Read Batak Dairi 1 Samuel 14 Bible Online

1 Samuel 14 - Batak Dairi bible

1 Samuel 14

¹Tikan sikali idokken si Jonatan mo taba simerembah sinjatana, “Ita mo sidahi bekkas penjagaen kalak Palistin i kèpar adoi.” Tapi oda lot ibagahken i taba bapana.

²Ibas katika i, tupung ngo si Saul i terruh benna ndalima i Migron, oda pella ndaoh i Gibea nai. Buè simengèkutkensa kira-kira 600 kalak ngo.

³(Imam simerembah efod imo si Ahya anak si Ahitub, kaka si Ikabod anak si Pinehas, kempu si Eli, imam ni JAHOWA i Silo.) Jelma nterrem pè oda memettoh perlaus si Jonatan i mi sidi.

⁴Lako soh mi penjagaen kalak Palistin i, kennah mengelausi lubungen delleng ngo si Jonatan, imo ikapit dua batu mamak bagè cara merdori, mergerar Bozes dekket Sene.

⁵Batu karang kan utara mendempak mi Mikhmas, janah sikan Selatan mendempak mi Geba.

⁶Nai idokken si Jonatan mo taba anak perana i, “Ita mo sidahi penjagaen kalak Palistin kalak kapir i. Katèngku iurupi JAHOWA ngo kita. Ai JAHOWA ngo ndorok merèken kemenangen, merkitèken mbuè jelma barang tah merkitèken jelma cituk pè.”

⁷Ialoi anak perana i mo, “Barang kadè naing ibahanken kono, penguèi ngo aku naposomèn.”

⁸“Selloh mo i,” nina si Jonatan. “Tikan naing suberrang i, sipacidah mo dirinta taba kalak Palistin i.

⁹Mula idokken kita asa ndong mèma lebbè roh kalak i mendahi kita ndong mo kita i bekkas i, janah oda pella kita suberrang.

¹⁰Tapi mula idokken ngo asa roh kita mendahisa, mi sidi mo kita, ai imo tandana enggo ipesakat JAHOWA kalak i banta.”

¹¹Tikan ipacidah kalak i sidua dirina taba kalak Palistin i penjagaen i, nina kalak Palistin i mo, “Tengen mo lot adoi kalak Heber karuar ipas liang-liang percibonienna nai.”

¹²Nai idiloken kalak i mo taba si Jonatan dekket taba naposona i, “Roh mo kè menangkeng mi sèn, ai lot naing pacidahen nami bamu.” Nai idokken si Jonatan mo taba anak perrana i, “Ekutken mo aku, ai enggo isohken JAHOWA kalak i taba Israel.”

¹³Berkat mo menangkeng si Jonatan ièkutken anak perrana i. Mohap kessa mo si Jonatan mertangkeppen mo kalak Palistin i ipalui, nai ibunuhi anak perana i mo kan podi nai.

¹⁴Ibas juhap perlebbè i, kira-kira duapuluh kalak mo ibunuh si Jonatan bak anak perana i, ipas bekkas siperempat hèktarè.

¹⁵Gontar mo kalak Palistin kumara simasa i perundung-undungen i jampalen i. Karina kalak Palistin i bekkas penjagaenna bak nuhnuhen penamun, gabè buradan; bagè cara dumegger mo tanoh èn, gabè masa mo kegutturen mbellen.

¹⁶Ningan bagidi, idah tenterra si Saul ngo i Gibea nai i nagerri Benjamin ngo kalak Palistin simerlojangen pesimpar-pesèbut misèn mi sadoi janah bingung.

¹⁷Nai nina si Saul mo taba pengèkutna, “Bilang mo soridadunta i, janah petangkas isè oda i sidi.” Iulaken kalak idi mo perèntah idi, nai terbettoh mo ukum si Jonatan dekket naposona simerembah beddilna oda i sidi.

¹⁸“Embah mo misèn baju efod i,” nina si Saul taba Imam Ahia. (Tupung ari i, iembah si Ahia ngo efod i hadeppen kalak Israel).

¹⁹Sidang mengerana dèng si Saul dekket imam i, muat gontarna mo kalak Palistin i perundung-undungenna, gabè nina si Saul mo taba imam i, “Oda nè sanga kita mido peddah bai JAHOWA nai!”

²⁰Mèter rebbakken kebbas mo si Saul dekket denganna i lako mi perjuhapen i. Idah kalak i mo enggo guttur kalak Palistin i; gabè mersijuhapen mo kalak i samahsa mersibunuhen.

²¹Kalak Heber si rebbak kalak Palistin i aurna, dekket sienggo gabè soridaduna, gabè merbalik janah gabè rebbak dekket si Saul bak si Jonatan.

²²Bagi ma ngo bang kalak Israel siciboni i uruk Efraim, simendengkoh enggo mperrus kalak Palistin, gabè rebbak kebbas mo mengeletlet kalak Palistin i.

²³Juhap mo kalak i mengèkutken dalan soh ilausi Bet-Awen. Arinna i, iurupi JAHOWA ngo kalak Israel.

²⁴Sidari i ndotè ngo pengakap kalak Israel kerna melèhè, kumarna isumpahken si Saul bagèen, “Merjaya mo barang isè kipangan barang kadè sambing pè sidari èn mula makdèng kubalesken hellemku taba musuhku.” Kumarnaken i sada kalak poda lot mangan sidarinkenna i.

²⁵Nai soh mo kalak i karinana mi sada rambah janah idah kalak i mo i sidi mbuè kalohon tenggoli,

²⁶tapi isè poda lot kipangan ipas tenggoli i nai kumerna mbiar kenna sumpah niruapken si Saul i.

²⁷Tapi ukum si Jonatan oda ngo ibettoh enggo iasup bapana jelma nterrem merkitè sumpah i; jadi idoroken mo tongketna siniembahna i, icucukken mo mi cambang tenggoli i, nai ibuat mo tenggoli i janah ipangan. Nai mèter ngguhar mo iakap janah mengolihi mergegoh.

²⁸Nai lot mo sada kalak soridadu i mendokken bana, “Karina kami enggo ndotè kumarna melèhè. Tapi enggo iasup partuamu kami merkitè sumpah, ai nina, ‘Merjaya mo barang isè kalak mangan sidari èn.’ ”

²⁹Ialoi si Jonatan mo, “Enggo lamposu pemaing bapangku i taba bangsanta. Tengngen mo bakunè aku bagèndari, otang ndaoh ngo kalihna enggo kessa kupangan cituk tenggoli i.

³⁰Ukum iduè jelma nterrem i kipangan pangaen sienggo irampasi sinderrang menaluken musuh i, bakunè pè kennah buèen kalak Palistin ndorok sibunuh.”

³¹Sidarinkenna i italuken kalak Israel mo kalak Palistin tikan geraha i mengèkutken dalan i Mikhmas nai soh mi Ayalon. Tapi enggo kessa i, ledja kalohon mo iakap kalak i,

³²gabè merebbut mo kalak i muati harta taban-taban sidapetsa bai musuh idi nai. Iarak kalak i mo biri-biri bak lembu nai isembellih mo i bekkas i, janah mèter bagi mo ipangani tukasi pè lot dèng darohna.

³³Nai ibagahken mo taba si Saul bagèen, “Alè raja nami, enggo merdosa jelma nterrem i meradepken JAHOWA kumarna ipangan jukut dekket darohna.” Nina si Saul mo, “Penelbuh ngo kènè. Goling kènè mo misèn sada batu mbellen.”

³⁴Nai idokken dèng ma taba kalak simerembah berita i, “Dahi kènè mo karina jelma nterrem i janah dokken asa i iring kalak i lembu dekket biri-birina misèn, asa isembellih i babo batu èn, janah ipangan pè i sèn. Merkitè bagidi oda nè ma mo ipangan kalak i jukut dekket darohna janah oda merdosa nè taba JAHOWA.” Bernginkenna i karina jelma nterrem i mengiring pinakan nitabanna i, janah isembellih i isidi.

³⁵Nai ipecènder si Saul mo langgaten bai JAHOWA. Idi mo langgaten perlebbè ipajek si Saul.

³⁶Nai idokken si Saul mo taba pengèkutna, “Aci mo kita nola menjuhap kalak Palistin berngin èn ninganna mupusi kalak i soh mi siceggen janah memunuh kalak i karina.” Ialoi kalak i mo, “Ibaingken raja i mo kadè dok atè raja i selloh.” Tapi nina imam mo, “Dolien mo kita lebbèen mengkusoken taba Dèbata.”

³⁷Nai ikusoi si Saul mo JAHOWA, “Ndorok ngo aku mengeletlet kalak Palistin? Isohken Ko ma ngo kalak i taba kalak Israel?” Tapi oda ialoi JAHOWA ia sidarinkenna i.

³⁸Kumerna i nina si Saul mo taba pengulu-pengulu, “Roh mo kènè misèn karinana, perèso kènè mo tah dosa kadè enggo sibahanken sidari èn.

³⁹Merpadan ngo aku taba JAHOWA singgelluh i, sienggo merèken kemenangen taba kalak Israel. Barang isè mersalah kennah matè ngo hukumna, tukasi pè ia si Jonatan anakku.” Tapi isè poda pang mengaloi.

⁴⁰Nina si Saul taba karina sinterrem Israel, “Cender mo kè karina kan èn.” Ialoi kalak i mo, “Baingken mo raja nami, bakunè dok atèmu selloh.”

⁴¹Kessa i mersodip mo si Saul, “Alè JAHOWA Dèbata kalak Israel, kasa oda ialoi Ko aku ari èn? Alè JAHOWA aloi mo aku merkitè batu-batu simbadia èn. Mula aku barang si Jonatan ngo salah, aloi mo merkitè batu Urim, tapi mula bangsa Israel ngo salah, aloi mo merkitè batu Tumim.” Jadi tupung taba si Jonatan bak si Saul mo ituduh JAHOWA. Merkitè bagidi taridah mo, ukum jelma nterrem oda mersalah.

⁴²Nai nina si Saul nola mo, “Alè JAHOWA bagahken mo, aku ngo barang tah si Jonatan ngo.” Pengaloi JAHOWA tupung taba si Jonatan ngo keppè mersalah.

⁴³Nai nina si Saul mo taba si Jonatan, “Kadè pana ibahanken kono?” Ialoi si Jonatan mo, “Kupangan ngo cituk tenggoli sikubuat merkitè punca tongketku; matè pè aku jadi mo.”

⁴⁴Nina si Saul mo mbangsa, “Ihukum Dèbata mo aku, mula oda kuhukum matè kono alè Jonatan.”

⁴⁵Tapi idokken jelma nterrem i mo taba si Saul, “Kennah matè ngo si Jonatan ihukum? Keppè ia ngo merembahken kemenangen simbelgah èn Oda ndorok i. Kusumpahken kami taba JAHOWA singgelluh i, sirambar pè oda ndorok mago buk si Jonatan ibabontakalna nai. Ai kumernaken pengurupi JAHOWA ngo asa mennang ia ari èn.”

⁴⁶Enggo kessa i, molih mo kalak Palistin mi kutana, kumarna oda nèngè iletlet si Saul kalak i.

⁴⁷Enggo kessa gabè raja Israel si Saul, dak mergeraha ngo ia mengalo musuh Israel, imo kalak Moab, kalak Amon bak kalak Edom, raja-raja nagerri Zoba, dekket kalak Palistin. Barang i dikè sambing pè ia mergeraha, dak mennang ngo ia.

⁴⁸Mahantu ngo ia geraha menaluken kalak Amalek, dekket paluahken kalak Israel ipas kuasa penamun nai.

⁴⁹Anak si Saul imo si Jonatan si Jiswi dekket si Malkisua. Berruna situaen mergerar si Merab, sipeduaken mergerar si Mikhal.

⁵⁰Sinibagesna simergerar si Ahinoam, imo berru si Ahimaas; pakalima soridaduna imo si Abner anak si Ner, imo tonga si Saul.

⁵¹Si Kis bapa si Saul, janah si Ner bapa si Abner, imo dukak-dukak si Abiel.

⁵²Dak sengngit ngo si Saul mergeraha mengalo kalak Palistin sidekkah nggelluhna. Kumernaken i, mula lot idah kalak mergegoh janah berrani mènter ndor ngo ibaing i gabè soridaduna.