Read Batak Dairi 1 Samuel 24 Bible Online

1 Samuel 24 - Batak Dairi bible

1 Samuel 24

¹Tikan i dèng balik geraha mengalo Palistin si Saul, soh mo bana berita, i gurun njolmit mi En-Gedi ngo keppè si Daud.

²Mèter ipilih si Saul mo tellu ribu soridaduna simahantuna i suberri Israel nai, nai berkat mo kalak i menulus si Daud dekket parangenna i kan kebincaren delleng Batu Kambing Rambah.

³Soh mo si Saul mi gembar kandang-kandang biri-biri i biding dalan. Lot ma ngo sada i sidi liang, masuk mo si Saul mi si naing matakken pinanganna. Keppè kan bagessenna i liang i ma ngo si Daud dekket parangenna ciboni.

⁴Nai idokken parangen si Daud mo tabasa, “En mo katikana selloh baindene. Otang JAHOWA pè enggo mendokken taba ko bagèen, ‘Kusohken pè baindene musuhmu, baing mo bana bakunè dok atèmu.’ ” Nai mendirip-ndirip mo si Daud mi bekkas si Saul nai igonting mo cituk biding jubah si Saul.

⁵Tapi bukbak mo rentektekna magahken enggo salah ia maing bagidi.

⁶Idokken mo taba parangenna, “Katerra pè ijaga JAHOWA mo aku asa ulang sanga kubaing jahat taba rajangku situk poda uè aku maing ncio iakap, kumarna sienggo ipilih JAHOWA ngo ia.”

⁷Bagi mo ibaing si Daud asa mènak parangenna i janah oda ngo ipadiat kalak i menjuhap si Saul. Nai kèkè mo si Saul menadingken liang i, menerrusken perdalanenna.

⁸Si Daud pè karuar ma mo i liang i nai, janah dilo- dilo mo ia kan podi si Saul, “O alè Raja nami!”

⁹Tumulih mo si Saul mi podi. Nai mersembah mo si Daud ninganna idokken, “Kasa idengkohken Rajai gosok-gosok ndèba simendokken naing kucelakaken Rajai?

¹⁰Bagèndari enggo iakapken Rajai, situhuna ndai ibagasen liang i enggo mo ipesakat JAHOWA Rajai taba aku. Enggo ma ngo idokken sada kalak taba aku, asa kubunuh Rajai, tapi oda uè aku. Kudokken tabasa, ukum aku oda uè maing siso patut bai rajangku si nipilih JAHOWA.

¹¹Tengen mo, alè simatuangku! Tengen kènè mo jubah Rajai sikugettap sinitanganku èn. Situhuna ndorok kin ngo kubunuh Rajai, tapi gabè biding jubah Rajai mo kugettap situk. Jadi enggo ntangkas, oda lot sura-surangku jahat barang pè naing mengalo. Keppèken dak iletlet raja i ngo aku asa bunuhenna, tukasi pè oda lot kubaing salah giam cituk pè meradepken Rajai.

¹²JAHOWA mo merhukum taba kita isè situhuna kita mersalah. JAHOWA mo malesken taba Rajai tersèngèt pemaing Rajai taba aku, tapi ukum aku oda uè aku maing ncio atè Rajai giam cituk pè.

¹³Otang ibettoh raja i ngo umpama èn, ‘Pellin kalak jahat ngo kessa mengulaken jahat.’ Kumarna i, oda uè aku memaing jahat taba Rajai.

¹⁴Tengen mo aku èn sinaing ibunuh raja Israel. Tengen mo aku èn dak iletlet. Pellin dosken sada biang matè ngo aku dosken sada kutu mbiang.

¹⁵JAHOWA mo gabè perhukum taba Rajai dekket aku. Katerra pè iperdimata mo simasa èn janah muat bèla kumernaken aku janah paluahken aku bai Rajai nai.”

¹⁶Enggo kessa pul iruapken si Daud ranana i, nina si Saul mo, “Kènè ngo i alè Kèla?” Nai tangis mo ia.

¹⁷Nina mo taba si Daud, “Kènè ngo ntèger aku ngo salah.

¹⁸Kejahatenku bai ndènè i enggo ibalesken kènè dekket simendè. Sidari èn mo enggo ituduhken kènè, mendè ngo keppè pemaing ndènè bangku, kumarna oda ibunuh kènè aku, tukasi pè enggo ipesakat JAHOWA aku mi bagasen tangan ndènè.

¹⁹Jarang ngo masa mula pesimbak sada kalak dekket musuhna, ibelli musuhna i njuah-njuah nggelluh. Katerra pè ipasu-pasu JAHOWA mo kènè kumernaken simendè ibaing kènè bangku ari èn.

²⁰Bagèndari enggo makin tok aku ukum kènè kennah ngo gabè raja kalak Israel, janah kerajaen Israel tettap ntegguh i terruh pemerèntahen ndènè.

²¹Bagèndari pè padanken mo bangku merkitè gerar JAHOWA, magahken oda ripasenken ndènè pinemparku janah oda isasa kènè gerar usurku.”

²²Nai ibulabanken si Daud mo ulaenkenna tersèngèt i. Enggo kessa i, balik mo si Saul mi bagesna, si Daud bak parangenna pè laus ma mo mi bekkas percibonienna.