Read Batak Dairi 1 Samuel 22 Bible Online

1 Samuel 22 - Batak Dairi bible

1 Samuel 22

¹Nai laus mo si Daud i kuta Gat nai, ciboni mi liang ndessing i kuta Adulam nai. Terbertik kessa mo taba kaka-kakana dekket taba karina kadè-kadèna i sidi keppè ia roh mo kalak i mendahisa.

²Bagi ma ngo dekket kalak sitersessak, kalak perutang, dekket kalak siso mengakap tekken karina merpulung dekket si Daud, janah si Daud mo gabè èkuten kalak i. Karina pengèkut si Daud i kira-kira empat ratus kalak buèna.

³I liang i nai laus mo si Daud mi Mispa sini nagerri Moab, mendokken taba raja auri, “Paduè mo bapa dekket inangku merrian taba Rajai soh mi lebbè kubettoh bakunè dok atè Dèbata tersèngèt aku.”

⁴Nai iarahken mo partuana i mendahi raja nagerri Moab. Merian i si mo kalak i sidekkah ciboni i liang i si Daud.

⁵Tikan sidari, roh mo sada kalak nabi mergerar si Gad mendahi si Daud mendokken, “Ulang mo merian i liang èn kono, kettu mo laus mi tanoh Juda.” Nai berkat mo si Daud, sakat mo ia mi tembak Keret.

⁶Tikan sidari, kundul-kundul mo si Saul i terruh kayu ara i sada uruk i Gibea; ijèmak ngo kujurna janah karina lubalangna cènder i sikulilingna. Tikan terbertik bana enggo terbettoh bekkas si Daud dekket pengèkutna,

⁷nina mo taba pakalimana i, “Dengkohken kènè mo alè kalak Benjamin. Mèter iberrè si Daud mo katè ndènè juma bak pekken anggur? Mèter baingenna mo kènè katè ndènè karina gabè pengulu tenterrana?

⁸Ingo makinsa sada taki kènè mengalo aku janah isè poda memagahken taba aku enggo sada taki anakku dekket si Daud i? Isè poda kènè menarihken aku barang magahken taba aku, ukum si Daud, imo pengèkutku kin, mèma ketikana ngo ia bagèndari lako munuh aku, bagi ma anakku si Jonatan enggo mengèkèi ukurna!”

⁹Si Doëg imo èkuten permakan si Saul, i sidi ma ngo bak pakalima si Saul, nai nina si Doëg mo, “Kuidah ngo roh si Daud mendahi si Ahimelekh anak si Ahitub i Nob.

¹⁰Ipido si Ahimelekh ngo peddah bai JAHOWA nai, kadè patut baingen si Daud. Laènkenna i iberrèken dèng ma ngo pangaen bekkel bai si Daud, iberèken ma ngo bana peddang si Goliat kalak Palistin i.”

¹¹Nai ipasulak raja i mo mengalengi Imam Ahimelekh bak karina kadè-kadèna bagi ma sienggo gabè imam i Nob nai roh mo kalak i karina menghadep tabasa.

¹²Idokken si Saul mo taba si Ahimelekh, “Dengkohken mo alè anak si Ahitub!” “Uè Rajai nami,” nina mengaloi.

¹³Ikusoken sm Saul mo tabasa, “Kasa mertaki kono dekket si Daud lako mengalo aku? Kasa iberèken kono roti mahan bekkelna janah iberèken ko peddang dekket ipido ko peddah bai Dèbata nai lako bana? Bagèndari ialo ngo aku janah mèma ketikana ngo ia lako munuh aku.”

¹⁴Nai ialoi si Ahimelekh mo, “Otang si Daud ngo si setiana pakalima Rajai? Kèla Rajai ngo ia janah èkuten pengabal raja i, janah ihormati karina kalak silot i bages Rajai.

¹⁵Tuhu ngo, kupido peddah bai Dèbata nai lako bana, tapi oda ngo pellin èn dèng kessa kuulaken bagidi. Tersèngèt mertaki mengalo Rajai, ulang mo gabè itukas Rajai aku barang sada kalak pè kadè-kadèngku. Kadè poda kubettoh tersèngèt i.”

¹⁶Tapi nina raja i mo, “Ahimelekh! Kono dekket karina kadè-kadèmu kennah matè.”

¹⁷Nai iperèntahken mo taba perjaga silot i gembarna, “Bunuh mo karina imam-imam JAHOWA i. Ai enggo sada taki kalak i dekket si Daud. Ibettoh kalak i ngo mperrus si Daud, tapi oda uè kalak i magahken bangku.” Tapi oda ngo uè perjaga i memunuh imam-imam JAHOWA i.

¹⁸Kumarna bagidi, idokken si Saul mo taba si Doëg, “Kettu mo! Kono mo memunuh kalak i.” Nai ibunuh si Doëg mo imam-imam i. Ualuhpuluh lima kalak mo imam ibunuh sindorok menelluk baju efod ibas sidarinkenna i.

¹⁹Iperèntahken si Saul ma ngo memunuh karina pengisi kuta Nob, kuta imam i, daholi, daberru, anak-anak soh mi anak mbara. Bagi ma dekket lembu, kalodè bak biri-biri, karina isalpuni kessahna.

²⁰Pellin si Abyatar, sada kalak ipas dukak-dukak si Ahimelekh nai ngo kessa maluah. Mperrus mo ia mendahi si Daud,

²¹ibagahken mo enggo ibunuh si Saul imam-imam JAHOWA.

²²Nai nina si Daud mo mbangsa, “Kuidah kessa i sidi si Doëg tikanna i, mèter kubettoh ngo, kennah iaduken ngo ia taba si Saul. Jadi kumernaken aku ngo, asa matè karina kadè-kadèmu.

²³Rebbak aku mo ko, janah ulang ko mbiar. Naing ibunuh si Saul ngo ko, tapi aku pè naing ibunuh ma ngo. Kumarnaken i, mènak mo ko i bekkasku.”