Read Batak Dairi 1 Samuel 10 Bible Online

1 Samuel 10 - Batak Dairi bible

1 Samuel 10

¹Nai ibuat si Samuel mo gori-gori sin minak zaitun, iarirken mo minak i mi babo ntakal si Saul, isanggoh mo si Saul i ninganna idokken, “Enggo iminaki JAHOWA kono gabè raja kalak Israel bangsaNa i. Kono mo memerèntah bangsaNa dekket mengondingi kalak i bai musuh-musuhna nai. En mo pertandana bamu magahken JAHOWA ngo memilih ko gabè raja taba bangsaNa.

²Enggo kessa itadingken kono aku ari èn, pesimbak mo kono dekket dua kalak daholi ndessing mi kuburen si Rahel i Zelzah i nagerri Benjamin. Dokenken kalak i mo taba ko: Enggo mo jumpa kalodè nitulusenmi. Ukum bapamu oda nè ngo isarihken kalodè-kalodè i, tapi pukpuk ngo ikusoken, bakunè ibakin asa jumpa kono.”

³Nina si Samuel dèng ma, “I sidi nai terrus mo ko merdalan soh mi kayu bekkas mersodip i Tabor. Pejumpa mo ko i sidi dekket tellu kalak daholi lako mi Betel lako mèlèken pèlèen taba Dèbata. Sada kalak mengiring tellu anak kambing, sada kalak nai merembah tellu roti janah sada kalak merembah kiong bebak sin anggur.

⁴Idokken kalak i mo njuah-njuah taba kono janah iberèken mo bamu dua roti sikennah jaloenmu.

⁵Enggo kessa i kennah laus mo ko mi uruk Dèbata i Gibea, imo bekkas perundung-undungen kalak Palistin. I pèntu pengkeruhen kuta i mersibellusen mo ke dekket nuhnuhen nabi mengencuah i delleng pemèlèen nai. Tumataki ngo kalak i ninganna mersurak-surak, memalu genderrang dekket cilat-cilat, sordam bak kucapi.

⁶Tikan bagidi idomi janah ikuasai tendi JAHOWA mo ko gabè ièkuti kono mo tatak dekket surak kalak i, gabè merbakko rembaru mo ko gabè jelma laèn.

⁷Mula enggo kessa masa i, baing mo barang kadè sambing dok atèmu selloh, ai Dèbata ngo denganmu.

⁸Enggo kessa i, kennah laus mo ko mi Gilgal pitu ari dekkahna ko i sidi. Nai roh pè aku lako mèlèken pèlèen situtungen dekket pèlèen perdamèen ninganna magahken bamu kadè sinaing bakinenmu.”

⁹Itadingken si Samuel kessa mo si Saul, mèter ijalo si Saul mo bakko rembaru bai Dèbata nai. Janah karina nibagahken si Samuel tabasa tuhu ngo masa ipas sidarinkenna i.

¹⁰Soh kessa si Saul bak naposona mi Gibea, pesimbak mo kalak i dekket sinuhnuhen nabi. Gejapkenna i mèter ikuasai Tendi Dèbata mo si Saul, janah ièkutken mo tatak dekket surak nabi-nabi i.

¹¹Idah simenandaisa kessa mo sinibaingna i, mersikusoen mo kalak i samahsa, “Kadè ngo maing bagi dukak si Kis i? Mada ngo si Saul pè enggo gabè nabi?”

¹²Nai ikusoi sada kalak sitading i sidi mo, “Bakunè ngo tersèngèt nabi-nabi sidèbanna i — dok atè ndènè isè ngo bapa kalak i?” Imo permulaen umpama èn, “Mada ngo ndia si Saul gabè nabi?”

¹³Enggo kessa pul si Saul tumatak-tatak bak mersurak-surak, laus mo ia mi langgaten i babondelleng.

¹⁴Idah puhun bak naposona ngo si Saul, nai ikusoken mo taba kalak i, “Idikè nai ngo kènè?” ialoi si Saul mo, “Menulusi kalodè si bennè i, janah kumarna oda jupa kami, gabè laus mo kami mendahi si Samuel.”

¹⁵“Nai bakunè nina bamu?” nina puhunna i mengkuso.

¹⁶Ialoi si Saul mo, “Ibagahken ngo ukum pinakan-pinakan i enggo mo jupa.” Tapi oda ngo ibagahken si Saul taba puhunna i sienggo iminaki si Samuel i ia gabè raja.

¹⁷Nai idilo si Samuel mo ginem gem Israel asa pulung i Mispa,

¹⁸janah nina mo taba kalak i, “En ngo idokken JAHOWA, Dèbata Israel. ‘Enggo Kubabai kene mbungkas i Mesir nai janah paluahken kene ibas kuasa kalak Mesir nai dekket karina bangsa sideban simenendes kene.

¹⁹Enggo Kupaluah kènè ipas karina kinidersa ndènè nai. Tapi bagèndari, itulak kènè ngo Aku Dèbata ndènè, kumerna ipido kènè asa Kupebangkit sada raja bai ndènè. Selloh mo i. Pulung mo kènè i hadeppenKu JAHOWA ndènè, merhorong-horong mermarga-marga.’ ”

²⁰Nai idokken si Samuel mo karina horong roh mi lebbè, gabè terpilih mo marga Benjamin.

²¹Tikan roh mi lebbè marga Benjamin gennep jabu, terpilih mo simpangaen si Matri. Perpodi roh mo mi lebbè karina daholi i simpangaen si Matri nai, gabè terpilih mo si Saul anak si Kis, nai itulusi kalak i mo si Saul, keppè oda i sidi ia.

²²Kumarna i mengkuso mo kalak i taba JAHOWA, “Ialè JAHOWA enggo ngo ndia i sèn ia?” Ialoi JAHOWA mo, “Ciboni ngo si Saul i podi barang-barang ugasen.”

²³Nai mèter ialengngi kalak i mo si Saul i sidi nai, iembah mo mi tengah-tengah jelma nterrem. Cènder mo si Saul i tengah-tengah kalak i, ia mo singgeddangna; ai pellin singgat barana ngo kessa jelma sidèbankenna i.

²⁴Nai nina si Samuel mo taba jelma nterrem i, “En mo kalakna nipilih JAHOWA, oda lot bagèsa kita èn karina.” Nai karina bangsa Israel i menurakken, “Njuah-njuah mo raja i.”

²⁵Nai ipeterrang si Samuel mo taba bangsa i tersèngèt hak bak siulaenken raja, janah isuratken ngo i mi bukku ipennep i bekkas simbadia. Enggo kessa i, ipasulak si Samuel mo bangsa i molih mi bagesna gennep.

²⁶Si Saul pè molih ma mo mi bagesna i Gibea, idengani barang piga-piga kalak simergegoh janah berrani sienggo isunggul JAHOWA ukurna.

²⁷Tapi lot ma ngo barang piga-piga kalak jahat mendokken, “Bakunè mo perjadina ia merembahken olih banta?” Ilèai kalak i ngo si Saul janah oda lot iberrèken hadiah bana. Tapi ipakulah ngo oda ibettoh i.