Read Batak Dairi 1 Samuel 13 Bible Online

1 Samuel 13 - Batak Dairi bible

1 Samuel 13

¹Ipas sidari, tikan enggo mbangkit raja si Saul,

²ipilih mo 3.000 kalak Israel; 2.000 kalak mo i rebbak dekketsa i Mikhmas bak i uruk Betel, janah si 1.000 kalak nai, laus rebbakken anakna si Jonatan mi Geba i nagerri marga Benjamin. Laènkenna i, idokken mo jelma nterrem i balik mi bagesna gennep.

³Nai ibunuh si Jonatan mo pakalima Palistin si ni Geba, janah idengkoh bangsa Palistin ngo simasa i. Nai idokken si Saul mo isempul terompèt mi suberri aur, lako mendiloi kalak Heber asa berkat mergeraha.

⁴Ibagahken mo taba karina bangsa Israel, enggo ibunuh si Saul pakalima kalak Palistin janah sondel mo ceggo atè kalak Palistin midah kalak Israel. Kumarna i iuèi jelma nterrem mo dilo-dilo i asa roh kalak i mi Gilgal lako merpulung dekket si Saul.

⁵Ningan bagidi, enggo ma ngo pulung kalak Palistin lako mengkubu kalak Israel; 30.000 ngo kerèta perang, 6.000 merkuda janah tenterra kalak i bagè buè kersik i biding laut. Merpulung mo kalak i i Mikhmas kan kebincaren Bet-Awen.

⁶Nai imulai kalak i mo mertuhu-tuhu menjuhap kalak Israel, gabè tersessak mo kalak Israel. Dèba ciboni mo kalak Israel i mi liang silot i delleng janah dèba mi kellang-kellang batu karang, dèba mi bagessen telaga bak lubang tanoh i.

⁷Lot ma ngo dèba meneberangi laè Jordan, janah laus mi nagerri Gad bak Gilead. Ukum si Saul i Gilgal dèng ngo, janah jelma nterrem simengèkutkensa menggirgir buradan.

⁸Ipèma si Saul mo si Samuel pitu ari dekkahna, tosè bagè tennah si Samuel bana, tapi laju madèng roh si Samuel mi Gilgal, keppèken enggo mulai itadingken rayatna si Saul.

⁹Kumarna i nina mo taba kalak i, “Embah mo mi sèn pèlèen situtungen dekket pèlèen perdamèen i.” Nai ia sendiri mo memèlèken pèlèen situtungen idi.

¹⁰Tapi idèng pul ibahanken, roh mo si Samuel. Isimbaki si Saul mo ia lako menalamsa,

¹¹tapi mengkuso mo si Samuel, “Kadè ngo enggo sinibahanmu idi alè raja nami?” Ialoi si Saul mo, “Kuidah enggo mulai itadingken jelma nterrem i aku, keppèken kono madèng roh, bagè tikki sienggo ibuhul kono. Janah dèng ma enggo merpulung kalak Palistin i Mikhmas.

¹²Nai tubuh mo sura-surangku, tah bakunè sigedjap nai roh tenterra kalak Palistin lako menjuhap aku i Gilgal èn, keppèken madèng sanga kupido masèh atè JAHOWA. Kumerna i kupetutus ibas ukurku lako memèlèken pèlèen i.”

¹³Mendengkoh i si Samuel nina mo taba si Saul, “Kemotoen ngo pemaingmi alè raja nami. Ukum iuèi Raja i kin nemmu kata Dèbata JAHOWA nidokkenna taba raja i, pasti ibaing JAHOWA raja i dekket pemparen raja i gabè raja kalak Israel soh mi amman sumendah.

¹⁴Tapi ukum bagèndari oda nè ndekkah mergong pemerèntahen raja i, kumernaken oda iuèi raja i perèntah JAHOWA, enggo ipilih JAHOWA sidèban sinikekelengen atèNa lako ipebangkit gabè raja bai bangsaNa.”

¹⁵Nai itadingken si Samuel mo Gilgal janah iterrusken mo langkahna mi Gibea sini aur Benjamin. Ningan bagidi, iperrèso si Saul mo soridaduna kira-kira 600 kalak buèna.

¹⁶Bagi mo si Saul dekket si Jonatan anakna i bak anggotana merundung-undung i Gibea i aur Benjamin; ukum kalak Palistin merundung-undung i Mikhmas ngo.

¹⁷Tikanna i ma mo lot tellu nuhnuhen penamun kalak Palistin berkat i perundung-undungen kalak Palistin i nai lako menamun; sada nuhnuhen laus mi Ofra mi nagerri Syual,

¹⁸nuhnuhen peduaken laus mi Bet-Horon, janah nuhnuhen sisada nai laus mi perbalengen simenghadep Napa Zeboim bak gurun pasir.

¹⁹I suberri Israel oda lot pandè bessi, kumerna oda ipadiat kalak Palistin kalak i menempa peddang dekket kujur.

²⁰Jadi kennah mendahi kalak Palistin ngo laus kalak Israel i mula naing menggarut mata bajakna, pangkur, takkè dekket sabi-sabina;

²¹upahna imo, sada kèpèng kètèk upah mergarut takkè, dekket peliasken ligas-ligas lembu, janah dua kèpèng kètèk mergarut mata bajak barang pangkur.

²²Kumerna i mo memaingken asa sada kalak poda kalak Israel merpeddang barang merkujur tikan geraha i Mikhmas i, laènken si Saul bak si Jonatan anakna i.

²³Kalak Palistin memaing sada bekkas mertaram lako mempertahanken sada lubungen delleng Mikhmas.