Read Batak Dairi 1 Samuel 16 Bible Online

1 Samuel 16 - Batak Dairi bible

1 Samuel 16

¹Daoh-daoh arien nola nina JAHOWA mo taba si Samuel, “Sadikè dekkah nai dak bonek kono kumernaken si Saul? Otang oda nè iakui ia bagè raja Israel? Bagèndari pè buat mo minak Zaitun, janah berkat mo ko mi Betlehem mendahi sada kalak mergerar si Isai, kerna sada kalak ipas dukakna nai enggo Kupilih gabè raja.”

²Tapi mengkuso mo si Samuel, “Bakunè mo pemaingku? Mula idengkoh si Saul nola i, ibunuh mo aku.” Ialoi JAHOWA mo, “Iring mo sada lembu bajar dèng, nai dokken mo taba jelma nterrem, roh pè ko mi sidi mèlèken pèlèen bai JAHOWA ngo.

³Nai dilo mo si Isai mi ulaen memèlè i. I sidi pè Kubagahken barang kadè sinaing bahanenmu. Barang siapaina Kutuduhken taba kono, kennah imo minaki gabè raja.”

⁴Ibahanken si Samuel mo rembang bagè pendokken JAHOWA bana. Soh kessa ia mi Betlehem, tersengget mo pengulu-pengulu kuta i mèmasa, nina mo, “Damè ma ngo niperembahken pekirohmu èn?”

⁵Ialoi si Samuel mo, “Uè, imo tuhu. Roh ngo aku lako mèlèken pèlèen bai JAHOWA. Kumarna i uras kènè mo diri ndènè asa ndorok kènè mendekketti kerja pemèlèen idi.” Si Isai pè dekket dukak-dukakna idokken ma mo menguras dirina gennep janah idilo mo mi kerja idi.

⁶Pulung kessa mo kalak i janah idah si Samuel mo si Eliab anak si Isai, dok atèna mo, “En ngo katèngku kalakna ipilih JAHOWA.”

⁷Tapi nina JAHOWA mo taba si Samuel, “Ulang kumerna maholi janah nggeddang ia gabè tekken ukurmu; oda ngo ia ipergeddo ukurKu. Oda ngo bagè sinisura-suraen jelma ukum sura-surangKu. Idah-idah rupa ngo ukum jelma, tapi ukum Aku mengidah ukur ngo.”

⁸Nai idiloi si Isai mo anakna si Abinadab, ipasulak mo ia mi hadeppen si Samuel. Tapi idokken si Samuel mo, “Ia pè oda ngo ipilih JAHOWA.”

⁹Nai ipasulak si Isai nola mo si Syama, tapi nina si Samuel mo, “Ia pè oda ngo ipilih JAHOWA.”

¹⁰Bagi mo ipasulak si Isai anakna sipitu i merrotor mi hadeppen si Samuel, tapi idokken si Samuel mo mbangsa, “Oda lot ipilih JAHOWA kalak i.”

¹¹Nai ikuso si Samuel mo ia, “En ngo kessa karina dukakmu daholi?” Ialoi si Isai mo, “Lot dèng ngo sada nai imo siampun-ampun, tapi mermakan biri-biri ngo ia bagèndari.” Idokken si Samuel mo, “Pasulak mo mengalengisa. Oda dèng mangan kita mula mak lebbè roh ia.”

¹²Nai ipasulak si Isai mo meraleng anak i. Sada kalak anak perana maholi janah ngkasah ngo ia, janah merandal matana. Nai idokken JAHOWA mo mbang si Samuel, “En mo ia, minaki mo ia.”

¹³Mèter ibuat si Samuel mo minak zaitun, iminaki mo si Daud i hadeppen karina kakana. Gejapkenna i, mèter ikuasai Tendi JAHOWA mo si Daud. Mulai arinna i nai soh mi podien, dak idengani Tendi JAHOWA ngo ia. Kessa i molih mo si Samuel mi Rama.

¹⁴Ukum si Saul enggo mo itadingken Tendi JAHOWA, janah dak ngo ia isusahi tendi jahat sinipasulak JAHOWA.

¹⁵Kernana i nina naposo si Saul mo tabasa, “Kubettoh kami dak isusahi tendi Jahat nipasulak JAHOWA ngo Rajai.

¹⁶Mula tuju ngo dok atè Rajai, uè ngo kami menulusi sada kalak pandè merkucapi. Asa tah idikè isusahi tendi jahat i Rajai, mèter igerrit mo kucapi, asa mulak mènak iakap raja i.”

¹⁷Nai mèter idokken si Saul mo taba kalak i, “Tulusi kènè mo sada kalak pandè meroning-oningen, janah arahken kènè mo ia mi sèn.”

¹⁸Mendengkoh i, nina sada kalak naposona i mo, “Lot ngo sada kalak anak si Isai kalak Betlehem i pandè meroning-oningen. Kalak berrani janah kalak bujur ngo ia. Janah dèng ma kalak maholi bana pandè mengerana ngo ia, janah dak iurupi JAHOWA ngo ia.”

¹⁹Nai ipasulak si Saul mo utusenna mendahi si Isai merembah tennah bagèen, “Pasulak mo anakmu si Daud permakan i menghadep aku.”

²⁰Nai ikebbasi si Isai mo sada kalodè, ibaing merembah sada anak kambing, roti dekket kiong-kiong bebbak dom sin anggur. Iberèken mo karina i taba si Daud mahan luahna bai si Saul.

²¹Bagi mo pekiroh si Daud mendahi si Saul gabè naposona. Ngkelleng ngo atè si Saul midahsa, ibaing mo ia gabè merembah-embah sinjatana.

²²Kessa i itennahken si Saul mo taba si Isai, “Ngkelleng ngo atèngku midah si Daud. Paduè mo ia tong merian rebbak aku janah mengkebasi aku.”

²³Mulai i sidi nai, gennep roh tendi jahat i mendahi si Saul, mèter ibuat si Daud mo kucapina mèter merkucapi mo ia. Nai mènak mo pengakap si Saul, kumarna itadingken tendi jahat i.