo iberèken deng ma sada kempu daholi bamu, simemerèken sampang atè rembaru bamu, dekket pehèdu-hèduken kono kessa tua-tua.”

¹⁶Ialeng si Naomi mo anak i ninganna pehèdu-hèduken ibagasen dom kelleng atèna.

¹⁷Ibaing daberru gembar sapona mo gerar anak idi si Obed. Taba karina jelma dak idokken kalak i ngo: “Enggo lot sada anak si Naomi.” Si Obed ènda mo bapa si Isai, janah si Isai mo bapa si Daud.

¹⁸Janah bagèen mo tarombo si Daud, mungkah bai si Peres nai, imo: Si Peres, si Hezron, si Ram, si Aminadab, si Nahason, si Salmon, si Boas, si Obed, si Isai, si Daud.