Read Batak Dairi 1 Samuel 20 Bible Online

1 Samuel 20 - Batak Dairi bible

1 Samuel 20

¹Nai mperrus mo si Daud i Nayot nai ndessing mi Rama laus mendahi si Jonatan, nina mo soh kessa ia, “Kadè pana salahku? Kejahaten kadè pana kuulaken janah kadè dosangku taba bapamu, memaing asa naing ibunuh aku?”

²Ialoi si Jonatan mo, “Ulang dokken bagi. Merkitè gerar JAHOWA, oda ibunuh kono. Dak ibagahken bapa ngo bangku karina sura-surana mbelgah barang kètèk pè. Jadi dok atèngku oda irusiaken sura-surana i bangku. Asa, oda ngo bagidi nemmu.”

³Ialoi si Daud mo, “Ibettoh bapanta i ngo, ngkelleng atèmu bangku. Jadi pasti oda uè ia magahken idi taba ko, asa ulang melui ukurmu. Tapi tuhu ngo, bagè sèntengna nggelluh JAHOWA, nggelluh dekket kono, pellin serambar bulung rih nai ngo kellang-kellangku i kematèen i nai.”

⁴Nai nina si Jonatan mo, “Barang kadè sambing idokken kono taba aku, kuulaken ngono i.”

⁵Ialoi si Daud mo, “Bagèen mo i, baremben mo Pèsta Benna Bulan. Ncemmal kin kennah rebbak mangan ngo aku dekket raja i. Tapi mula toko dok atèmu ciboni mo aku i jampalen soh kaduan.

⁶Mula ikusoken raja i bakunè asa oda roh aku, dokken mo tabasa, enggo permisi aku bamu, lako balik mi Betlehem, kumarna lot ibaing i sadèi kerja tahun memèlè kami sisimpangaen.

⁷Mula idokken raja i, ‘O, selloh’, lot mo sennangna aku.

⁸Kupido pengurupinmu, kerna enggo merbulaban kita i hadeppen JAHOWA. Tapi mula salah ngo aku, bunuh mo aku, tapi ulang sohken aku bai bapamu.”

⁹Ialoi si Jonatan mo, “Ulang ko berrih-berihen. Mula kubettoh enggo tutus atè bapangku mencelakaken kono, kennah kubagahken bamu.”

¹⁰Nai mengkuso mo si Daud, “Isè mo magahken bangku, mula punguren bapamu mengaloi kono?”

¹¹“Ita mo mi jampalen,” nina si Jonatan. Nai rebbakken mo kalak i laus mi jampalen.

¹²Idokken si Jonatan mo taba si Daud, “JAHOWA Dèbata kalak Israel mo mahan saksinta. Ceggen baremben barang kaduan tupung bagè bagèndari kucubaken pè menga- sak ukur bapangku. Mula selloh ngo ukur- na bamu, kubagahken pè berita i bamu.

¹³Mula lot ngo niatna mencelakaken kono, kennah kubagahken ma ngo i tong bamu, asa ipaluahi ko dirimu, mula oda kubaing i, ibunuh JAHOWA mo aku. Katerra pè idengani JAHOWA mo ko, bagè bapa pè enggo iurupi ma.

¹⁴Janah mula nggelluh dèng aku, èngèt mo padanta i i hadeppen JAHOWA, setia mo ko taba aku; tapi mula enggo maknè lot aku,

¹⁵pacidah mo kesetiaenmu taba pinemparku, soh amman sumendah.

¹⁶ulang mo mpostep padanta sidua. Mula mpostep, JAHOWA mo menghukum kono.”

¹⁷Jadi pedua kaliken mo èn idokken si Jonatan imangmangken si Daud padanna magahken ngkelleng atèna midahsa, kumarna ikekelengi ngo si Daud dosken dirina sendiri.

¹⁸Nai nina si Jonatan mo mbangsa, “Baremben Kerja Peltak Bulan. Terbettoh mo kono oda i sidi, kerna numar bekkasmu tupung mangan,

¹⁹makinsa nola mo kaduan! Kumarna i laus mo kono mi bekkasmu ciboni tikala i, janah pèma mo i balik batu nggukguken i.

²⁰Kaduan kupanah pè tellu kali mi batu i, bagè cara memanah tuhu-tuhu.

²¹Nai kupasulak mo naposongku memitik anak panah i mula kudokken mbangsa, ‘Oè, tolè mi sèn dèng ngo anak panah i; pitik mo,’ merlapaten ngo i mènak ngo ko janah ndorok mo ko karuar. Kusumpahken mo mi gerar JAHOWA singgelluh i oda lot mara barang kadè pè bamu.

²²Tapi mula ningku taba naposongku, ‘Oè, kurang mi sadoi dèng ngo anak panah i’, merlapaten ngo i, JAHOWA ngo pasulakken kono laus; jadi laus mo ko.

²³Katerra pè dak ipesèngèt JAHOWA mo kita asa sièngèt padanta sidua i soh sidekkahna.”

²⁴Nai ciboni mo si Daud i jampalen. Tupung Kerja Peltak Bulan, roh mo raja Saul mi bekkas mangan.

²⁵Bagè kecemmalenna, kundul mo ia kan dingding; kundul ma mo si Jonatan kan lebbèna, si Abner kundul kan si Saul, tapi numar ngo kundulen si Daud.

²⁶Tapi oda lot iterèngèti si Saul i sidarinkenna i, kerna dok atèna, “Tah bakunè lot halangenna, gabè oda mpanting ia mengèkutken hatoren agama.”

²⁷Sibarembenkenna imo ari peduaken Peltak Bulan, tong ngo numar kundulen si Daud, nai ikusoi si Saul mo si Jonatan, “Kasa oda roh si Daud bari dekket ari èn mi bekkas mangan èn?”

²⁸Ialoi si Jonatan mo, “Enggo permisi ia bangku, ai laus ngo ia mi Betlehem.

²⁹Nina ngo, ‘Paduè mo aku laus kerna memèlè ngo kami sisimpangaen i Betlehem, idokken kakangku ngo aku kennah roh. Mula iijinken kono ngo, asa laus aku mendahi kadè-kadèngku’. Kemulihkenna i ngo asa oda roh ia mangan èn alè Pa.”

³⁰Mendengkoh i punguren mo si Saul taba si Jonatan nina mo, “Dukak merjaya ngo ko. Bagèndari ngo tangkas kubettoh, kan si Daud ngo ko memaing malu mi dirimu dekket bai inangmu.

³¹Oda ngo ko satdar, mula nggelluh si Daud, ko oda ndorok gabè raja Israel? Bagèndari pè, suruh mo mengalengisa janah iarahken mi sèn, ai kennah matè ngo ia.”

³²Nai ialoi si Jonatan mo, “Kasa kennah matè ia? Kadè pana dosana?”

³³Mendengkoh i mènter ianjongken si Saul mo kujurna taba si Jonatan lako memunuhsa. Ibettoh si Jonatan mo, enggo tuhu-tuhu tutus hendak bapana memunuh si Daud.

³⁴Ibagasen laga, itadingken si Jonatan mo bekkas mangan i, janah kadè poda ipangan tupung ari peduaken Kerja Peltak Bulan i. Melui ngo ukurna mikirken si Daud sienggo ihina si Saul bapana i.

³⁵Sibarembenkenna laus mo si Jonatan mi jampalen lako pejumpa dekket si Daud bagè sienggo ipadanken kalak i sidua kin. Iarahken mo sada kalak naposona daholi,

³⁶nina mo mbangsa, “Lako, pitik mo nahan anak panah sinaing kupanahken.” Sinderrang lojang ia, ipanahken si Jonatan mo panahna mengelausi anak i.

³⁷Soh kessa ia mi bekkas ndabuh anak panah i nina si Jonatan mo tabasa, “Oè kurang mi sadèi dèng ngo anak panah i!

³⁸Kettu ndor, ulang ko jangal!” Ipitik mo anak panah i, janah balik ia mendahi si Jonatan.

³⁹Oda ibettoh daholi i lapaten kata si Jonatan i, pellin si Jonatan dekket si Daud ngo kessa bettoh-bettohen.

⁴⁰Enggo kessa i iberèken si Jonatan mo panahna i taba anak i janah ipasulak mo ia balik mi kuta.

⁴¹Enggo kessa laus anak i, karuar mo si Daud i balik batu gungun i nai, mèter sujud mo ia tellu kali. Mersisanggohen mo kalak i janah merradu tangis duana. Bonekken ngo atè si Daud daripada si Jonatan.

⁴²Enggo kessa bagidi idokken si Jonatan mo taba si Daud, “Dak iurupi Dèbata mo ko. JAHOWA ngo menjamin ukum kita dekket pinemparta dak ièngèt ngo padanta sidua i hadeppen Dèbata.” Nai laus mo si Daud janah si Jonatan pè mulak mo mi kuta.