Read Batak Dairi 1 Samuel 15 Bible Online

1 Samuel 15 - Batak Dairi bible

1 Samuel 15

¹Tikan sidari nina si Samuel mo mbang si Saul, “JAHOWA ngo mendokken aku pebangkitken raja i gabè raja kalak Israel bangsaNa. Kumarna i kennah ngo idengkohken raja i perèntah JAHOWA Perkuasa.

²Naing ihukum ngo kalak Amalek, kumernaken ialo empung kalak i ngo kalak Israel tikan roh i Mesir nai.

³Jadi kebbas mo ko, juhap mo kalak Amalek janah lala mo karina milik kalak i. Ulang lot tadingken barang kadè sambing pè; bunuh mo karina daholi, daberru, anak-anak, bak anak mbara; bagi ma bak lembu, biri-biri, unta bak kalodè.”

⁴Nai idokken si Saul mo bai soridaduna, ibilang mo i Telaim; buèna 200.000 kalak soridadu i Israel nai, janah 10.000 kalak i Juda nai.

⁵Enggo kessa bagi, berkat mo si Saul rebbak dekket soridaduna mi kuta kalak Amalek, iambat mo musuhna i alas laè sienggo ngkerrah.

⁶Itennahken ma ngo taba kalak Keni bagèen, “Laus mo kè, tadingken kènè mo kalak Amalek, asa ulang dekket kènè kutumpatken rebbak dekket kalak i, ai selloh ngo pemaing empung ndènè arnia taba kalak Israel tikan roh kalak i i Mesir nai.” Nai laus mo kalak Keni i sidi nai.

⁷Kessa bagi, mergeraha mo si Saul dekket kalak Amalek. Italuken mo kalak i i aur dalan mulai i Hawila nai soh mi Syur kan kebincaren Mesir.

⁸Karinana jelma nterrem dekket soridadu Amalek kerri ngo ibunuh si Saul. Tapi ukum si Agag raja kalak Amalek i, itaban ngo gelluh-gelluhen bagi ma ngo tenterrana bang biri-biri bak lembu simendèna, anak-anak lembu bak anak biri-biri singgomok-nggomokna dekket karina simaharga; pellin pinakan siso merguna janah oda maharga ngo kessa ibinasaken.

¹⁰Nai idokken JAHOWA mo taba si Samuel,

¹¹“Enggo peselsel aku pebangkitken si Saul gabè raja, ai enggo merbalik ia bangKu nai, janah oda iulaken perèntahKu.” Bonek mo atè si Samuel janah kumernaken i suntuk berngin nai ngo ia dak kekelsohen bai JAHOWA.

¹²Jengkas sibarembenkenna i, berkat mo si Samuel mendahi si Saul. Ibagahken mo bana ukum si Saul enggo laus mi kuta Karmel, lako memajek batu pernèngèten bana nai iterrusken mo mi Gilgal.

¹³Pejumpa kessa mo si Samuel dekket si Saul, nina si Saul mo mbangsa, “Ipasu-pasu JAHOWA mo kono. Enggo mo kubahanken siniperèntahken JAHOWA.”

¹⁴Tapi mengkuso mo si Samuel, “Ukum bagi ngo, kasa merboh kudengkoh lembu janah mermèk biri-biri?”

¹⁵Ialoi si Saul mo, “Taban-tabanen ngo pinakan i bai kalak Amalek nai. Ibuat jelma nterrem i ngo biri-biri dekket lembu simerandalna i lako mahan pèlèenken bai JAHOWA Dèbata Bapa. Laènkenna i enggo mo kurabbatken kami karina.”

¹⁶Mendengkoh i nina si Samuel mo, “Pema lebbè, naing kubagahken ngo bamu kadè idokken Dèbata taba aku berngin ndaboi.” “Bagahken mo,” nina si Saul.

¹⁷Nai nina si Samuel mo, “Otang enggo gabè èkuten Rajai bai karina marga Israel, tukasi ukum dok atè Rajai oda pella penting dirina? Enggo mo ipilih JAHOWA Rajai gabè mengerajai kalak Israel,

¹⁸janah ma idokken JAHOWA ngo Rajai lako mengeripasken kalak Amalek si jahat i. Ipasulak ngo Rajai geraha mengalo kalak i soh tumpat kalak i karinana.

¹⁹Kasa oda iuèi Rajai perèntah JAHOWA? Kasa gabè mersilebbè-lebbèen Rajai mengalah harta taban-tabanen, maing gabè ceggo atè JAHOWA midah Rajai?”

²⁰Ialoi si Saul mo, “Situhuna enggo mo kuulaken perèntah JAHOWA. Laus ngo aku mergeraha tosè bagè pendokkennai taba aku. Kutaban ngo si Agag raja kalak Amalek, janah enggo mo ripas kubaing kalak Amalek karina.

²¹Tapi ukum pinakan, oda irabbatken pengèkutku i karina; ipilih kalak i ngo biri-biri dekket lembu simerandalna ipas taban-tabanen i nai lako mahan pèlèenken i Gilgal, mahan pèlèen bai JAHOWA Dèbata Bapa.”

²²Tapi nina si Samuel mo, “Apaina ngo ngkellengen atè JAHOWA, penguèin ngo barang pèlèen? Mendèen ngo menguèi JAHOWA dari pada pèlèen. Lotien ngo menguèi daripada pessoh biri-biri.

²³Kerna mengalo JAHOWA dos ngo jahatna i bagè mahanken kinangguruen, janah perukur ndates dos ngo jahatna i bagè menembah dèbata sidèban. Kumernaken enggo ialo Rajai perèntah JAHOWA, gabè oda nè iakui JAHOWA Rajai sikira raja.”

²⁴Mendengkoh i iakui si Saul mo, janah nina mo taba si Samuel, “Enggo merdosa aku. Kulausken ngo perèntah JAHOWA janah kulupaken peddahmu. Kumarna mbiar aku mengidah pengèkutku, gabè kuuèi mo pengidoen kalak i.

²⁵Tapi bagèndari kuèlèk-èlèk mo kono, ampuni mo dosangku janah rebbakken mo kita balik mi Gilgal, asa ndorok kusembah JAHOWA.”

²⁶Tapi ialoi si Samuel mo, “Oda nè uè aku rebbakken balik dekket Rajai. Enggo ialo raja i perèntah JAHOWA, janah bagèndari oda iakui nèngè raja i gabè raja kalak Israel.”

²⁷Nai kumessing mo si Samuel naing laus, tapi icèkèpi si Saul mo jubahna, sanga merribak.

²⁸Nai nina si Samuel mo mbangsa, “Enggo ibuat JAHOWA ari èn kerajaen i bamu nai, janah iberrèken taba sidèban simendèen merukur bamu nai.

²⁹Oda nè merluap simermulia i Dèbata kalak Israel janah hot ngo ukurNa oda mobah-obah, kumarna oda ngo bagè manusia i.”

³⁰Ialoi si Saul mo, “Enggo merdosa aku. Tapi urupi mo aku, rebbakken mo kita balik, asa ndorok kusembah Dèbata Bapa. Merkitè bagidi enggo ipesangap kono aku i hadeppen karina kalak Israel.”

³¹Nai rebbak balik mo si Samuel dekketsa mi Gilgal, janah mersodip mo si Saul taba JAHOWA.

³²Nai idokken si Samuel mo, “Arahken mo misèn Raja Agag.” Roh mo si Agag mendahisa ibagasen harap, kerna dok atèna, “Enggo leppas bahaya kematèen.”

³³Idokken si Samuel mo, “Tosè bagè peddangmu memaing mèduk partua ibages kembalangen dukak, bagi ma mo inangmu kembalangen dukakna.” Nai igatgati si Samuel mo si Agag i lebbè langgaten i Gilgal.

³⁴Enggo kessa i laus mo si Samuel mi Rama, janah Raja Saul molih mi bagesna i Gibea.

³⁵Soh matè oda nèngè nung pejumpa si Samuel dekket si Saul. Tapi melui ngo ukur si Samuel kumarna peselsel JAHOWA pebangkitken si Saul gabè raja Israel.