Read Batak Dairi 1 Samuel 19 Bible Online

1 Samuel 19 - Batak Dairi bible

1 Samuel 19

¹Ibagahken si Saul mo taba anakna si Jonatan dekket taba karina pugabèna, naing bunuhenna si Daud. Tapi ukum si Jonatan ngkelleng kalohon ngo atèna midah si Daud,

²kumarna i idokken mo tabasa, “Mertekkat ngo bapa naing munuh kono; jadi mermanat mo kono. Ceggen baremben ciboni mo kono i bekkas rusia.

³Laus pè aku rebbak dekket bapa mi jampalen cènder i gembar bekkasmu ciboni i. Mengeranai pè aku dekket bapa tersèngèt sura-surana bamu, janah barang bakunè pengeranaen nami, kubagahken pè bamu.”

⁴Nai iterèngèti si Jonatan mo kinimendè si Daud bai si Saul, nina mo, “O pa, ulang ibaing ko siso puna-puna taba si Daud naposomi. Ai oda nung ibaing ia salah barang kadè pè taba Bapa; balikna nola ngo tupèh, enggo mbuè kalohon jasana taba Bapa.

⁵Enggo iberèken kessahna tikan memunuh si Goliat, janah enggo iberèken JAHOWA kemenangen mbellen bai Israel merkitèsa. Bapa sendiri ngo mengidah simasa i, janah lolo ngo Bapa tikanna i. Kasa nola mo bagèndari naing isiksa bapa kalak siso mersalah janah naing ibunuh kono si Daud siso mersalah giam cituk?”

⁶Satdar mo si Saul mendengkoh kata si Jonatan i janah isumpahken mo mi gerar JAHOWA magahken oda bunuhenna si Daud.

⁷Enggo kessa i idiloi si Jonatan mo si Daud, ibagahken mo karina pengeranaen kalak i ndai. Nai iarahken mo si Daud mendahi si Saul, janah ikebbasi bagè dekkah ari.

⁸Nai masa nola mo geraha dekket kalak Palistin. Ikubu janah italuken si Daud mo kalak i karina, gabè mperrus mo kalak i.

⁹Tikan sidari kundul-kundul mo si Saul i bagesna janah ijèmak ngo kujurna. Sintempu isellapi tendi jahat siniutus JAHOWA mo si Saul. Tikanna i, merkucapi ngo si Daud.

¹⁰Nai ipantem si Saul mo si Daud tikan tunandè ia mi dingding. Tapi iilakken si Daud mo gabè pasek mo kujur i mi dingding. Lojang mo si Daud paluahken kessahna.

¹¹Bernginkenna i ma ipasulak si Saul mo piga-piga kalak mi bages si Daud lako mengentip si Daud janah munuhsa ceggenkenna. Tapi idokken sinibagesna si Mikhal mo mbangsa, “Mula oda mperrus ko berngin èn, siceggen baremben kennah ibunuh ngo kono.”

¹²Nai itantan si Mikhal mo si Daud arap babah jendèla nai, nai mperrus mo si Daud janah maluah mo ia.

¹³Enggo kessa bagidi, ibuat si Mikhal mo gana-gana sembahenna igamparken mo mi pedemmen si Daud. Ibaing mo kan julu meddemna tandèan ibukbuk kambing nai, nai icabingi mo gana-gana i dekket gobar.

¹⁴Roh kessa mo pasulakken i naing menangkup si Daud, nina si Mikhal mo, “Sakiten ngo bagèndari si Daud.”

¹⁵Tapi ipasulak si Saul dèng ngo kalak i lako menengen si Daud merkitè matana. Iperèntahken mo, “Osong kènè mo ia i babo pedemmenna i nai misèn asa kubunuh.”

¹⁶Nai ibengketti pasulakken i mo bilik pedemmenna i, keppè gana-gana ngo gampar i babo pedemmen i dekket tandèan bebbak kambing i julu meddemna.

¹⁷Nai nina si Saul mo taba si Mikhal, “Inang, berranina i ko menipu aku bagèen. Iurupi ko musuhku lako mperrus.” Ialoi si Mikhal mo, “Iasup ngo ibunuh aku, mula oda nggèut aku menontonisa lako mperrus.”

¹⁸Enggo kessa mperrus si Daud, laus mo ia mi bages si Samuel i Rama, ibagahken mo karina pemaing si Saul bana i. Nai rebbak laus mo si Daud bak si Samuel mi Nayot janah merian i sidi.

¹⁹Tapi lot ma mo magahken i Nayot i gembar Rama ngo merian si Daud.

²⁰Nai ipasulak si Saul mo barang piga-piga kalak lako menangkup si Daud. Tapi idapet kalak i mo lot sada pulungen nabi tumataki ninganna mersurak-surak iuluken si Samuel. Nai ikuasai Tendi Dèbata mo pasulakken i, gabè tumataki bak mersurak-surak ma mo bang kalak i pè.

²¹Idengkoh si Saul kessa mo berita i, ipasulak nola mo sidèban. Kalak i pè dekket ma mo tumataki bak mersurak-surak. Petellu kaliken ipasulak dèng ma mo sidèban, tapi tong ma ngo bagidi masa bai kalak i.

²²Kumarna i berkat mo si Saul mi Rama. Soh kessa ia mi tapien bindohara Sekhu, ikusoi mo idikè si Samuel dekket si Daud merian. Ibagahken jelma nisidi mo tabasa, i Nayot ngo kalak i.

²³Jadi iterrusken mo misi, tapi ia pè ikuasai Tendi Dèbata ma ngo, gabè tumatak-tatak mo ia janah mersurak-surak sidekkah perdalanen mi Nayot.

²⁴Soh kessa mo ia, italkasi mo pakkènna, tumatak-tatak janah mersurak-surak mo ia i hadeppen si Samuel, nai geppah mo ia mi tanoh bagi sabar suntuk ari bak berngin. (Isèn nai mo mulana lot umpama èn, “Si Saul pè keppè gabè nabi ngo?”)