Read Batak Dairi 1 Samuel 18 Bible Online

1 Samuel 18 - Batak Dairi bible

1 Samuel 18

¹Enggo kessa mengeranai si Saul dekket si Daud, ipebangkit mo si Daud gabè pugabèna, janah mulai sidarinkenna i, oda nè ipaduè ia balik mi bages partuana. Idengkoh si Jonatan anak raja i ngo pengeranaen kalak idi. Ia pè ngkelleng ngo atèna midah si Daud i tosè bagè dirina ngo ibaing.

³Kumarna i isumpahken si Jonatan mo, kennah meralè-alè ngo ia dekket si Daud soh sidekkah-dekkahna.

⁴Italkasi si Jonatan mo jubahna, iberèken mo taba si Daud bagi ma bak pakkèen perangna bak pedangna, panah dekket pementingna.

⁵Iulaken si Daud ngo karina ulaen sinipesoh si Saul dekket mendè. Kumarnaken i, ipebangkit si Saul mo ia gabè èkuten soridaduna. Ikekelengi karina soridadu dekket naposo si Saul ngo si Daud i.

⁶Tikan balik si Daud enggo kessa italuken si Goliat kalak Palistin i, merotor mo kalak i rebbak dekket soridadu masuk mi kuta, karuar mo daberru-daberru i karina kuta Israel nai lako menimbak-nimbak raja Saul. Iendèken kalak i mo endè sampang atè

⁷ninganna tumataki menggerrit kucapi dekket malu gendang sidua-dua bak merendè daberru-daberru bagèen endèna, “Ibunuh si Saul ngo musuh i meribu-ribu, tapi si Daud memunuh merpuluh-puluh ribu kalak.”

⁸Mendengkoh i melaga kalohon mo si Saul. Kata pikirenna mo, “Si Daud nina memunuh merpuluh-puluh ribu, keppèken aku pellin meribu-ribu sambing ngo kessa. Sigejap nai keppè ia nola mo ipebangkit gabè raja kalak i.”

⁹Mulai sidarinkenna i mo ncian atèna midah si Daud.

¹⁰Sibarembenkenna ijèmak-jèmak si Saul mo kujurna i sapona, sintempu mèter isellapi tendi jahat niutus Dèbata mo ia, gabè mengamuk mo ia bagè sigila. Sinderrangna i merkucapi ngo si Daud bagè biasa.

¹¹“Kupantemken mo kujur èn taba si Daud, asa leppus soh mi dingding i pasek!” katè si Saul, nai ianjongken mo kujurna i, dua kali mendahi si Daud, tapi i ilak-ilakken si Daud ngo.

¹²Ibettoh si Saul ngo, iondingi JAHOWA ngo si Daud, ukum ia itadingken JAHOWA ngo. Kumernaken i mbiar mo ia midah si Daud.

¹³Ipindahken mo si Daud i istana nai gabè èkuten seribu kalak soridadu. Merkitè bagidi, gabè si Daud mo menguluken tenterrana gennep lot geraha.

¹⁴Merhasil ngo ia mengulaken tugasna, kumarna iurupi JAHOWA ia.

¹⁵Idah si Saul kessa dak merhasil ngo si Daud makin mbiarna mo ia midahsa.

¹⁶Tapi karina kalak Israel dekket Juda makin ngkelleng ngo atèna midah si Daud kerna sada huntuen merjasa mbuè ngo ia.

¹⁷Isura-surai si Saul ngo asa ibunuh kalak Palistin nemmuken si Daud tikan geraha, asa ulang ia memunuh. Jadi tikan sidari nina si Saul mo taba si Daud, “Mula ituduhken ko keberanienmu mergeraha lako bai JAHOWA, kupekabin pè berrungku si Merab situaen i dekket kono.”

¹⁸Ialoi si Daud mo, “Mèter kadè mo pana aku èn, janah bakunè pana pemparen bapangku, asa gabè kèla Raja i aku?”

¹⁹Tapi dapet kessa mo arina ambong belagen si Merab dekket si Daud, keppèken ipejahèken mo berruna i taba si Adriel kalak Mehola.

²⁰Berru si Saul mergerar si Mikhal, ngkelleng ngo atèna midah si Daud. Terbertik kessa mo i taba si Saul, toko ngo atèna.

²¹Nina mo ibagasen ukurna, “Si Mikhal mo kudokken bai si Daud, asa terjebak si Daud i janah gabè ibunuh kalak Palistin ia.” Nai pedua-kaliken nola idokken si Saul mo taba si Daud, “Bagèndari gabè kèlangku mo ko.”

²²Nai idokken mo taba pengabalna asa ikosikken i taba si Daud bagèen, “Ngkelleng ngo atè raja i midah kono, bagi ma ngo bang karina pugabèna; bagèndari mo katika selloh bamu asa saut bamu berruna i.”

²³Tapi tikan ibagahken kalak i kessa mo kata i taba si Daud, ialoi si Daud mo, “Idokdok kènè ngo murah gabè kèla raja? Otang kalak ncor ngo aku janah siso merlapaten!”

²⁴Ibagahken pugabè i mo rana si Daud i taba si Saul,

²⁵nai ipasulak si Saul mo kalak mendahi si Daud mendokken bagèen, “Idokken raja i mahan tokor berruna i nina pellin seratus sambing pè koling perbuah langgè kalak Palistin, mahan bèla bai raja i.” (Merkitè sura-sura si Saul bagidi mo ibaing asa matè si Daud ibaing kalak Palistin).

²⁶Ibagahken pugabè si Saul mo tennah i taba si Daud, jadi iuèi si Daud mo pendokken raja i. Nai tikan madèng kerri buhul sienggo ititi, berkat mo ia dekket denganna mi aur kalak Palistin. Ibunuh mo dua ratus kalak Palistin, ibuat mo koling perbuah langgè kalak i, nai iberrèken mo taba si Saul, sada poda kurang. Enggo kessa i ipekabin si Saul mo si Mikhal dekket si Daud.

²⁸Merkitè i satdar mo si Saul, iondingi JAHOWA ngo si Daud janah ikekelengi si Mikhal berruna i.

²⁹Nai makin mbiarna mo ia midah si Daud, janah nggogo atèna midahsa sidekkah nggelluhna.

³⁰Gennep roh soridadu kalak Palistin menjuhap, lebbih merhasil ngo si Daud mengalo kalak i daripada èkuten sidèban nipebangkit si Saul. Jadi makin termurmurna mo si Daud.