Read Batak Dairi 1 Samuel 2 Bible Online

1 Samuel 2 - Batak Dairi bible

1 Samuel 2

¹Nai mersodip mo si Hana, nina mo, “JAHOWA ngo pesampangken atèngku; pemaingNa i ngo pesennangken ukurku. Ibagasen lolo atè kurèhèi musuhku, kerna tuhu-tuhu ngo enggo irupi Dèbata aku.

²Oda lot simbadia codi bagè JAHOWA! Pellinsa ngo kessa ndorok merèken perculèndungen.

³Petadi mo kata-katamu si luap i! Pekkom mo ranamu si jukkat i! Kerna JAHOWA ngo Dèbata simpantasna; simenghukumi karina pengelako jelma.

⁴Enggo mpenggel cèur lubalang mergegoh, tapi ukum kalak sindotè makin ntegguh.

⁵Kalak sienggo bessur arnia kumarna kiniduma bagèndari gabè pengula upahen asa gabè terolih pangaen. Kalak si rapar tikala i bagèndari cukup puas, cukup pangaenna. Sinibages nggempus enggo merdukak bagèndari enggo mo pitu itubuhken dukakna. Tapi partua i bages simbuè dukakna itadingken, ibelli menggong sindersa.

⁶JAHOWA ngo sipematèken, Ia ma ngo sipegeluhken. Mi bekkas kalak simatè ipesusur jelma i janah Ia ma ngo pekèkèken i sidi nai.

⁷Lot ngo ibaing jelma ncor janah ndersa lot ma ngo ibaingken kaya raya. Lot ngo jelma ipeterruh mbages lot ma ngo ipedates.

⁸Ibas kinipersuk nai ipekèkè kalak siso merharta, ibas kinidersa nai ipaluah kalak simerlèa. Ibaing ngo kalak i gabè dengan simersangap, janah ipebangkit ngo kalak i i ulaen kalak persangap. JAHOWA ngo sidasa dangaen tanoh èn, i babona ngo ipajek dunia èn.

⁹Dak sennang ngo jelma mula pukpuk setia, ipas lenggemmen JAHOWA. Tapi kalak perjahat tumpat janah binasa ibas gellap bulita. Gegoh ndiri mak terasangken, gegoh jelma mak merèken kemenangen.

¹⁰Musuh-musuh JAHOWA siap melala karina, buradan mo kalak i; i langit nai ngo Ia merdeggur. JAHOWA naing menghukum karina dunia èn, janah merèken kuasa mermulia taba raja sinipilihNa.”

¹¹Nai mulak mo si Elkana dekket dukak-dukakna mi Rama, tapi ukum si Samuel anak i, tading ngo i Silo mengkebasi JAHOWA rebbak Imam Eli.

¹²Ukum dukak-dukak si Eli jahat kalohon ngo. Oda iuèi kata ni JAHOWA

¹³tukasi pè imam kalak i, gabè lemmo-lemmo atèna ngo ibaing taba bangsa Israel. Mula lot kalak memèlèken pèlèenna, mèter roh mo pengu- rupi imam merembah garpu merserren tellu. Iganggangi dèng pè jukut i,

¹⁴mèter ipantemken mo garpu i mi saruam bekkas kiroroh jukut i, nai barang kadè sambing i ruah garpu i mi ruar, gabè milik imam mo i. Taba karina kalak Israel siroh mi Silo lako mèlèken pèlèenna ngo dak ibaing bagi.

¹⁵Sipata mèter roh ngo pengurupi imam i tikan madèng isirang pessohna lako tutungen, nai idokken mo taba kalak sinaing mèlèken pèlèen i, “Berèken mo dèba jukut simatah i dèng bai imam asa itutungi; ai oda uè ia menjalo jukut sienggo ibelgang.”

¹⁶Mula ialoi kalak i, “Sellohen ngo mula sièkutken hatoren, ai kennah situtungen ngo lebbè pessoh i; kessa i pè asa ndorok buatenmu apai lemmo atèmu,” nai idokken pengurupi imam i mo, “Oda ngo bagi, bagèndari ngo kennah berrèken, mula oda, kennah kupaksa ngo mengamet.”

¹⁷Bagi mo duana anak si Eli i merdosa mbellen i penengennen JAHOWA, kumarna melancang ukurna midah pèlèen bai JAHOWA.

¹⁸Tikan bagidi ukum si Samuel anak-anak i dak tong ngo mengkebasi JAHOWA. Ipakkè ngo baju jubahna ipas kaèn linen nai, tosè bagè baju jubah imam-imam.

¹⁹Gennep tahun ngo dak ibahan inangna jubah kèdèk janah iberèken bai si Samuel, mula roh daberru i rebbakken dekket sinibalèna lako mèlèken pèlèen ta- hunen.

²⁰Nai ipasu-pasu si Eli mo si Elkana bak sinibagesna i, janah ninganna idokken taba si Elkana, “Katerra pè iberèken JAHOWA mo anak bamu arap sinibagesmu èn mahan gancih anak sienggo isohken kènè i bai JAHOWA.” Enggo kessa i, mulak mo kalak i mi Rama.

²¹Ipasu-pasu JAHOWA mo si Hana, itubuhken dèng ngo tellu nai anak daholi dekket dua daberru. Makin mbelgah mo si Samuel ninganna ia mengkebasi Dèbata.

²²Ukum si Eli enggo mo tua-tua kalohon. Dak tong ngo idengkoh pengaduen tersèngèt pengelako dukak-dukakna i taba kalak Israel. Ibettoh si Eli ma ngo rebbak meddem dukak-dukakna i dekket daberru-daberru simengula i lebbè pèntu undung-undung Bekkas JAHOWA.

²³Kumerna i idokken mo taba dukak-dukakna i, “Enggo soh mendahi aku boa-boa bai karina ummat nai, tersèngèt pengelako ndènè siso kasèa i. Kasa bagi ibaing kènè?

²⁴Ulang nè ulaken kè bagi, alè pa. Ai soh mo nggodona irana- ranaken ummat JAHOWA tersèngèt kènè.

²⁵Mula mersalah meradepken jelma, ndorok ngo iampuni Dèbata; tapi mula merdosa jelma meradepken JAHOWA, isè mo ndorok mengurupi?” Tapi oda ngo isuihken kalak i peddah si Eli bapana i, ai enggo itetapken JAHOWA lako munuh kalak i.

²⁶Tapi ukum si Samuel anak-anak i, makin mbelgah ngo janah makin dak ikekelengi JAHOWA bak karina jelma pè.

²⁷Tikan sidari roh mo sada kalak nabi mendahi si Eli, lako memagahken tennah JAHOWA bana, nina mo, “Sinderrang si Aron empungmi dekket dukak-dukakna gabè hamba raja Mesir enggo Kupacidah diringKu taba si Aron.

²⁸Ibas karina marga Israel nai, enggo Kupilih simpangansa gabè imamKu, lako mengkebasi i langgaten, menutung dahupa dekket memakè baju efod mula mengerana dekket Aku. Bai kalak i dekket bai pinemparna Kuberèken ngo hak lako mengamet dèba ibas pèlèen persembahen sinitutung i langgaten.

²⁹Kasa mbara dèng matamu menghakai pèlèen-pèlèen sini- pèlèken bangsangKu bamu tosè bagè perèntahKu? Kasa bagi ko alè Eli, lebbih iuèi ko dukakmu daripada menguèi Aku, gabè ibelli ko kalak i ipegomok dirina merkitè bagian pèlèen simerandalna ipas pèlèen sinipèlèken bangKu?

³⁰Aku, JAHOWA Dèbata kalak Israel, enggo merpadan arnia mendokken pemparenmu bak margamu gabè imam mengkebasi Aku soh sidekkahna. Tapi ukum bagèndari oda nè lemmo atèngKu. Kerna kalak sipesangapken Aku ngo Kupesangap, janah simengelèai Aku kennah Kulèai.

³¹Dengkohken mo, roh mo tikkina Kubunuh mo karina anak perana ipas pemparenmu nai dekket i margamu nai, gabè sada kalak nè poda daholi i pemparenmu nai merumur nggeddang.

³²Gabè bonek mo ko janah ncian mengidah pasu-pasu sinaing Kuberèken taba kalak Israel sidèbanna i, keppèken ukum pinemparmu matè mo tikan poso dèng.

³³Tapi sada kalak ipas pemparenmu nai Kubelli ngo nggelluh lako mengkebasi Aku gabè imam. Tukasi pè ia kennah gabè pètung janah mendellè. Karina pemparenmu sidèbanna i terbunuh ngo.

³⁴Mahan tanda magahken karinana siKuranaken i kennah saut, anakmu sidua kalak i, si Hofni dekket si Pinehas, kennah matè ibagasen sidari.

³⁵Nai Kupilih nola mo imam na setia taba Aku janah mahanken kadè Kudokken tabasa. Ukum bana Kuberèken mo pinempar sidak tong mengula bagè imam i hadeppen raja-raja siKupilih i.

³⁶Gennep pinemparmu singgelluh dèng, kennah laus mendahi imam i lako mido riar bak pangaen. Nina mo mengido, Paduè mo Aku mengurupi imam-imam i, asa terolih mangan Aku mula pè giam singkebabah sambing.”