Read Batak Dairi 1 Samuel 11 Bible Online

1 Samuel 11 - Batak Dairi bible

1 Samuel 11

¹Enggo kessa i, iarahken si Nahas raja kalak Amon mo soridaduna mengkubu kuta Jabes i aur Gilead. Ipengido pengisi kuta Jabes mo taba si Nahas bagèen, “Merpadan mo kita, asa tunduk kami bamu.”

²Ialoi si Nahas mo, “Kennah bagèen ngo saratna asa uè aku maing padan, ‘Kennah kucokil karina mata ndènè kamuhun lako mengelèai kènè kalak Israel!’ ”

³Nai ialoi pengulu-pengulu kuta Jabes mo, “Kupido kami mo pitu ari nai dekkahna, asa sanga kupasulak kami utusen nami mi suberri tanoh Israel. Mula oda lot uè mengurupi kami, nai patu mo kami bamu.”

⁴Nai soh mo utusen i mi Gibea, bekkas si Saul. Ibagahken kalak i kessa mo berita i, gabè tangis mo karina jelma nterrem kumarna putus pengakapna.

⁵Tikan bagidi, roh mo si Saul i jumana nai mengiring lembuna. Mengkuso mo ia, “Kadè pana masa? Kasa karina kènè tangis?” Nai ibagahken mo bana berrita niembah utusen i Jabes i nai.

⁶Mendengkoh i, ikuasai Tendi Dèbata mo si Saul.

⁷Merdengan laga itangkup mo dua lembu, isembellih mo i janah itektekki. Ipentengesken mo sienggo nitektekkenna i mi suberri tanoh Israel merdengan perèntah bagèen, “Barang isè oda dekket mergeraha mengèkutken si Saul bak si Samuel, kennah itektekki ma mo lembuna bagèen.” Kumarna mbiar kalak Israel tah kadè nola ibaing JAHOWA bana, gabè karinana jelma mo rebbakken lako mergeraha.

⁸Ipepulung mo kalak idi i Besek. Ibilang mo tellu ratus ribu kalak Israel janah dèng ma tellupuluh ribu kalak Juda.

⁹Enggo kessa bagi nina mo taba utusen kalak Jabes i, “Bagahken mo taba pengisi Jabes, baremben mayak cèger ari, roh ngo pertolongen bai kalak i.” Soh kessa mo tennah i bai kalak Jabes, lolo kalohon mo atè kalak i.

¹⁰Nina kalak i mo taba si Nahas, “Baremben menerrah mo kami. Baing mo guru dokmu taba kami.”

¹¹Njengkas siberembenkenna i, ibagi si Saul mo orangna i tellu nuhnuhen. Mbincar kessa mataniari, isessak kalak i mo mi tengah-tengah perundung-undungen kalak Amon i. Madèng cèger ari, italuken tenterra si Saul mo musuh i. Mula lot pè maluah kalak Amon i, mperrus ngo ia mersara-sara oda giam lot dua kalak rebbak mperrus.

¹²Nai mengkuso mo kalak Israel taba si Samuel, “Idikè ngo kalakna sitikanna i berrani mendokken, oda patut si Saul i gabè rajanta? Sohken mo i bai nami, asa kubunuh kami.”

¹³Tapi nina si Saul mo, “Isè poda ndorok ibunuh sidari èn, kumerna ipas ari èn ngo ipaluah JAHOWA kalak Israel.”

¹⁴Nai nina si Samuel mo taba kalak i, “Ita kènè mo laus karina mi Gilgal, asa sioangken si Saul rajanta i.”

¹⁵Jadi laus mo kalak i karina mi Gilgal. I bekkas mersodip i mo ioangken kalak i si Saul mbangkit raja. Ipèlèken kalak i mo pèlèen perdamèen, nai rebbakken irayaken si Saul bak bangsa Israel mo simasa i.