Read Batak Dairi 1 Samuel 21 Bible Online

1 Samuel 21 - Batak Dairi bible

1 Samuel 21

¹Nai idahi si Daud mo Imam Ahimelekh i kuta Nob. Tersengget ngo si Ahimelekh menimbaki si Daud mi ruar, ikusoken mo tabasa, “Kasa pellin sada kono kessa roh mi sèn?”

²Ialoi si Daud mo, “Lot ulaenku dok raja i janah oda ndorok bagahenken i barang bai isè pè. Denganku pè kudokken ngo memèma i sada bekkas.

³Sentabi mo, bagèndari lot naing kusonku, kadè ngo lot pangaen bainde? Berèken mo bangku lima roti, barang pè tah lot pangaen kadè i sèn.”

⁴Nai nina Imam i mo, “Oda lot bangku ukum roti biasa, pellin roti pèlèen ngo kessa lot; buat mo, asal mo oda lot campur denganmi dekket daberru rembaru èn dèng.”

⁵Ialoi si Daud mo, “Tentu oda lot i iulaken kalak i. Dakdak ngo ijaga denganku sibagidi mula laus kami mergeraha, asa mpanting kalak i mengèkutken hatoren agama, padahal ulaen biasa ngo bai nami mergeraha i, makinsa nola mo ulaen èn.”

⁶Nai iberèken imam i mo bai si Daud roti sipèlèenken i, ai roti pèlèen bai Dèbata i ngo kessa lot bana, janah enggo ipekèkè i langgaten nai naing igancihi nola rembaru. (

⁷Tupung ngo i sidi si Doëg kalak Edom sidarinkenna i imo èkuten permakan si Saul lako mengulaken ulaen agama.)

⁸Kessa bagi ikuso si Daud mo si Ahimelekh, “Lot ngo tekka iboniken kene kujur barang peddang sindorok kupakè? Ai sintempu ngo perèntah raja i gabè rudu-rudu ngo aku berkat, oda nè sanga mengaleng peddang barang pè sinjata sidèban.”

⁹Ialoi si Ahimelekh mo, “Kupennep ngo peddang si Goliat sinibunuhmi i lembeng Ela tikala i; i balik baju Efod ngo bagèndari peddang i ibaluti dekket kaèn. Mula bamu, buat mo, kerna pellin i ngo kessa sinjata lot i sèn.” Nina si Daud mo, “Peddang i ngo simendèna i suberri aur èn, berèken mo i bangku.”

¹⁰Mperrus mo si Daud sidarinkenna i bai si Saul nai, nai soh mo ia mendahi si Akhis, raja i kuta Gat.

¹¹Ibagahken naposo si Akhis i mo tabasa bagèen, “Otang si Daud ngo kalak èn raja i nagerrina? Otang lako pesangapkensa ngo tikala i tumataki daberru-daberru ninganna merendè bagèen, ‘Ibunuh si Saul ngo musuh merribu-ribu, tapi ibunuh si Daud merpuluh-puluh ribu?’ ”

¹²Gabè gulut mo pikiren si Daud kemulihken kata i janah mbiar kalohon mo ia midah Raja Akhis.

¹³Kumarna i, ipekkulah si Daud mo bagè gila i hadeppen sinterrem. Tikan icuba kalak i naing mengambatsa, bagè cara kalak sikurang ukur mo ia ibaing; iraoki mo pèntu pengkeruhen janah ibelli mo èdurna menjarir mi janggutna.

¹⁴Nai nina si Akhis mo taba pugabèna, “Oda idah kènè gila ngo ia? Kasa iarahken kènè mi sèn?

¹⁵Kurang dèng ngo kalak sasèk i sikulilingku, asa iarahken kènè dèng ma sada kalak nai sigila mi bagesku èn?”